Հայաստանում շահաբաժինները կհարկվեն

Արմինֆո. Հայաստանում շահաբաժինները կհարկվեն: Համապատասխամ դրույթն ամրագրված է նոր Հարկային օրենսգրքում, որի քննարկումները հունիսի 13-ին շարունակվել են ՀՀ Ազգային ժողովում:

ՀՀ Պետեկամուտների կոմիտեի պետի տեղակալ Վախթանգ Միրումյանի խոսով, վերջին 25 տարիներին շահաբաժինները չեն հարկվել, բայց դա չի ազդել ներդրումների ներգրավման վրա: Միրումյանը վստահ է, որ ներդրումների ներգրավման համար աշխատում են այլ գործոնները, այլ ոչ թե շահաբաժինների հարկումը: Ռեզիդենտների շահաբաժինների հարկումը թույլ կտա խուսափել բազմաթիվ չարաշահումներից, օրինակ, հարկերից խուսափելու նպատակով աշխատավարձերը որպես շահաբաժիններ ձևակերպումներից: Բացի այդ, անհասկանալի է մնում հարցը, թե ինչու ֆիզիկական անձի եկամուտների մի տեսակը կարող է հարկվել, իսկ մյուսը տեսակը – ոչ: Մանավանդ, որ շահաբաժինների հարկումը չի կարող էապես ազդել ներդրումների վրա:

Կառավարության առաջարկն արժանացավ ՀՀ նախկին վարչապետ, ՀԱԿ պատգամավոր Հրանտ Բագրատյանի խիստ քննադատությանը, ով նոր Հարկային օրենսգրքում հարկերի բարձրացում է տեսնում վեց ուղղություններով: Նա նշել է, որ եթե Հարկային օրենսգիրքն ընդունվեր անցյալ տարի, ապա դա կապահովեր 40 մլրդ.դրամի լրացուցիչ հարկային մուտքեր: Նրա խոսքով, ներառվել է բաժնետոմսերի և շահաբաժինների հարկման դրույթը, ավելացվել է բենզինի և ծխախոտի ակցիզային հարկը, նոտարների ու անհատ ձեռներեցների համար սահմանվել է ամսական 5 հազար դրամ շահութահարկ և այլն: Պատգամավորը նշել է, որ շահաբաժինների հարկումը հանդիսանում է կրկնակի հարկում, ինչն անթույլատրելի է: