Ստեղծվող "Երևան համաշխարհային առեւտրի կենտրոն" ՓԲԸ կանոնադրական կապիտալում ֆինանսական միջոցների ներդրման ժամկետները հետաձգվում են 15 օրով

Արմինֆո.Ստեղծվող "Երևան համաշխարհային առևտրի կենտրոն" ՓԲԸ կանոնադրական կապիտալում ֆինանսական միջոցների ներդրման ժամկետները հետաձգվում են 15 օրով: Այդ մասին որոշում է ընդունվել ՀՀ կառավարության օգոստոսի 15-ի նիստում ։

Ինչպես նշվում է որոշման նախագծի հիմնավորման մեջ, սահմանված կարգի համաձայն, պետական գրանցումից հետո ներդրողը պարտավորվում է 75 օրվա ընթացքում կատարել ձեռք բերվող ընկերության բաժնետոմսերի դիմաց վճարումը, որի գնահատված արժեքը կազմում է 4 մլրդ 161 մլն 260 հազար դրամ: Բացի այդ, ընկերությունը պետական գրանցումից հետո պարտավորվում է 75 օրվա ընթացքում 6 մլրդ 788 մլն դրամ կադաստրային արժեքով ձեռք բերել Սարյան 22 շենքի գույքը ' համապատասխան պայմանագիր կնքելով:

Սակայն, ինչպես ընդգծվում է հիմնավորման մեջ, վերոնշյալ գործընթացների իրականացման ընթացքում առաջացել են որոշակի խնդիրներ, և դրանց լուծման համար առաջարկվում է "75" թիվը փոխարինել "89" թվով, ինչը թույլ կտա լրացուցիչ 15 օրվա ընթացքում լուծել առաջացած խնդիրները: Նախագծի իրականացման արդյունքում կներգրավվեն նոր ներդրումներ, կստեղծվեն նոր աշխատատեղեր, կբարձրանա Երևանի գրավչությունը, կբարելավվի գործարար միջավայրը և զբոսաշրջության մակարդակը: Ծրագրի նպատակն է նաև ստեղծել համաշխարհային առևտրի կենտրոնի A դասի ժամանակակից բիզնես էկոհամակարգ ՝ կայուն ենթակառուցվածքներով և ծախսարդյունավետ ռեսուրսներով:

Հիշեցնենք, որ այս տարվա ապրիլի 30-ին ՀՀ էկոնոմիկայի նախարար Գևորգ Պապոյանը և "Ռենշին" ՍՊԸ-ի գլխավոր տնօրեն Էդուարդ Մարությանը պայմանագիր են ստորագրել Երևանում Համաշխարհային առևտրի կենտրոնի կառուցման նախագծի իրականացման վերաբերյալ: Նույն օրը ՀՀ կառավարության, "Ռենշին" ՍՊԸ-ի և "Հայփոստ" ՓԲԸ-ի միջև ստորագրվել է եռակողմ համաձայնագիր, որով ստեղծվելու է "Երևան Համաշխարհային առևտրի կենտրոն"ՓԲԸ-ն: Առևտրի համաշխարհային կենտրոնի կառուցման և "Համաշխարհային առևտրի կենտրոն Երևան" փակ բաժնետիրական ընկերության ստեղծման քաղաքաշինական ծրագրին մասնակցելու մասին որոշումը հաստատվել է գործադիրի 2023 թվականի սեպտեմբերի 7-ի որոշմամբ: Ավելի վաղ հաղորդվել էր, որ ծրագրի իրականացումը պետք է սկսվեր 2024 թվականի հունվարի 1-ից, իսկ ավարտը ՝ 2028 թվականի դեկտեմբերի 31-ին: