Արմինֆո. Ռուսական շուկա հայկական կաթնամթերքի արտահանման խնդիրը կկարգավորվի փուլային տարբերակով: Այդ մասին հաղորդում է ՀՀ սննդամթերքի անվտանգության տեսչական մարմինը:
ՍԱՏՄ հաղորդագրության համաձայն, Հայաստանից Ռուսաստան կաթնամթերքի մատակարարումը դադարեցնելուց հետո սկսված բանակցությունները՝ ուղղված սահմանափակման վերացմանը, ապրիլի 17-ին շարունակվել են Մոսկվայում:
ՌԴ Ռոսսելխոզնադզորի ղեկավար Սերգեյ Դանկվերտը և ՀՀ սննդամթերքի անվտանգության տեսչական մարմնի ղեկավար Արմեն Հայրապետյանը քննարկել են կողմերին հուզող խնդիրները՝ կապված Ռուսաստանում շրջանառության թույլտվություն չունեցող իրանական հումքից պատրաստված կաթնամթերքի արտահանման հետ:
Կողմերը երկուստեք դրսևորել են կառուցողական մոտեցում և պայմանավորվել խնդիրը կարգավորել փուլ առ փուլ։ Ըստ այդմ՝ Հայաստանի կաթնամթերք արտադրող ու արտահանող կազմակերպություններին, որոնք աշխատում են միայն տեղական և ՌԴ-ում թույլատրված հումքով, առաջարկում ենք դիմել Սննդամթերքի անվտանգության տեսչական մարմին՝ իրենց ընկերություններում ուսումնասիրություններ և վերահսկողություն իրականացնելու համար: Այն կազմակերպությունները, որոնք կբավարարեն սահմանված պահանջները, կներկայացվեն Ռոսսելխոզնադզորի դիտարկմանը:
Այս գործընթացը հնարավորություն կտա որոշակի ժամանակահատվածում ամբողջությամբ վերականգնել դեպի ռուսական շուկա հայկական կաթնամթերքի արտահանման նախկին ծավալները:
Հիշեցնենք, որ "Ռոսսելխոզնադզորը" դիմել է Հայաստանի անասնաբուժական ծառայությանը ՝ խնդրելով 2023 թվականի ապրիլի 5-ից դադարեցնել կաթնամթերքի սերտիֆիկացումը Ռուսաստան՝ երկրի բոլոր ձեռնարկություններից ։ Գերատեսչությունը նման որոշում է կայացրել ՝ հաշվի առնելով բանակցությունների արդյունքները եւ տեսչության անբավարար արդյունքները։ "Ռոսսելխոզնադզորը" մարտի 28-ին հաղորդել էր, որ Հայաստանում երկու ձեռնարկությունների ստուգման ընթացքում հայտնաբերել է, որ վերջիններս օգտագործել են Իրանի ձեռնարկությունների արտադրած հումքը, որոնց նկատմամբ Ռուսաստանը սահմանափակող միջոցներ է կիրառել: Գերատեսչությունը հայտարարել էր, որ նման արտադրանքը չի կարող մատակարարվել Ռուսաստան, իսկ հայտնաբերված խախտումները վկայում են Հայաստանի իշխանությունների կողմից պատշաճ վերահսկողության բացակայության մասին:
