Հինգշաբթի, 17 Օգոստոսի 2017 14:04

Արմինֆո. Քաղաքացիական ավիացիայի գլխավոր վարչության պետ Սերգեյ Ավետիսյանը գտնում է, որ ավիատոմսերի գների աճն ունի օբյեկտիվ պատճառներ: «Հայաստանում ամենապահանջված ուղղություններով ավիատոմսերը թանկացել են, ինչը կապված է տուրիստական սեզոնի պիկ շրջանի հետ»,- օգոստոսի 17-ին կառավարության նիստից հետո լրագրողների հետ զրույցում հայտարարել է նա:

ՔԱԳՎ ղեկավարը հիշեցրել է, որ տարեցտարի Հայաստանի քաղաքացիներն ականատես են դառնում գործընթացի, երբ հուլիսի վերջից, ինչպես նաև ամանորյա տոների նախաշեմին երկրի տուրինդուստրիան արձագանքում է գների բարձրացմամբ: Միաժամանակ նա համաձայն չէ այն հավաստմանը, որ իրավիճակը ոլորտում քաոսային է: Ավետիսյանի կարծիքով, ավիատոմսերի գների աճը պայմանավորված է սեզոնայնությամբ, ինչը բնորոշ է ոչ միայն Հայաստանին, այլ նաև՝ ողջ աշխարհին:

Թանկացման երկրորդ ասպեկտը, ինչպես պարզաբանել է Սերգեյ Ավետիսյանը, այն է, որ «բաց երկնքի» քաղաքականության իրականացման շրջանակներում հետևողականորեն իրականացվող աշխատանքն ավելի է ամրապնդել Հայաստանի դիրքերը համաշխարհային ավիացիոն քարտեզում: Որպես արդյունք՝ Հայաստան թռիչքների պահանջարկը գերազանցել է սպասումները. ավիաընկերությունները սխալվել են իրենց սկզբնական կանխատեսումներում և համարժեք առաջարկի բացակայության պայմաններում տոմսերը թանկացել են: Հատկանշական է, որ արձանագրվել է Հայաստան ժամանող ուղևորների թվի աճ՝ մեկնողների համեմատ. ուղևորների հոսքն ավելացել է 30%-ով:

Ներկայումս, Ավետիսյանի խոսքով, ավիափոխադրողները փորձում են, համաձայն պահանջարկի, ճշգրտումներ կատարել թռիչքների ժամանակացույցում, ինչպես նաև փոխել օդանավի տեսակը՝ ապահովելու համապատասխան տարողունակություն: Ինչպես նշել է Ավետիսյանը ավիատոմսերի գները կտրուկ կսկսեն նվազել արդեն սեպտեմբերի կեսին՝ երկու-երեք անգամ:

Ըստ որում, ՔԱԳՎ ղեկավարը հերթական անգամ նշել է, որ վարչությունը լիազորված չէ միջամտելու ավիաընկերությունների կոմերցիոն գործունեությանը և ազդել նրանց կողմից իրականացվող սակագնային քաղաքականության վրա: «ՔԱԳՎ-ն կարող է անուղղակիորեն ազդել գնագոյացման գործընթացի վրա՝ հավասար մրցակցային պայմաններ ապահովելու, ոլորտի մշտական մոնիտորինգի և համապատասխան օրենսդրական դաշտ ստեղծելու օգնությամբ»,- նշել է նա:  Ինչպես ավելի վաղ հայտնել էր ԱրմԻնֆո-ն, հուլիսից Հայաստանից Ռուսաստան ավիոտոմսերը կտրուկ թանկացել են: Ըստ որում, թանկացել են ամենապահանջված չվերթերի տոմսերը՝ Երևան-Մոսկվա, Երևան-Սոչի: