Ամերիաբանկը սկսել է 10 մլն դոլար ծավալով դոլարային պարտատոմսերի հերթական տրանշի առաջնային տեղաբաշխումը

Արմինֆո.Ամերիաբանկը սեպտեմբերի 7-ին սկսել է 10 մլն դոլար ծավալով դոլարային անվանական, արժեկտրոնային եւ ոչ փաստաթղթային պարտատոմսերի հերթական տրանշի տեղաբաշխումը: Այս մասին նշված է ՀՀ Կենտրոնական բանկի կայքում զետեղված թողարկման ազդագրում, որի համաձայն, թողարկման տեղաբաշխումը նախատեսվում է ավարտել 2022թ. նոյեմբերի 18-ին:

Այդ տրանշի շրջանակներում կթողարկվի 100 հազար պարտատոմս՝ 100 դոլար անվանական արժեքով ։ Արժեկտրոնի եկամտաբերությունը սահմանվել է 3,75%: Արժեկտրոնային վճարումների պարբերականությունը նախատեսված է եռամսյակը մեկ անգամ: Տվյալ տրանշի ամբողջական մարումը նախատեսված է 2025 թվականի սեպտեմբերի 7-ին:

Այդ դոլարային տրանշի պարտատոմսեր ձեռք բերել ցանկացողները կարող են միջոցներ փոխանցել Ամերիաբանկում բացված համապատասխան հաշվեհամարին. 1570043100494501:

Այս տրանշի թողարկման մասին որոշումն ընդունվել է Ամերիաբանկի տնօրենների խորհրդի կողմից 2022թ. փետրվարի 22-ին և բանկի տնօրինության օգոստոսի 31-ի որոշմամբ:

ԱրմԻնֆո-ի պատրաստած  Հայաստանի բանկերի ֆինանսական վարկանիշի 30.06.2022 թ.տվյալներով, Ամերիաբանկը պահպանում է 2-րդ տեղը կորպորատիվ պարտատոմսերի տեղաբաշխումից ներգրավված միջոցների ծավալով' 99 մլրդ դրամ կամ 243.1 մլն դոլար: 2019 - 2022թթ. Բանկն այդ ցուցանիշն  աաաաաավելացրել է 2 անգամ: Բանկային հատվածում այս ցուցանիշի գումարային ծավալից Ամերիաբանկին բաժին է ընկել ավելի քան 26%: Ամերիաբանկը բավականին ակտիվ է Հայաստանի կորպորատիվ պարտատոմսերի շուկայում, 2016թ. մարտից սկսելով իր արժեթղթերի թողարկումը, և նույն թվականին նախաձեռնելով առաջին թողարկումը միջազգային շուկայում' հունիսին իր ներդրումային կառավարչի՝ responsAbility Investments Agընկերության միջոցով հաջողությամբ տեղաբաշխեց 20 մլն դոլարի պարտատոմսեր Լյուքսեմբուրգի 4 ներդրումային հիմնադրամներում: Ամերիաբանկը բազմիցս ճանաչվել է "Արժեթղթերի միջազգային շուկայում դեպոզիտար համակարգի հաշվի Լավագույն օպերատոր":

Հիշեցնենք, որ Ամերիաբանկը, որը գործում է հայկական շուկայում 1996թ. հոկտեմբերի 31-ից, հանդիսանում է ունիվերսալ բանկ, որը տրամադրում է ներդրումային, կորպորատիվ և մանրածախ բանկային ծառայություններ բանկային լուծումների համալիր փաթեթի տեսքով: Ամերիաբանկը առաջատար ֆինանսա-տեխնոլոգիական կազմակերպություն է, որը ներկայանում է նորարարական և թվային միջավայրով ' ֆինանսական և ոչ ֆինանսական ծառայությունները միավորող էկոհամակարգով: Ամերիաբանկն առաջնորդվում է հաճախորդներին կողմնորոշված և բիզնեսի կառավարման պատասխանատու քաղաքականությամբ ' տրամադրելով բարձրորակ ծառայություններ թվային, ժամանակակից և անվտանգ միջավայրում: 2022թ. հուլիսի 1-ի դրությամբ բանկի բաժնետերերն են հանդիսանում Imast Group (CY) Limited (նախկինում Ամերիա Գրուպ (Սի - Ուայ) Լիմիթեդ)՝ 48,9%,  ՎԶԵԲ-ը՝ 17,73%, Ասիական զարգացման բանկը՝ 13,92%, ESPS Holding Limited՝  11,97% եւ Afeyan Foundation for Armenia Inc. - 7,48%: