Հինգերորդ տարին անընդմեջ ԱՐԱՐԱՏԲԱՆԿը ՎԶԵԲ կողմից արժանանում է «2015 թվականի ամենաակտիվ թողարկող բանկը Հայաստանում» մրացնակին

Արմինֆո. Վերակառուցման և զարգացման եվրոպական բանկի (ՎԶԵԲ) կողմից ԱՐԱՐԱՏԲԱՆԿ ԲԲԸ-ն Միջազգային առևտրի խթանման ծրագրի (TFP) շրջանակում հինգերորդ տարին անընդմեջ ճանաչվել է «2015 թվականի ամենաակտիվ թողարկող բանկը Հայաստանում»: 

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, Լոնդոնում  ՎԶԵԲ-ի հերթական տարեկան ընդհանուր ժողովի  ժամանակ մրցանակը  ՎԶԵԲ-ի ֆինանսական հաստատությունների գծով գործադիր տնօրեն Նիք Թեսեյմանը  հանձնել է ԱՐԱՐԱՏԲԱՆԿ ԲԲԸ-ի պատվիրակությանը, որը գլխավորել է  բանկի վարչության նախագահ   Աշոտ Օսիպյանը:

Աղբյուրի համաձայն, Աշոտ Օսիպյանը, կարևորելով Վերակառուցման և  զարգացման եվրոպական բանկի հետ  երկարաժամկետ համագործակցությունը, նշել է, որ բանկային ծառայությունների շուկայի բարձր մրցակցության պայմաններում նման ձեռքբերումը վկայում է, որ բանկը զարգանում է ճիշտ ուղղությամբ, և բանկի մատուցած ծառայությունները համապատասխանում են նաև համաշխարհային բարձր վարկանիշ ունեցող ՎԶԵԲ-ի պահանջներին:

Դեռևս 2007 թ.-ից ՎԶԵԲ-ի հետ մեկնարկած համագործակցության շնորհիվ բանկն   իր հաճախորդներին առևտրի ֆինանսավորման գործիքներից  առաջարկում է  փաստաթղթային ակրեդիտիվներ և երաշխիքներ` ինչպես  ներմուծման, այնպես էլ արտահանման նպատակով:

Հիշեցնենք, որ 2016 թվականի հունվարին ԱՐԱՐԱՏԲԱՆԿԸ «Global Finance» հեղինակավոր ամսագրի վարկածով ճանաչվել էր  2015 թվականի Հայաստանի լավագույն բանկն առևտրի ֆինանսավորման ոլորտում: Այդ ժամանակ այն հանդիսանում էր երրորդ միջազգային հեղինակավոր կազմակերպությունը, Commerzbank-ից և ՎԶԵԲ-ից հետո, որը Արարատբանկը պարգևատրել էր « Հայաստանի լավագույն բանկն առևտրի ֆինանսավորման ոլորտում» մրացնակով:

Ըստ ԱրմԻնֆո գործակալության` Հայաստանի բանկերի Ռենկինգի, Արարատբանկի ակտիվները 2016 թվականի հունվարի 1-ին գերազանցել են 132 մլրդ դրամը, որի

66.1 մլրդ.դրամը կազմել են վարկային ներդրումները և այլ փոխառությունները: Բանկի ընդհանուր պարտավորությունները 2016-ի հունվարի 1-ին կազմել են 109,6 մլրդ դրամ, որի 57.6 մլրդ.դրամը` ցպահանջ և ժամկետային ավանդները: Բանկի ընդհանուր կապիտալը 2016-ի հունավրի 1-ին հասել է 22,5 մլրդ դրամի, որի 8.3 մլրդ դրամը կազմել է  կանոնադրական կապիտալը, իսկ 12.8 մլրդ.դրամը`կուտակված շահույթը: 2015 թվականն Արարատբանկը եզրափակել է 1.3 մլրդ դրամ բալանսային շահույթով: