Արմինֆո. Համառուսաստանյան արտաքին առևտրի ակադեմիայի դոցենտ, բեռնափոխադրումների գծով փորձագետ Անդրեյ Գոլուբչիկի խոսքով, Ռազմավիրական ճանապարհը վերականգնել շատ դժվար է և թանկ: Դա գործնականում անհնար է, հայտարարել է փորձագետը:
ՙԱյն, իրոք, վատթարագույն վիճակում է: Հարավային Օսիայով ճանապարհը խելամիտ է: Տեղական իշխանությունների կողմից հնարավոր խոչընդոտները, կարծում եմ, կարելի է հաղթահարել բանակցությունների ճանապարհով: Վրացական մեքենաների համար կարելի է հատկացնել առանձին միջանցք, որից նրանք չեն կարող շեղվել՚,- նշել է Գոլուբչիկը, հայտնում է Բիզնես Գրուզիան: Փորձագետի խոսքով, Հարավային Օսիան պետք է մտածի օգուտի մասին, որը կբերի տարանցման իրականացումը: Նրա կարծիքով, Ցխինվալով ճանապարհը նույնպես լավ վիճակում չի գտնվում և վերանորոգման կարիք ունի: ՙԲայց Ռազմավիրական ճանապարհն ուղղակի չի գործում: Տարբերությունն այն է, որ եթե Ցխինվալում ճանապարհն անհրաժեշտ է կարկատել, ապա Ռազմավիրական ճանապարհը՝ վերստին կառուցել՚,- ընդգծել է փորձագետը:
Ցխինվալով ճանապարհի բացման հնարավորությանը թերահավատորեն է վերաբերում քաղաքագետ Անդրեյ Արեշևը. ՙԿարծում եմ՝ քաղաքական պատճառներով այդ հարցը մոտ ժամանակներս դրական հանգուցալուծում չի ունենա: Այնուամենայնիվ, Ռուսաստանը և Հայաստանը կապող այլընտրանքային հաղորդակցական ուղիների վերլուծություն պետք է արվի: Ռազմավիրական ճանապարհով երկու երկրների միջև ներկայիս հաղորդակցությունը խիստ դժվարացած է: Անընդհատ փլուզումներ են տեղի ունենում, դա մշտական խնդիր է՚: ՙԳոյություն ունեն անվտանգության խնդիրներ՝ կապված Ցխինվալով ճանապարհի բացման հնարավորության հետ՚,- հաստատել է Արեշևը: ՙՄտահոգություն է առաջացնում, այսպես կոչված, կովկասյան միջանցքը՝ Սիրիայից Թուրքիայի և Վրաստանի տարածքով անդրսահմանային ահաբեկչության համար: Կա անվտանգության շուրջ ռուս-վրացական երկխոսության սուր պակաս, ինչի մասին շատ է խոսվում փորձագիտական հանրության, քաղաքական գործիչների, պետական կառույցների ներկայացուցիչների մակարդակով ինչպես Մոսկվայում, այնպես էլ՝ Թբիլիսիում: Վրաստանը և Հարավային Օսիան բաժանող հաղորդակցությունների մասնակի բացման հարցի քննարկումը կարող էր խթան հանդիսանալ անվտանգության հետ կապված հարցերի լուծման համար, ինչը հավասարապես ակտուալ է ինչպես Մոսկվայի, այնպես էլ՝ Թբիլիսիի համար՚,- ամփոփել է փորձագետը:
Հայաստանը Վրաստանի և Ռուսաստանի հետ բանակցություններ է վարում, որպես Վերին Լարսի ճանապարհին այլընտրանք, հայկական ավտոմեքենաների համար այլ ճանապարհ բացելու համար: Այդ մասին կառավարության նիստից հետո լրագրողների հետ զրույցում ասել է ՀՀ տրանսպորտի և կապի նախարար Գագիկ Բեգլարյանը: Նախարարը նշել է, որ բանակցություններ ենք վարում վրացական կողմի հետ, որպեսզի ունենանք նաև այլընտրանքային ճանապարհ, դրա հետ կապված պետք է բանակցություններ վարվեն նաև ռուսաստանյան կողմի հետ՝ դիվանագիտական խողովակներով: Բեգլարյանը նշել է, որ ներկայում Հարավային Օսիայով հնարավորություն կա ուղևորվել դեպի ՌԴ, ճանապարհը լավ վիճակում է: «Երկու պետությունների հետ բանակցություններ են տարվում, Հայաստանից շատ բան այս առումով կախված չէ՚,- նշել է տրանսպորտի և կապի նախարարը:
Հիշեցնենք, որ հունիսի 23-ին Դեվդորակի կիրճում տեղի ունեցած սողանքների հետևանքով փակվել է Մցխեթա - Ստեփանծմինդա – Լարս ավտոճանապարհը: Նշենք, որ ռուս-վրացական սահմանին գտնվող «Վերին Լարսե անցակետով է ընթանում Հայաստանին Ռուսաստանի կապող միակ ցամաքային ճանապարհը:
