Երեթշաբթի, 27 Փետրվարի 2018 18:43

Արմինֆո. Նախագահ Սերժ Սարգսյանն այսօր խորհրդակցություն է անցկացրել հանրապետության սոցիալ-տնտեսական քաղաքականության պատասխանատուների հետ` քննարկելու և ամփոփելու 2017թ. ՀՀ սոցիալ-տնտեսական ոլորտի արդյունքները: 
 

Ինչպես տեղեկացնում է ՀՀ նախագահի մամուլի ծառայությունը, խորհրդակցությանը մասնակցել են վարչապետ Կարեն Կարապետյանը, փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը, Նախագահի աշխատակազմի ղեկավար Արմեն Գևորգյանը, ԿԲ նախագահ Արթուր Ջավադյանը, սոցիալական և տնտեսական ոլորտների քաղաքականության մշակման ու իրականացման պատասխանատու գերատեսչությունների ղեկավարները, ազգային վիճակագրական ծառայության նախագահը, Նախագահի աշխատակազմի պաշտոնյաներ:

Վարչապետը նշել է, որ վերլուծություններում այսօր ներկայացվելիք նախնական ցուցանիշները նախատեսվում է այնուհետ համադրել ազգային վիճակագրական ծառայության կողմից հրապարակվող` տարվա ամբողջական ցուցանիշների հետ և ըստ այդմ ճշգրտումներ կատարել:

 

Օրակարգի շրջանակներում փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը, տնտեսական զարգացման և ներդրումների նախարար Սուրեն Կարայանը և ֆինանսների նախարար Վարդան Արամյանը զեկուցել են ՀՀ 2017թ. տնտեսական աճի ընդհանուր նկարագիրը և հիմնական արդյունքները:

 

Հանրապետության Նախագահը կարևորել է տնտեսական և սոցիալական ոլորտների արդյունքների պարբերական վերլուծությունը տնտեսական քաղաքականության մշակման, ճշգրտման և բարելավման համար: Նախագահը խորհրդակցության մասնակիցների ուշադրությունն է հրավիրել տնտեսական աճի ներառականության վրա, շեշտելով, որ տնտեսական աճի արդյունքները պետք է հասանելի լինեն հանրության բոլոր շերտերի և հատկապես՝ սոցիալապես խոցելի խավերի համար: Այս առումով, Սերժ Սարգսյանը կարևորել է առաջիկա տարիներին տնտեսական աճի բարձր տեմպեր ապահովելուն զուգահեռ ժողովրդագրական իր սահմանած ցուցանիշերի համար նպաստավոր պայմաններ ստեղծելու ուղղությամբ հետևողական աշխատանքը:

 

«Վերլուծության հիմքում, անշուշտ, դրված են օպերատիվ տեղեկություններ, որոնք մենք ստացել ենք մեր գերատեսչություններից և մեր միջազգային գործընկերներից: Ակնհայտ է, երբ ազգային վիճակագրական ծառայությունը հրապարակի վերջնական ցուցանիշները, մենք մեր ճշգրտումները, իհարկե, մտցնելու ենք: Վերլուծության կամ, ինչպես սիրում է ասել պարոն վարչապետը, այս վարժության հիմնական նպատակն է, որպեսզի մենք կարողանանք պարզել տնտեսական աճի բաղադրիչները, ինչպես ասում են՝ տնտեսական աճի շարժիչները, առանձնացնել դրանք, քանի որ աճի բաղադրիչներից է կախված, թե մենք ինչպիսի եկամուտներ ենք ունենալու: Եվ, բնականաբար, հաշվի առնելով և՛ եկամուտները, և՛ այդ բաղադրիչների կայունությունը, շարունակականությունը՝ ապագա մեր ծրագրերը կարող են լինել ավելի ստույգ և ավելի իրատեսական:

Ես կարծում եմ, որ մոտակա մի քանի շաբաթների ընթացքում մենք ավարտին կհասցնենք մինչև 2030 թվականը Հայաստանի տնտեսական և սոցիալական զարգացման ռազմավարությունը: Հաշվի առնելով նաև այն հանգամանքը, որ կառավարությունը 2017 թվականին լավ արդյունքների է հասել, չեմ կարծում, որ շեղումները շատ մեծ կլինեն, մենք թերևս կունենանք 7,4-7,7 տոկոսի միջակայքում տնտեսական աճ: Սա, անշուշտ, լավ ցուցանիշ է: Բայց մենք նաև պետք է հաշվի առնենք, որ մեկ տարվա լավ տնտեսական աճը չի կարող ազդեցություն ունենալ մեր հասարակության լայն շրջանակների վրա: Եվս երկու-երեք տարի այսպիսի աճ` ես կարծում եմ, որ սրանով մենք կարող ենք ստեղծել շատ լավ հիմքեր մեր ժողովրդագրական ծրագրերն իրականացնելու համար»,- ասել է Հանրապետության Նախագահը՝ ընդգծելով, որ կառավարությունը 2018թ. տարեսկիզբն էլ տնտեսական լավ ցուցանիշներով է սկսել, սակայն, ըստ նրա, դեռևս չի կարելի ասել, որ Հայաստանը հասել է իր հնարավորությունների սահմանին, քանի դեռ այդ աշխատանքի արդյունքները զգալի չեն դարձել հասարակության բոլոր խավերի համար:

 

Հիշեցնենք, որ ըստ ՀՀ ազգային վիճակագրական ծառայության տվյալների, Հայաստանում տնտեսական ակտիվության աճը 2017-ին կազմել է 7.7%, 2016-ի 0.5% - ի և 2015-ի 3,1%-ի համեմատ: Տնտեսական աճի վերջնական ցուցանիշներն Ազգային վիճակագրական ծառայությունը խոստանում է հրապարակել շուտով, բայց 2017-ի մայիսին, ԱրմԻնֆո-ի հետ բացառիկ հարցազրույցում ՀՀ ֆինանսների նախարար Վարդան Արամյանը հայտարարել էր, որ ՀՀ կառավարությունն ունի տնտեսական աճի շատ ավելի բարձր հավակնություններ, քան ամրագրված է երկրի բյուջեով (3.2 %):

 

Արդեն սեպտեմբերին ՀՀ ֆինանսների նախարարությունը վերանայեց իր ակնկալիքները, մինչև 4.3-4.5%, իսկ դեկտեմբերին, պատասխանելով ԱրմԻնֆո-ի հարցին, նախարարը նշեց, որ տարեվերջին ակնկալվում է 5,5-6% աճ: Ներկայումս, ֆինանսների նախարարությունը, 2017 թվականի արդյունքներով, տնտեսական զարգացման աճն ակնկալում է`6,7-7,4%, տնտեսական զարգացման նախարարությունը`7% կամ ավելի, իսկ Կենտրոնական բանկը`6,4%: Մինչդեռ Հայաստանը 2016 թվականը եզրափակել էր տնտեսական ակտիվության 0.5% աճով, ՀՆԱ-ի աճը կազմել էր ընդամենը 0.2%:  2018 թվականին ՀՆԱ-ի աճը նախատեսվում է`4,5%: