Հայաստանի բանկային համակարգի վարկային պորտֆելում ժամկետանց վարկերի մասնաբաժինը հասել է 2%-ի, տարեկան աճը` 45%

Հայաստանի բանկային համակարգի վարկային պորտֆելում ժամկետանց վարկերի մասնաբաժինը տարեկան կտրվածքով աճել է 45%, 2015 թվականի մայիսի 1-ին հասնելով 40.2 մլրդ դրամի կամ ընդհանուր վարկային պորտֆելի 2%-ին: Ըստ ՀՀ Ազգային վիճակագրական ծառայության տվյալների, այս ցուցանիշի աճն ապրիլին կազմել է 8.2%:

Միևնույն ժամանակ, երկարաձգված վարկերի մասնաբաժինը բանկային վարկավորման ընդհանուր ծավալներում կազմել է 6% կամ 125 մլրդ դրամ, ապրիլին կրճատվելով 4.4%, իսկ տարեկան կտրվածքով աճելով 23.4%:

Ժամկետանց վարկերի պորտֆելում կարճաժմկետ վարկերը կազմել են 66.1%, իսկ մնացած 33.9% -ը կազմել են երկարաժամկետ վարկերը, բացարձակ մեծությամբ համապատասխանաբար կազմելով` 26.6 մլրդ դրամ և 13.6 մլրդ.դրամ: Երկարաձգված վարկերում պատկերը հակառակն է: Այստեղ գերակշռում են երկարաժամկետ վարկերը` 68.3% կամ 85,4 մլրդ դրամ, մինչդեռ, կարճաժամկետ վարկերի մասնաբաժինը կազմել է 31.7% կամ 39.6 մլրդ դրամ:

Հայաստանի բանկային համակարգի վարկային ներդրումների ընդհանուր ծավալը տարեկան կտրվածքով աճել է 12.8%, իսկ ապրիլին` 0,8%, 2015 թվականի մայիսի 1-ին կազմելով 2.077 տրլն.դրամ: Բանկերի վարկային պորտֆելի կառուցվածքում (առանց երկարաձգված և ժամկետանց վարկերի) երկարաժամկետ վարկերը կազմել են 84.2%, իսկ կարճաժամկետ վարկերը` 15.8%:

ՀՀ դրամի հաշվարկային փոխարժեքը դոլարի նկատմամբ 30.04.2015թ.դրությամբ կազմել է 476,42 դրամ/դոլար: