Երկուշաբթի, 29 Մարտի 2010 16:28
Նոր բաժնետերը մտադիր է ՙԱնելիք Բանկ՚-ն առաջատարների շարք դուրս բերել
ԱրմԻնֆո. ՙԱնելիք Բանկը՚ նոր ՙշունչ՚ ստացավ այն բանից հետո, երբ անցյալ տարի բանկի բաժնետոմսերի 51% փաթեթը գնվեց լիբանանյան CreditBank-ի կողմից: Բանկը, որի կանոնադրական կապիտալը հասցվեց 14.3 մլրդ.դրամի, սկսել է աստիճանաբար ընդգրկվել մայր բանկի ընդհանուր ռազմավարության մեջ, իհարկե, ելնելով հայկական շուկայի առանձնահատկություններից: Անելիքի և նրա լիբանանյան բաժնետիրոջ միջև իդենտիֆիկացիոն գործընթացը դեռ չի ավարտվել, կարևորագույն բոլոր միջոցառումները դեռևս առջևում են, սակայն, նոր բաժնետերը բանկի դիրքերը շուկայում բարձրացնելու նկատմամբ ամենայն լրջորեն է տրամադրված: ԱրմԻնֆո գործակալությանը տրված իր հարցազրույցում CreditBank-ի գլխավոր տնօրենի տեղակալ Ռուդոլֆ Աթալլան ներկայացրել է ՙԱնելիք Բանկի՚ զարգացման առաջիկա ծրագրերը:
Պրն.Աթալլա, հայտնի է, որ ներկայումս ՙԱնելիք Բանկում՚ տեղի են ունենում միանգամից երեք կառույցների հետ կապված իդենտիֆիկացիոն աշխատանքներ` ՙԱնելիք Բանկ՚-ի, ռուսական ՙԱնելիք ՌՈՒ՚-ի և CreditBank-ի: Ո՞ր փուլում է գտնվում այդ գործընթացը և ինչքանո՞վ կբարձրանա բանկի գործունեության արդյունավետությունը նշված աշխատանքներն ավարտելուց հետո:
Նախ կուզենայի նշել, որ 1943 թվականին Լիբանանի անկախության հռչակումից և 1964 թվականին Լիբանանի Բանկի ստեղծումից հետո Լիբանանի բանկային համակարգը ծաղկում ապրեց, իսկ լիբանանցիները. չնայած 15-ամյա քաղաքացիական պատերազմին և 1958 թվականի դեպքերի ծանր հետևանքներին, լիիրավորեն համարվում են բանկային արդյունեբերության պիոներները արաբական երկրների մեջ:
Վերադառնալով Ձեր հարցին կուզենայի ասել, որ ներկայումս CreditBank-ն իր ցուցանիշներով գտնվում է Լիբանանի 65 բանկերից 20 առաջատարների կազմում: Վերջին 4-5 տարիներին բանկի կատարողականությունը գերազանց է, իսկ թրեյդ-բանկինգի գծով մենք Լիբանանի առաջատար բանկերի կազմում ենք: Մեր բանկը հիմնվել է 1981 թվականին, որպես ընտանեկան բիզնես (ՙCredit Bancaire’’), այնուհետև բանկը ձեռք բերեց ՙCredit Lyonnais Liban՚-ը (ֆրանսիական ՙCredit Lyonnais՚ հանրահայտ բանկի լիբանանյան մասնաճյուղը) և արդյունքում, վերանվանվեց CreditBank-ի: Ներկայումս բանկի աշխատակիցների թիվը հասնում է 300-ի, մասնաճյուղերի թիվը` 16-ի: Ամբողջ աշխարհով ունենք թղթակցային հաշիվների լայն ցանց և հաճախորդներ Մերձավոր Արևելքի բոլոր երկրներից:
Հայկական շուկա մեր մուտքը հիմնականում պայմանավորված է Հայաստանի նկատմամբ մեր ունեցած մեծ հետաքրքրությամբ, քանի որ Լիբանանում մոտ 400 հազար հայ է ապրում, որոնց մտածելակերպը շատ նման է մերին: Եվ ՙԱնելիք Բանկի՚ վերահսկիչ փաթեթի ձեռքբերումը CreditBank-ի միջազգային ներկայության զարգացման կարևորագույն քայլերից մեկն եմ համարում: Ներկայումս մեր առջև մի շարք կարևոր խնդիրներ են դրված ՙԱնելիք Բանկի՚ հետագա ուժեղացման ուղղությամբ: Պետք է նկատի ունենալ, որ մեր մասնակցությունը բանկի կապիտալին ենթադրում է ոչ միայն դրա համալրում, այլ նաև Նոու-հաու-ի ներդրում: Հետևաբար, մեր մասնակցությունը բանկի կապիտալին բացառում է այն փաստը, որ բանկը կշարունակի մնալ շուկայի միջակ բանկերի շարքում: Մեր նպատակը առաջատար դառնալն է` նոր պրոդուկտների ստեղծման և նոր մոտեցումների ներդրման միջոցով:
Չնայած, որ երկու կառույցների իդենտիֆիկացիոն գործընթացները երկար ժամանակ են պահանջում, այնուամենայնիվ, այսօր մենք կարող ենք վստահությամբ ասել, որ ՙԱնելիք Բանկը՚ և CreditBank-ը ներկայացնում են մի միասնական ՙկարկաս՚, մի մարմին: Մենք արդեն ձեռք ենք բերել Երևանի կենտրոնում (Վարդանանց 13) գտնվող նոր շենքը, որտեղ սկսել ենք կապիտալ վերանորոգումը, որը այն կավարտենք տարեվերջին: Ընդ որում, շենքի ներսի մասն ամբողջովին կփոխվի, այսպես ասած, կրկին կվերակառուցվի, իսկ արտաքին տեսքը կպահպանվի հին հայկական ոճով: Բացի այդ, մենք սկսել ենք բանկում ստեղծել և զարգացնել մի նոր կառույց, որտեղ աշխատանքները բաժանված կլինեն մի շարք նոր կառույցների միջև: Ամենակարևորագույն քայլերից կլինի նաև նոր ՏՏ-համակարգի ներդրումը:
Ինչպիսի՞ն է Ձեր կողմից ներկայացված նախագծերին ներդրումների չափերը: Եվ ի՞նչ է նախատեսվում կատարել հատկապես ՏՏ ոլորտում:
ՙԱնելիք բանկի՚ վերանորոգման և կահավորման հետ կապված մենք առանձին հաշվարկներ չենք կատարում: Սակայն հաստատում եմ, որ խոսքը գնում է մի-քանի միլիոն դոլարի մասին, որոնք կուղղվեն ՙկրեատիվ՚ լուծումներին, չէ՞ որ բանկի վերջնական արդյունքները կախված կլինեն նրանից, թե ինչքան ուժեղ է ՏՏ-համակարգը: Երկու տարում նախատեսվում է ամբողջովին նորացնել ՏՏ-համակարգը` նորագույն տեխնոլոգիաներին համապատասխան: Դա մեզ համար շատ կարևոր է Լիբանանի և Հայաստանի միջև կոմունիկացիաների տեսանկյունից, քանի որ արդյունավետ և օպերատիվ գործունեության համար պետք է ստեղծվեն այնպիսի պայմաններ, երբ CreditBank-ը և ՙԱնելիք Բանկ՚-ը, գտնվելով տարբեր երկրներում, կարող են իրենց զգալ ինչպես մեկ շենքում: Ներկայումս ՏՏ-մասնագետները մշակում են նախագիծը և գնահատում ներդրումների անհրաժեշտ ծավալները: Դժվարություններ կան նաև կապված լեզվական խոչնդոտների հետ, քանի որ ՙԱնելիք Բանկ՚-ում գործող համակարգը ներկայացված է միայն հայերեն և ռուսերեն լեզուներով:
Կվերանայվի՞ արդյոք բանկի վարկային քաղաքականությունը: Հայտնի է, որ ՙԱնելիք Բանկն՚ ու CreditBank-ը մտադիր էին Հայաստանում սկսել խոշոր ծրագրերի համաֆինանսավորման համատեղ նախագծեր: Ի՞նչ վիճակում է այժմ այդ ծրագիրը:
Մենք չենք պատրաստվում փոխել բանկի դեմքը կամ վարկային քաղաքականությունը, քանի որ բանկի փորձառու, գործող, գործադիր մարմինն ավելի շատ է իրազեկված հայկական շուկայի պահանջներին ու առանձնահատկություններին: Մենք մեր ուժերը կկիրառենք գործող քաղաքականությունը կատարելագործելուն, պարզեցնելով շփումները հաճախորդների հետ:
Ինչ վերաբերում է համաֆինանսավորման նախագծին, ապա այն արդեն գործարկման մեջ է, տեսականորեն բոլոր գործիքներն էլ պատրաստ են և ներկայումս ՙԱնելիք Բանկի՚ մեր գործընկերներից սպասում ենք հայտերի-առաջարկությունների: Ընդ որում, օրերս մենք առաջին նախագիծը քննարկեցինք Երևանում, հավաքեցինք անհրաժեշտ բոլոր փաստաթղթերը, և Լիբանանում դրանք հաստատելուց հետո վարկը կտրամադրվի: Հետագայում, նորագույն ՏՏ-համակարգի ներդրումից հետո, վարկի տրամադրման վերաբերյալ որոշումները կընդունվեն ավելի արագ: Ծրագրերի վարկավորման առավելագույն ծավալների մասին խոսելն առայժմ իմաստ չունի, քանի որ չափերի գծով սահմանափակումներ չեն սահմանվելու, մենք միայն տալու ենք յուրաքանչյուր նախագծի հետ կապված մեր գնահատականը: Իսկ ռիսկերը հավասարաչափ կերպով կբաշխվեն CreditBank-ի և ՙԱնելիք Բանկի՚ միջև:
Ներկայումս շարունակվում է ՙԱնելիք Բանկի՚ լոկոմոտիվը մնալ դրամական փոխանցումների Anelik համակարգը: Լիբանանի ԿԲ CreditBank-ին թույլ տվե՞լ է արդյոք նշված համակարգում գործել: Ձեր գնահատականներով, ինչքանով այդ համակարգը պահանջարկ կունենա Մերձավոր Արևելքում:
Ի տարբերություն հայկական բանկերի, լիբանանյան բանկերը վճարային համակարգներում գործելու համար Կենտրոնական բանկի հատուկ թույլտվության կարիքը չունեն և կարող են ազատ աշխատել ցանկացած համակարգի հետ:
CreditBank-ն առայժմ ձեռնամուխ չի եղել Anelik համակարգում գործելուն, սակայն, առաջիկա ամիսներին այդ գործընթացը կսկսվի: Ներկայումս մենք քննարկում ենք Anelik համակարգի բոլոր հնարավորությոնները, որպեսզի այն կիրառենք ոչ միայն CreditBank-ում, այլ նաև այն առաջարկենք արաբական մյուս բանկերին: Ելնելով այն հանգամանքից, որ այդ համակարգի մեկնարկային երկիրն է հանդիսանում Ռուսաստանը, ՙԱնելիք ՌՈՒ՚-ի մեր գործընկերները, մասնավորապես, Գալինա Վորոնինան, կժամանեն Լիբանան և կկազմակերպեն Anelik համակարգի հատուկ շնորհանդեսներ: Հաշվի առնելով այն, որ մենք արդեն բանակցում ենք մի շարք լիբանանյան բանկերի հետ, կարելի է հույս հայտնել, որ շուտով առնվազն 10 լիբանանյան բանկ կներգրավվի Anelik համակարգին:
Արաբական աշխարհի բնակչությանը նրանց համար նոր համակարգի մեջ ներգրավելու համար որոշակի ժամանակ կպահանջվի: Մենք պետք է մարդկանց սովորեցնենք այդ համակարգից օգտվել, բացատրել դրա առավելությունները Լիբանանում գործող մյուս համակարգերի նկատմամբ: Այդ իմաստով Anelik-ը շուկայում ունի լուրջ և խոշոր մրցակիցներ, մասնավորապես, ի դեմս Western Union և MoneyGram համակարգերի: Սակայն, քանի որ Western Union-ը Հայաստանում ներկայացված չէ, դա մեզ լրացուցիչ մրցակցային առավելություններ է տալիս: Բացի այդ, եթե տարբեր համակարգերի հետ աշխատելիս CreditBank-ը երաշխիքներ չի տրամադրում և չի նվազեցնում տոկոսադրույքները, ապա, Anelik-ի ծառայություններից օգտվելիս, հաճախորդին կտրամադրվի անվտանգության և հուսալիության ամբողջական երաշխիքներ, ինչպես նաև կառաջարկվեն ամենամրցունակ տոկոսադրույքները:
Հարցազրույցը վարեց Լիլիթ Ասլանյանը
ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները