Էներգետիկայի նախարար. Հայաստան դեպի Եվրոպա գազատարի կառուցման նախագծին մասնակցելու հրավեր չի ստացել Իրանից

Արմինֆո. Հայաստան դեպի Եվրոպա գազատարի կառուցման նախագծին մասնակցելու հրավեր չի ստացել Իրանից:

Այդ մասին Երևանում հայ-իրանական առևտրատնտեսական համագործակցության միջկառավարական հանձնաժողովի 13-րդ նիստի շրջանակներում հայտարարել է ՀՀ էներգետիկայի և բնական պաշարների նախարար Երվանդ Զախարյանը՝ պատասխանելով ԱրմԻնֆո-ի հարցին: Նրա խոսքով, այդ նախագիծը միջկառավարական հանձնաժողովի նիստի ընթացքում չի քննարկվի: ՙՀենց որ համապատասխան հրավեր ստանանք, անմիջապես կիրազեկենք այդ մասին հասարակայնությանը՚,- նշել է նախարարը:

Նշենք, որ ավելի վաղ իր հարցազրույցներից մեկում Երևանում ԻԻՀ՝

այժմ արդեն նախկին դեսպան Մոհամադ Ռեիսին նշել էր, որ եթե Եվրոպա իրանական գազի մատակարարումների շուրջ քննարկումներ սկսվեն, որպես կարճ, անվտանգ և տնտեսապես շահավետ երթուղի կարող է դիտարկվել Հայաստանի տարածքը:

Ընթացիկ տարվա ապրիլին Իրանի ազգային գազի ընկերության արտաքին կապերի հարցերով տնօրեն Ազիզոլահ Ռամազանին հայտարարել էր, որ Իրանը Հայաստանին տարանցիկ երկիր է դիտարկում՝ Իրան-Հայաստան-Վրաստան-Սև ծով երթուղով

Նման նախագծի արժեքը տատանվում է 7-8 մլրդ դոլար, սակայն ծրագրի արժեքը չի կանգնեցնում ԻԻՀ-ին, քանի որ խոսքը կարող է վերաբերել եվրոպացի սպառողներին տարեկան մինչև 30 մլրդ խմ գազի մատակարարումներին:

Այնուամենայնիվ, Հայաստանով գազատարի երթուղին առայժմ հնարավոր տարբերակներից մեկն է համարվում: Միջազգային պրակտիկան վկայում է, որ տարանցման երկիրն ստանում է արտահանվող երկնագույն վառելիքի ամբողջ ծավալի 10%-ը, իսկ դա ոչ ավել, ոչ պակաս 3 մլրդ խմ անվճար գազ է: Համեմատության համար՝ այսօր Հայաստանը Ռուսաստանի Դաշնությունից ստանում է 2,5 մլրդ խմ՝ գումարած 300-450 մլն խմ Իրանից՝ էլեկտրաէներգիայի փոխարեն: