Արմինֆո. Եվրասիական տնտեսական միության երկրները ներկայումս միասնական արժույթի ստեղծման հարցը չեն քննարկում, ՙՆովոստի-Ղազախստան՚ գործակալությանը հայտնել է ԵՏՀ ինտեգրման և մակրոտնտեսության կոլեգիայի անդամ /նախարար/ Տատյանա Վալովայան:
ՙՄենք այդ թեման այժմ չենք քննարկում, քանի որ մենք չունենք ոչ միասնական արժույթի կիրառման պահանջարկ, ոչ դրա ներդրման համար պայմաններ: Մեզ անհրաժեշտ է արժութային ոլորտում ինտեգրում, բայց մեզ հիմա միասնական արժույթի շուրջ բանավեճ պետք չէ՚,- Աստանայի տնտեսական համաժողովի շրջանակներում գործակալությանն ասել է Վալովայան: Նրա խոսքով, եվրոպական փորձը ցույց է տալիս, որ միասնական արժույթի ներդրման համար պետք է ՙշատ ավելին անել, քան եվրոպացիներն են արել, քանի որ շատ բաներ նրանք սկսեցին անել, երբ արդեն ճգնաժամ սկսվեց՚: ՙՄիասնական արժույթի ստեղծումն, իհարկե, հնարավոր է, բայց դրա համար պետք է պահանջարկ լինի: Եվրոպայում պահանջարկ կար, քանի որ Եվրոպայում արդեն կար միասնական արժույթ: Կային Եվրոպական միության շատ պետություններ, բայց վերջիններս ունեին միասնական արժույթ՝ գերմանական մարկ: Քանի որ գերմանական մարկը, ըստ էության, ֆինանսա-արժութային ոլորտում ևս պայմաններ էր թելադրում ողջ տարածության համար: Գերմանական Բունդեսբանկը կենտրոնական բանկ էր, և այդ պատճառով մնացած բոլոր պետությունները, որոնք վնասներ էին գրում գերմանական դրամավարկային քաղաքականությունից, չէին կարող ազդել վերջինիս վրա՚,- ավելացրել է նա: Վալովայան նշել է, որ Եվրամիությունում արդեն կար զարգացած միասնական շուկա և փոխադարձ առևտրի բարձր աստիճան:
ՙՄենք դեռ այդ իրավիճակին չենք հասել: Տեսականորեն, այո, մի քանի տասնամյակ անց, հնարավոր է, կարողանանք վերադառնալ այդ գաղափարին:
Մենք նույնիսկ չգիտենք, թե 20 տարի անց ինչպիսին կլինի համաշխարհային արժութային համակարգը: Բայց մեզ անպայման անհրաժեշտ է խորացնել համագործակցությունը և ինտեգրումն արժութային ոլորտում՚,- ասել է նախարարը:
