Արմինֆո.Այսօր ՀՀ կառավարության հերթական նիստում վարչապետ Նիկոլ Փաշինյանը, մինչ օրակարգային հարցերի քննարկումը, անդրադարձել է 2021 թվականի առաջին եռամսյակում պետական բյուջեի եկամուտների ցուցանիշներին և արձանագրված աճին:
Կառավարության մամուլիկ ծառֆայույթյան հաղորդման համաձայն, վարչապետը հայտարարել ,է որ պետական բյուջեի եկամուտները, առաջին եռամսյակի տվյալներով, գերակատարվել են՝ ավելի քան 20 մլրդ դրամով, և առևտրի շրջանառությունը, առաջին եռամսյակի տվյալներով, և մարտ ամսվա տվյալը նույնպես առանձին վերցրած, էական աճ է արձանագրել:
Պետական եկամուտների կոմիտեի նախագահ Էդվարդ Հովհաննիսյանը, իր հերթին, նշել է, որ դիտարկվել են ինչպես ամսական, այսինքն՝ մարտ ամսվա տվյալները, այնպես էլ եռամսյակային տվյալները: «Մասնավորապես, առևտրաշրջանառության և կատարված գործարքների մասով մարտ ամսվա ընթացքում, նախորդ տարվա մարտի համեմատ, հսկիչ դրամարկղային մեքենայի կտրոններով և հաշվարկային փաստաթղթերով կատարված գործարքների քանակն ավելի է 8 647 000 հատով, որի գումարային արտահայտության տարբերությունն անցյալ տարվա նկատմամբ կազմում է 122 մլրդ դրամ:
Եռամսյակային կտրվածքով՝ իրացման շրջանառության տարբերությունը կազմում է 116,8 մլրդ դրամ, գործարքների քանակով՝ 6 200 000 հատ: Հարկային եկամուտների հավաքագրումների մասով նշեմ, որ Կառավարության որոշմամբ սահմանված եռամսյակային համամասնությամբ՝ առաջին եռամսյակի համար սահմանված է եղել 305 մլրդ դրամ, փաստացի հավաքագրված հարկային եկամուտները կազմել են 332,9 մլրդ դրամ: Դրական տարբերությունը կազմում է 27,9 մլրդ դրամ: Սակայն հաշվի առնելով, որ 332,9 մլրդ դրամի մեջ ներառված են նաև դրոշմանիշային վճարների գծով մուտքերը, որոնք կազմել են 5,6 մլրդ դրամ և նախատեսելով հետագայում առաջին եռամսյակի պլանի ճշտման հավանական, հնարավոր չափը, որը կկազմի 310,6 մլրդ դրամ, ապա հարկային եկամուտների գերակատարման փաստացի արդյունքը կազմելու է 22,3 մլրդ դրամ», - հաղորդել է նա:
Ֆինանսների նախարարի առաջին տեղակալ Կարեն Բրուտյանն ավելացրել է, որ նշված փաստացի ցուցանիշների հանգամանքից ելնելով՝ նախարարությունը կանխատեսում է, որ հարկային եկամուտների տարեկան ցուցանիշը կգերակատարվի շուրջ 40 մլրդ դրամով, և առաջիկայում 1 տրիլիոն 440 մլրդ դրամը 1 տրիլիոն 480 մլրդ դրամի ավելացման նախագիծ կներկայացվի կառավարության քննարկման:
Նշենք, որ համաձայն 2021 թ. հաստատված պետական բյուջեի, պետական բյուջեի եկամուտներն ընթացիկ տարում ծրագրված են ՀՆԱ-ի 23,6% - ի չափով և կազմում են 1,509.5 մլրդ դրամ, որից հարկային մուտքերը և պետական տուրքերը կազմում են 1,440.1 մլրդ դրամ: Վերջինիս մասնաբաժինը ՀՆԱ-ում կազմում է 22,5 տոկոս ։ ՀՀ 2021 թվականի պետական բյուջեի դեֆիցիտը ծրագրված է ՀՆԱ-ի 5,3 տոկոսի մակարդակում եւ կազմում է 341.4 մլրդ դրամ, որից 138.7 մլրդ դրամը ներքին աղբյուրներն են և 202.7 մլրդ դրամը արտաքին աղբյուրները։ ՀՆԱ-ի 23,6% - ի չափով ՀՀ պետական բյուջեի եկամուտների կանխատեսվող մակարդակի հիման վրա և ՀՆԱ-ի 5,3% - ի չափով դեֆիցիտի ֆինանսավորման հնարավորություններից ելնելով ' ՀՀ կառավարությունը նախատեսում է 2021թ. ապահովել 1.850.9 մլրդ դրամի կամ ՀՆԱ-ի 28,9% - ի չափով ծախսեր: Ընթացիկ ծախսերը կկազմեն 1,634,6 մլրդ դրամ կամ ՀՆԱ-ի 25,6% - ը ։ Ոչ ֆինանսական ակտիվներին առնչվող գործառնությունների ծախսերը կանխատեսվում են 216,3 մլրդ դրամի կամ ՀՆԱ-ի 3,4% - ի մակարդակում: