Երևանի կոնյակի գործարանը ոչ միայն չի պակասեցրել վաճառքի ծավալը, այլև, նույնիսկ, փոքր-ինչ ավելացրել է

Արմինֆո. Երևանի կոնյակի գործարանը ոչ միայն չի պակասեցրել վաճառքի ծավալը, այլև, նույնիսկ, փոքր-ինչ ավելացրել է այն: Այդ մասին լրագրողների հետ զրույցում հաղորդել է ԵԿԳ գործադիր տնօրեն Իգոր Առաքելյանը:

Նրա ասելով, հայկական կոնյակի սպառման հիմնական շուկան շարունակում է մնալ Ռուսաստանը: Ցավոք սրտի, ամփոփելով նախորդ տարվա արդյունքները, հարկ է նշել, որ հայկական կոնյակի արտահանման ծավալը, ընդհանուր առմամբ, փոքր-ինչ նվազել է: Այդուհանդերձ, հաշվի առնելով վաճառքի ծավալի որոշ աճը, արձանագրվել է 1,5% աճ: «Այսօր, որպես հայկական կոնյակի արտադրության առաջատար, մենք Ռուսաստանում կոնյակ վաճառողների առաջատար հնգյակում ենք: Նկատի ունեմ ինչպես ռուսական, այնպես էլ մյուս կոնյակները, որոնք գտնվում են մեր գնային սեգմենտում. խոսքը վերաբերում է շուրջ 35 մլն լիտր կոնյակին: Այստեղ բացառվում են ֆրանսիական կոնյակները, որոնք գնային այլ հատվածում են: Իսկ եթե վերցնենք ողջ սեգմենտը, ապա այն 2 անգամ ավելի կլինի: Սակայն դրանում կան շատ ցածր գնով առաջարկներ, որտեղ մենք չենք կարող և չենք ցանկանում մրցակցել, քանի որ որակյալ ապրանքը չի կարող այդպիսի գին ունենալ: Ահա թե ինչու մենք մեր արտադրանքը համեմատում ենք նույն գնային և որակական կարգի առաջարկների հետ», - հայտարարել է ԵԿԳ գործադիր տնօրենը: «Հարկավոր է հաշվի առնել, որ 2 տարի առաջ ստեղծվել է նոր իրողություն, որում մենք բոլոր ուժերով պահպանել ենք գները, հասել շուկայում մեր ներկայության չնվազման: Այո, մենք ունենք մեծ ֆինանսական կորուստներ. եկամուտը նվազել է 2 անգամ, սակայն մեզ համար գլխավորն այդ պահին հասկանալն էր, թե ինչ նոր պայմաններ է առաջարկում շուկան: Հատկապես` նոր պայմաններ:  Քանի որ եթե նախկինում, սկսած 1998 թվականից, երբ Պեռնո Ռիկարը գնեց ԵԿԳ, յուրաքանչյուր 4-5 տարին մեկ ճգնաժամ է լինում: Յուրաքանչյուր 4-5 տարին մեկ վաճառքի անկում էր լինում, սակայն հետո կրկին ավելանում էր: Այս անգամ պատահածը ճգնաժամ չես անվանի, դրանք նոր պայմաններ են: Այդ նոր պայմաններում բոլոր արտադրողները, սկսած խաղողագոծներից և վերջացրած կոնյակի գործարաններով, պետք է սովորեն խաղալ նոր կանոններով, որոնց դեպքում, հնարավոր է, ստիպված լինեն ավելի քիչ վաստակել: Սակայն գլխավոր նպատակը պետք է լինի պահպանել այն, ինչ ստեղծվել է զարգացման այս բոլոր տարիների ընթացքում: Եվ այդ առնչությամբ մեծ բեռ է ընկնում ԱրԱրԱտի վրա: Մենք այդ ոլորտում առաջատար ենք և պետք է շարունակենք ներդրումներ կատարել նաև մարքետինգում, ճիշտ քաղաքականություն վարել այդ ոլորտում: Եվ մենք դա անում ենք», - ընդգծել է Ի.Առաքելյանը:

Որպես օրինակ նա նշել է այն փաստը, որ ԵԿԳ-ն Տրետյակովյան պատկերասրահի գործընկերն էր Այվազովսկուն նվիրված ցուցահանդեսում: Երկրորդ տարին հովանավորվում է այնպիսի հեղինակավոր միջոցառում, ինչպիսնի է «Ոսկե դիմակ» ռուսական ազգային  թատերական մրցանակը: «Ինչու՟ ենք դա անում: Որպեսզի կարողանանք ցուցադրել Հայաստանի լավագույն կողմերը, այդ թվում` նրա ճաշակը, բուրմունքը: Եվ նշեմ, որ ռուսաստանյան սպառողը մեծ սիրով է ընդունում մեր մասնակցությունը: Եվ դա շատ է օգնում մեզ մնալ շուկայում, ցույց տալ, որ ԱրԱրԱտը բրենդ է, հեղինակություն… Սպառողը մեզ ճանաչում է, սակայն, դժբախտաբար, մենք չենք կարող պայքարել բոլոր գնային կարգերում: Կա գների նվազագույն մակարդակ, որից ցածր մենք չենք կարող իջնել: Դա պայմանավորված է բազմաթիվ պատճառներով` սկսած խաղողի ինքնարժեքից և վերջացրած մեր ներդրումներով, որոնք մենք պետք է անենք` բարձրության վրա պահելու մեր բրենդի, ընկերության, ինչպես նաև, ինչու ոչ, Հայաստանի հեղինակությունը: Դա նույնն է` ինչ թանկարժեք ժամացույցը: Բոլորը գիտեն, որ այն թանկ արժե, և ոչ բոլորը կարող են գնել: Եվ մարդիկ գնում են այն, ինչ կարող են իրենց թույլ տալ: Այսօր մենք հասել ենք եկամտաբերության նվազագույն սահմանին, նկատի ունենալով մեր ծախսերը, ինքնարժեքը, ներդրումները, այդ թվում` գովազդի համար: Եթե մենք այդ ամենը չանեինք, ապա կարող էինք ավելի իջեցնել գինը, սակայն մեր փորձը ցույց է տալիս, որ, օրինակ, եթե դու գովազդի համար ներդրում չես կատարում, չես հովանավորում կարևոր միջոցառումներ, ապա, միևնույն է, կորցնում ես, այդ թվում` ունեցածդ հեղինակությունը: Այդ պատճառով բոլոր հզոր բրենդերն անում են դա», - ասել է Առաքելյանը:

Նա ընդգծել է, որ այսօր ԵԿԳ պայքարում է ոչ թե «հայկական կոնյակ» կարգում, այլ` ողջ ալկոհոլի շուկայում: Այսօրվա դրությամբ կոնյակի սպառումը նվազել է: Ռուսաստանում այն նվազել է 2,5%-ով: «Սակայն մենք պահպանել ենք մեր դիրքերը: Փոխանենը լավ է աճում վիսկիի սպառումը: Բանն այն է, որ մարդկանց նախապատվությունները, ալկոհոլի մոդան փոխվում են ժամանակի ընթացքում: Դա նույնպես մարտահրավեր է… Նշեմ, որ կոնյակը սեզոնային ապրանք է, իսկ վիսկի կարելի է սարքել ողջ տարին, և դրա ինքնարժեքը չափազանց ցածր է», - նշել է նա:

Գործադիր տնօրենը նշել է, որ թանկարժեք կոնյակների արտադրության առնչությամբ ձեռնարկությունը փորձում է մուտք գործել այլ գնային հատվածներ: Նրա ասելով, նախորդ տարվանից գործարանում սկսվել է 30-ամյա «Էրեբունի» կոնյակի արտադրությունը, որն իր գնային սեգմենտում էժան չէ և բավականին հաջողված է: «Կարող է մեծ թիվ չթվալ, սակայն հոկտեմբերից մինչև հունիս մենք վաճառել ենք այդ կոնյակի շուրջ 1000 լիտր: Մենք դա համարում ենք բավականին լավ ցուցանիշ` նոր և ոչ էժանագին ապրանքի համար: Չէ որ մրցակցությունը շատ մեծ է նաև այդ թանկարժեք սեգմենտում, որտեղ առաջատարը ֆրանիական կոնյակներն են, դա վատ չի: Ավելին, այս տարի մենք ներկայացրել ենք նոր ապրանք` 25 տարվա ԱրԱրԱտը, որի սահմանափակ արտադրությունը նվիրված է Հայաստանի անկախության 25-ամյա հոբելյանին: Այդպիսի որակյալ կոնյակների արտադրություն մեզ թույլ է տալիս այն փաստը, որ մենք ունենք կոնյակի սպիրտերի բարձրորակ պաշարներ, որոնք կուտակվել են ավելի քան 100 տարվա ընթացքում: Գուցե մեր առանձնահատկությունն է, որ մենք կարող ենք շուկային բարձրորակ թանկարժեք կոնյակներ առաջարկել, և սպառողը սպասում է դրանց», - նշել է նա: