Երեքշաբթի, 10 Հունիսի 2014 17:16
Երևանցիները կրճատել են արագ սպառման ապրանքների ծախսերը` խոշոր ռիթեյլերները բացակայում են
ԱրմԻնֆո. «Ամերիա» խորհրդատվական ընկերությունը ներկայացրել է ՀՀ մանրածախ առևտրի, մասնավորապես արագ սպառման ապրանքների առևտրի ոլորտի երկրորդ համապարփակ ուսումնասիրության արդյունքները: Ինչպես ԱրմԻնֆո գործակալությանը տեղեկացվել է Ընկերության մամուլի ծառայությունից, հետազոտության զեկույցը ներկայացնում է ինչպես 2014 թվականին իրականացված ուսումնասիրության արդյունքները, այնպես էլ համադրումներ է կատարում 2012 թվականին իրականացված առաջին ուսումնասիրության արդյունքների հետՀամադրումը հնարավորություն է ընձեռում ներկայացնել տվյալ ոլորտի վերջին տարիների զարգացումները, շուկայի հիմնական մասնակիցների (սուպերմարկետների) հակիրճ վերլուծությունը, շուկայի զարգացման հիմնական միտումները:
Հետազոտությունը կազմված է ինչպես առաջնային, այնպես էլ երկրորդային տվյալների հիման վրա: Այս հետազոտության շրջանակում իրականացվել է հարցում Երևանում` 1,000 մասնակիցների շրջանում:
«եթե հաշվի առնենք ինֆլյացիան, ապա արագ սպառման ապրանքների շուկայի ծավալը կրճատվել է 16%, ինչը զգալի ցուցանիշ է: Գազի և էլեկտրաէներգիայի ծառայությունների դիմաց վճարումների տեսակարար կշռի աճը և արագ սպառման առարկաների ծախսերի կրճատումը, անփոփոխ եկամուտների պայմաններում, վկայում է այն մասին, որ մայրաքաղաքում աղքատությունը խորանում է»,-ԱրմԻնֆո գործակալության հետ զրույցում նմշել է «Ամերիա» ընկերությունների խմբի զարգացման գծով տնօրեն Տիգրան Ջրբաշյանը:
Նա նշել է, որ ուսումնասիրության արդյունքները միտված են հնարավորություն ընձեռել բոլոր շահագրգիռ անձանց գնահատել շուկայի միտումները, տվյալ ոլորտի առաջարկի և պահանջարկի առանձնահատկությունները, շուկայի հիմնական մասնակիցներին, նրանց ուժեղ ու թույլ կողմերը, շուկայում առկա հնարավորությունները:
Համաձայն ուսումնասիրության Երևանում արագ սպառման ապրանքների (ԱՍԱ) շուկայի ծավալը 2 տարվա ընթացքում կրճատվել է մոտ 4%-ով (իսկ ԱՄՆ դոլարով արտահայտվելու դեպքում՝ 6%), ինչը պայմանավորված է բնակչության ԱՍԱ ծախսերի կրճատմամբ, որն էլ իր հերթին բացատրվում է ընդհանուր եկամուտների չաճելու պարագայում այլ ծախսերի առաջնահերթությամբ: Մասնավորապես, 2013թ. կեսից զգալիորեն աճել են գազի և էլեկտրաէներգիայի սակագները:
Ուշագրավ է նաև, որ առավել բարձր եկամտային խմբի տնային տնտեսությունները հիմնականում չեն կրճատել ԱՍԱ ծախսերը, ի տարբերություն ավելի ցածր եկամտային խմբերի: Հաշվի առնելով նաև, մակրոտնտեսական տվյալներով բնակչության եկամուտների և ծախսերի որոշակի աճը, կարելի է փաստել, որ Երևանում շարունակվում է բնակչության բևեռացման մեծացումը: Միջինում 1 տնային տնտեսության ԱՍԱ ամսական ծախսերը 2014թ. գնահատվում են 144 հազար ՀՀ դրամ:
Բնակչության ԱՍԱ ծախսերի կրճատումը, ինչպես նաև 2012թ. ամենամեծ սուպերմարքեթների ցանցի՝ «Սթար»-ի գործունեության դադարեցումը հանգեցրեցին նրան, որ սուպերմարքեթների և հիպերմարքեթների կշիռը նվազեց Երևանի ընդհանուր ԱՍԱ շուկայում՝ 52%-ից 47%-ի: Փոխարենն աճել է մեծ մթերային և փոքր խանութների դերը այդ շուկայում:
Համաձայն հետազոտության կանայք ավելի ակտիվ գնորդներ են, քան տղամարդիկ: Գնորդների կառուցվածքում կանանց կշիռն ավելի քան 2 անգամ գերազանցում է տղամարդկանցը: Առավել ակտիվ խումբը գնորդների կառուցվածքում 46-55 տարեկան կանայք են՝ ընդհանուրի 15%-ը:
Այս շուկայում գլոբալ զարգացման միջին և երկարատև ժամանակահատվածի միտումները (այդ թվում նաև համադրելի երկրներում) վկայում են, որ սուպերմարքեթների և հիպերմարքեթների զարգացումն ավելի մեծ պոտենցիալ ունի: Ուստի, այս շուկայում սպասվում է մրցակցության սրացում, հատկապես, հաշվի առնելով «Քարֆուր»-ի սպասվելիք մուտքը շուկա: Առավել հավանական է, որ «Քարֆուր»-ի մուտքը հատկապես կսրի մրցակցային իրավիճակը տեսականու և սպասարկման որակի առաջատար սուպերմարքեթների համար: Հետազոտողները եզրակացնում են, որ «Քարֆուր»-ի մի քանի խանութի առկայության դեպքում կթեժանա մրցակցությունը նաև գին-որակ համադրությամբ առաջատար սուպերմարքեթների և մթերային ու փոքր խանութների համար:
Հետազոտության արդյունքներն առավել մանրամասնությամբ կներկայացվեն սույն թվականի հունիսի 10-ին նախատեսվող շնորհանդեսի ժամանակ, որին կմասնակցեն ոլորտի շահագրգիռ կողմերը, միջազգային կազմակերպությունների ներկայացուցիչներ, փորձագետներ և այլ մասնակիցներ: Հետազոտության ամբողջական տարբերակին կարելի է ծանոթանալ նաև այն պատվիրելով ընկերության կայքի միջոցով կամ զանգահարելով (010) 56 11 11 հեռախոսահամարով:
Ամերիան Հայաստանում խորհրդատվական առաջատար կազմակերպություն է: Ամերիան լայնածավալ աշխատանքներ է իրականացնում կորպորատիվ վերակազմավորման, միաձուլումների և ձեռքբերումների, իրավաբանական խորհրդատվության, ուղղակի և պորտֆելային ներդրումների, բիզնեսի պլանավորման, ռազմավարական և հարկային պլանավորման, ֆինանսական խորհրդատվության, պետական կառավարման ու բարեփոխումների և այլ ոլորտներում: Հանդիսանալով «Ամերիա» խմբի մաս` Ամերիան տրամադրում է անկախ, կոնֆիդենցիալ և անկողմնակալ խորհրդատվական ծառայություններ միմյանց հետ ներդաշնակորեն և արդյունավետորեն կապված հինգ խորհրդատվական ուղղություններով` գործարար խորհրդատվություն, ֆինանսական խորհրդատվություն, հաշվապահական և հարկային խորհրդատվություն, իրավաբանական և ներդրումային խորհրդատվություն:
TUMO և Astana Hub. դու՝ ինձ, ես՝ քեզ
Փորձագետ․ Հայաստանում էլեկտրաէներգիայի սակագների զսպումը կրում է խիստ ժամանակավոր բնույթ
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները