ՄԱԿ-ի Ատոմային էներգիայի միջազգային գործակալության գլխավոր կոնֆերանսի 60-րդ նստաշրջանը:

Արմինֆո. Սեպտեմբերի 26-ին Վիեննայում մեկնարկել է ՄԱԿ-ի Ատոմային էներգիայի միջազգային գործակալության գլխավոր կոնֆերանսի 60-րդ նստաշրջանը:

ՀՀ ԷԲՊՆ աշխատակազմի տեղեկատվության և հասարակայնության հետ կապերի բաժնից, կոնֆերանսին մասնակցում է Հայաստանի պատվիրակությունը՝ ՀՀ էներգետիկայի և բնական պաշարների նախարար Աշոտ Մանուկյանի գլխավորությամբ: Պատվիրակության կազմում են Վիեննայում տեղակայված միջազգային կազմակերպություններում ՀՀ մշտական ներկայացուցիչ, Ավստրիայում ՀՀ դեսպան Արման Կիրակոսյանը, ՀՀ էներգետիկայի և բնական պաշարների նախարարի տեղակալ Արեգ Գալստյանը, ՀՀ ԿԱ միջուկային անվտանգության կարգավորման պետական կոմիտեի նախագահի տեղակալ Վանիկ Ներսիսյանը, ՀՀ նախագահին կից ատոմային էներգիայի անվտանգության խորհրդի քարտուղար, «Հայատոմ» ՓԲԸ-ի գլխավոր տնօրեն Վահրամ Պետրոսյանը, հայկական ԱԷԿ-ի գլխավոր տնօրեն Մովսես Վարդանյանը, ինչպես նաև՝ ոլորտի այլ մասնագետներ:

Կարևորելով ԱԷՄԳ դերը միջուկային էներգիայի խաղաղ օգտագործման բնագավառում՝ Հայաստանի պատվիրակության ղեկավար Ա. Մանուկյանը իր ելույթում գոհունակություն է հայտնել ԱԷՄԳ-ի հետ ՀՀ երկարատև և արդյունավետ համագործակցության, հատկապես՝ ՀԱԷԿ-ի անվտանգության մակարդակի բարձրացման գործընթացում ԱԷՄԳ դերակատարության և ցուցաբերած աջակցության կապակցությամբ:

Գլխավոր կոնֆերանսի շրջանակներում Հայաստանի պատվիրակությունը հանդիպումներ է ունեցել ՌԴ պատվիրակության, Եվրատոմի, ԱՄՆ էներգետիկայի դեպարտամենտի ներկայացուցիչների, ԱԷՄԳ ֆիզիկական պաշտպանության վարչության աշխատակիցների, ինչպես նաև մի շարք այլ պատվիրակությունների հետ: Հանդիպումների ընթացքում քննարկվել են հետագա համագործակցության հարցեր, միջուկային էներգիայի զարգացման, անվտանգության ապահովմանն առնչվող խնդիրներ:

Ողջ աշխատանքային շաբաթվա ընթացքում 168 երկրների ներկայացուցիչներ կքննարկեն ատոմային էներգետիկայի զարգացման հեռանկարները: ԱԷՄԳ գլխավոր կոնֆերանսը ռազմավարական հարցերի քննարկման և գիտական բանավեճերի հարթակ է: Սեպտեմբերի 28-29-ին անցկացվող 60-րդ նստաշրջանը նվիրված է միջուկային տեխնոլոգիաների կիրառմանը` կայուն զարգացման նպատակների իրագործման համար: Հատուկ ուշադրություն կդարձվի ԱԷՄԳ երաշխիքների ռեժիմի արդյունավետության բարձրացմանը, որը երկրների նկատմամբ կիրառվում է միջուկային զենքի չտարածման շուրջ պայմանագրին համապաատսխան, ինչպես նաև` Մերձավոր արևելքում ԱԷՄԳ երաշխիքների պահպանմանը: Նստաշրջանի մասնակիցներն ուշադրություն կդարձնեն միջուկային և ճառագայթային անվտանգության բնագավառում միջազգային տեխնիկական համագործակցության ամրապնդման միջոցներին, միջուկային նյութի ֆիզիկական պաշտպանությանն ու ռադիոակտիվ թափոնների հետ անվտանգ վարվելուն: Ավանդաբար կքննարկվի ԿԺԴՀ միջուկային ծրագիրը, մասնավորապես, Միջուկային զենքի չտարածման շուրջ պայմանագրի առնչությամբ երաշխիքների կիրառման շուրջ ԱԷՄԳ և ԿԺԴՀ միջև համաձայնության իրագործմանը,  քանի որ գործակալությունն առաջվա պես հնարավորություն չունի ստուգման գործունեություն իրականացնել ԿԺԴՀ-ում: Նստաշրջանի նախնական օրակարգում ներառված էր նաև «Իսրայելի միջուկային ներուժը» կետը, որը նախաձեռնել էին ԱԷՄԳ անդամ արաբական պետությունները: ԱԷՄԳ նաև կամփոփի նախորդ տարվա աշխատանքի արդյունքները, կնախանշի ապագայի գերակայությունները, կթարմացնի գործակալության բյուջեն: Հոբելյանական նստաշրջանի մեկնարկի առնչությամբ կկազմակերպտի հանդիսավոր ընդունելություն: Ամփոփիչ փաստաթղթի շուրջ ԱԷՄԳ գլխավոր կոնֆերանսի նստաշրջանի մասնակիցների քվեարկությունը տեղի կունենա վերջին օրը: ԱԷՄԳ-ը միջուկային տեխնոլոգիաների խաղաղ կիրառման բնագավառում գիտատեխնիկական համագործակցության համաշխարհային առաջատար ֆորում է: Գործակալությունն ստեղծվել է 1957 թվականին որպես ինքնուրույն կազմակերպություն ՄԱԿ շրջանակում և իրենից ներկայացնում է միջազգային մարմին, որը կոչված է վերահսկելու միջուկային էներգիան և նպաստելու դրա կիրառմանը: