Հինգշաբթի, 12 Սեպտեմբերի 2013 19:14

Սեպտեմբերի 12-14-ը Հայաստանում տեղի կունենա Կենտրոնական Ասիայի, Սևծովյան տարածաշրջանի և Բալկանյան երկրների կենտրոնական/ազգային բանկերի կառավարիչների ակումբի 30-րդ հանդիպումը

ԱրմԻնֆո. Սեպտեմբերի 12-14-ը Հայաստանում տեղի կունենա Կենտրոնական Ասիայի, Սևծովյան տարածաշրջանի և Բալկանյան երկրների կենտրոնական/ազգային բանկերի կառավարիչների ակումբի 30-րդ հանդիպումը, որն անցկացվում է ՀՀ դրամի 20-ամյա հոբելյանին նվիրված միջոցառումների շրջանակում: Ինչպես ԱրմԻնֆո գործակալության տեղեկացվել է ՀՀ ԿԲ մամուլի ծառայությունից, կառավարիչների ակումբի 22 անդամ-երկրներից հանդիպմանը ներկա է գտնվելու 18 երկրի պատվիրակություն, այդ թվումª 12 կառավարիչ:

Աղբյուրի համաձայն, կառավարիչների ակումբի հայաստանյան հանդիպմանը հրավիրված են ֆինանսական աշխարհում հայտնի փորձագետներ: Հանդիպման գլխավոր զեկուցողն է Միջազգային հաշվարկների բանկի Ֆինանսական կայունության ինստիտուտի նախագահ, Չեխիայի Հանրապետության նախկին վարչապետ Ջոզեֆ Տոսովսկին: Զեկուցողների թվում են նաև ԱՄՆ ՙլոբալ Սուվերեն Ըդվայզրս՚ ընկերության ավագ գործընկեր, միջազգային ֆինանսական աշխարհում համբավ վայելող վերլուծաբան Բորիս Բորոզանը, Սերբիայի ազգային բանկի նախկին կառավարիչ և «Էրստե Բանկե-ի ներկայիս գործադիր տնօրեն և նախագահ Ռադովան Ժելաշիչը, ինչպես նաև Խորվաթիայի ազգային բանկի կառավարչի տեղակալ Մայքլ Ֆոլենդը: Հանդիպումն անցկացվում է «Անցած ճգնաժամից սերտած դասեր. մարտահրավերները հաղթահարելու նոր մոտեցումներ և գործիքներե խորագրի ներքո և ունի բավականին հագեցած օրակարգ:

Զեկուցողների ելույթները հիմնականում վերաբերում են ֆինանսական աշխարհում արդիական խնդիրներին: Ջոզեֆ Տոսովսկին ներկայացնելու է ՙՆորմատիվային նոր գլոբալ բանկային համակարգ՚ զեկույցը, իսկ Ռադովան Ժելաշիչըª արտարժույթով վարկավորելու հունգարական փորձը: Անդրադարձ կկատարվի նաև ՙՀամաշխարհային տնտեսության և հիմնական ֆինանսական շուկաների հեռանկարներՙ թեմային, որը կներկայացնի Բորիս Բորոզանը:

Կառավարիչների ակումբի հանդիպումը տեղի կունենա ՀՀ կենտրոնական բանկի Դիլիջանի ուսումնահետազոտական նորաբաց կենտրոնում, որտեղ ստեղծված են բոլոր պայմանները նման բարձրաստիճան հանդիպումներ, ինչպես նաև այլ ձևաչափերի սեմինարներ, կոնֆերանսներ անցկացնելու համար:

Ակումբի ստեղծման հիմնական նպատակներից է Կենտրոնական Ասիայի, Սևծովյան տարածաշրջանի և Բալկանյան երկրների հարաբերությունների ամրապնդումը, ինչպես նաև նշված երկրների կենտրոնական/ազգային բանկերի միջև գործակցության ընդլայնումը և խորացումը: Այս ամենն իր հերթին կնպաստի Հայաստանում դրամավարկային քաղաքականության արդյունավետ համակարգմանը, ֆինանսական կայունության հաստատմանն ու տնտեսական մթնոլորտի բարելավմանը:

Նշենք, որ կարևորելով դրամավարկային, ֆինանսական և բանկային ինստիտուտների դերը ֆինանսական կայունության ապահովման և տնտեսությունների արագ զարգացման, ինչպես նաև Կենտրոնական Ասիայի, Սևծովյան տարածաշրջանի և Բալկանյան երկրների միջև անդամ պետությունների փոխշահավետ գործակցության բարելավման գործում, 1997 թ-ին Կենտրոնական Ասիայի, Սևծովյան տարածաշրջանի և Բալկանյան երկրների կենտրոնական/ազգային բանկերի կառավարիչների առաջին հանդիպմանը որոշվեց հիմնել Կենտրոնական բանկերի կառավարիչների ակումբը:

Ակումբի ստեղծումը ամրագրվել է Արձանագրությամբ և ստորագրվել 1998 թ. մայիսի 1-ինª 14 մասնակից կենտրոնական/ազգային բանկերի կառավարիչների կողմից: Հետագայում Ակումբը համալրվել է նոր անդամներով, մասնակիցների ընդհանուր թիվը դարձել 20: 2010 թ-ին Ակումբին անդամակցեց նաև Չինաստանի ժողովրդական բանկը և Արձանագրությունը թարմացվեց նոր անդամների ստորագրություններով: Ակումբի գործունեությունը և ձևաչափը արդյունավետ է և զարգանալու, ընդլայնման միտում ունի:

Ներկայումս Ակումբի անդամներն են` Ալբանիայի կենտրոնական բանկը, Հայաստանի Հանրապետության կենտրոնական բանկը, Ադրբեջանի կենտրոնական բանկը, Հունաստանի կենտրոնական բանկը, Ղրղզստանի կենտրոնական բանկը, Մակեդոնիայի ազգային բանկը, Մոլդովայի ազգային բանկը, Բուլղարիայի ազգային բանկը, Բոսնիայի և Հերցեգովինայի կենտրոնական բանկը, Ղազախստանի ազգային բանկը, Մոնտենեգրոյի կենտրոնական բանկը, Լեհաստանի ազգային բանկը, Ռուսաստանի կենտրոնական բանկը, Սերբիայի ազգային բանկը, Տաջիկստանի ազգային բանկը, Ուկրաինայի ազգային բանկը, Իսրայելի կենտրոնական բանկը, Ռումինիայի ազգային բանկը, Չինաստանի ժողովրդական բանկը, Վրաստանի ազգային բանկը, Թուրքիայի կենտրոնական բանկը, Չեխիայի ազգային բանկը:

Ակումբի ստեղծման նպատակներն են` ամրապնդել Կենտրոնական Ասիայի, Սևծովյան տարածաշրջանի և Բալկանյան երկրների հարաբերությունները, ընդլայնել և խորացնել գործակցությունը, ավելի արդյունավետ համակարգել դրամավարկային քաղաքականության, ֆինանսական և բանկային ոլորտների առկա խնդիրները, ապահովել տնտեսական և ֆինանսական հավաստի տվյալների և տեղեկատվության հոսքերի արագ փոխանակում:

Ակումբի գործառույթներն են` նպաստել ակումբի անդամների միջև դրամավարկային, ֆինանսական և բանկային հարցերի վերաբերյալ կարծիքների փոխանակմանը, դասընթացների և այլ ուսուցողական ծրագրերի կազմակերպում, տեխնիկական աջակցություն և խորհրդատվական ծառայության տրամադրում:

Ակումբն ունի Կառավարիչների Ասամբլեա և քարտուղարություն, որը կազմված է կենտրոնական բանկերի կառավարիչներից, նախագահներից կամ նրանց տեղակալներից: Ասամբլեայի անդամներից է ընտրվում Ակումբի նախագահը և նախագահի տեղակալը, որոնք պաշտոնավարում են երկու տարի: Կառավարիչների Ասամբլեան հրավիրվում է տարեկան երկու անգամ, նիստերը կոչվում են ՙԱկումբի Կառավարիչների կանոնավոր նիստեր՚: Յուրաքանչյուր նիստին որոշվում է հաջորդ նիստի ժամկետը, վայրը և նախնական ծրագիրը: 1998թ. ի վեր նիստերը անց են կացվել Ակումբի անդամ երկրներում` համաձայն Ակումբի անդամների կողմից ընդունված որոշումների:

Ակումբի նիստերին ընդունված է հրավիրել տնտեսագիտության և ֆինանսական ոլորտում համաշխարհային ճանաչում ունեցող գիտնականների, նոբելյան մրցանակակիրների կամ նախկինում կենտրոնական/ազգային բանկերի, միջազգային հեղինակավոր ֆինանսական կազմակերպությունների ղեկավարների, Ակումբի ոչ անդամ պետությունների կենտրոնական/ազգային բանկերի կառավարիչների:

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.56	0.06
USD	383.47	0.72
EUR	449.96	2.75
GBP	519.91	2.59
CAD	277.17	1.47
JPY	25.95	0.08
CNY	53.85	0.12
CHF	481.44	2.76

Նորություններ