METRO AG ընկերությունն ուսումնասիրում է Հայաստանում ներկայացուցչություն հիմնելու հնարավորությունը

Արմինֆո. Վարչապետ Կարեն Կարապետյանն ընդունել է մանրամեծածախ առևտրով զբաղվող METRO AG ընկերության արտաքին կորպորատիվ քաղաքականության գծով փոխնախագահ, ընկերության մոսկովյան ներկայացուցչության ղեկավար Ալեքսեյ Գրիգորևին:

Ինչպես ԱրմԻնֆո գործակալությանը տեղեկացվել է ՀՀ կառավարության մամուլի ծառայությունից, վարչապետը կարևորել է METRO AG-ի և հայաստանյան արտահանման ուղղվածություն ունեցող ձեռնարկությունների միջև համագործակցությունը և հետագա զարգացումը: Կարեն Կարապետյանը հույս է հայտնել, որ METRO AG-ն կկարողանա Հայաստանի արտադրողների թվում գտնել վստահելի գործընկերներ՝ երկարաժամկետ փոխգործակցության հեռանկարով: Կառավարության ղեկավարն ընդգծել է, որ առկա է հայկական գյուղմթերքների, վերամշակված արտադրանքի արտահանման ծավալների ընդլայնման հնարավորություններ ոչ միայն եվրասիական, այլ նաև այլ շուկաներ: 
Նշելով, որ հետաքրքրված են հայ գործընկերների հետ կապերի զարգացմամբ՝ Ալեքսեյ Գրիգորևն ընդգծել է, որ դրա համար տեսնում է լավ հնարավորություններ: METRO AG-ի փոխնախագահը վստահություն է հայտնել, որ ակտիվ քննարկումների արդյունքում կկարողանան գտնել փոխգործակցության եզրեր: 

Հանդիպման ընթացքում անդրադարձ է կատարվել երկուստեք հետաքրքրություն ներկայացնող տարբեր հարցերի, այդ թվում՝ Հայաստանում METRO AG ընկերության ներկայացուցչության ստեղծման հնարավորությանը:

Metro AG-ն ընկերությունների խումբ է, որը կառավարում է իր մեծությամբ Եվրոպայում երրորդ և աշխարհում չորրորդ խոշորագույն մանրածախ ցանցը: Կառավարիչ  ընկերությունը հիմնադրվել է 1996 թվականին Metro Cash & Carry, Kaufhof Holding AG և ASKo Deutsche kaufhaus AG ընկերությունների միաձուլման շնորհիվ: Metro AG-ի հիմնական սեփականատերերն են`գերմանական Հանիել ձեռնարկատերերի ընտանիքը (30.01% քվեարկող բաժնետոմսեր), Schmidt-Rutenbek-ը (15.77% քվեարկող բաժնետոմսեր) և Բայսհայմ ընկերությունը (9.10% քվեարկող բաժնետոմսեր), իսկ մնացած բաժնետոմսերը գտնվում են ազատ շրջանառության մեջ: Metro Group-ը ներկայացնում է 2200 առեւտրի կենտրոններ 31 երկրներում`Ավստրիայում, Բելգիայում, Բուլղարիայում, Վիետնամում, Հունգարիայում, Գերմանիայում, Հունաստանում, Դանիայում, Իսպանիայում, Հնդկաստանում, Իտալիայում, Ղազախստանում, Չինաստանում, Մոլդովայում, Լյուքսեմբուրգում, Նիդեռլանդներում, Պակիստանում, Լեհաստանում, Պորտուգալիայում, Ռումինիայում, Ռուսաստանում, Սերբիայում, Սլովակիայում, Թուրքիայում, Ուկրաինայում, Ֆրանսիայում, Խորվաթիայում, Չեխիայում, Շվեյցարիայում, Շվեդիայում, Ճապոնիայում: Metro AG-ն ընկերությունների խմբում ընդհանուր առմամբ աշխատում է ավելի քան 255 հազար մարդ: Ընկերության հասույթը 2014-15 թվականներին կազմել է 63,035 մլրդ եվրո: