Հայաստանում այն պետական ծառայողները, որոնք զգալիորեն ավելացրել են իրենց անձնական կապիտալը, կենթարկվեն քրեական պատասխանատվության

Արմինֆո. Հայաստանում այն պետական ծառայողները, որոնք զգալիորեն ավելացրել են իրենց անձնական կապիտալը, կենթարկվեն քրեական պատասխանատվության: Նման հայտարարությամբ է հանդես եկել ՀՀ վարչապետ Կարեն Կարապետյանը ՀՀ կառավարության այսօր կայացած նիստում:

Ըստ վարչապետի, այս միջոցնն ուղղված է հստակ արդյունքների ձեռքբերմանը կոռուպցիայի դեմ պայքարում: «Այն դեպքերում, երբ պաշտոնատար անձի ակտիվների աճն էականորեն գերազանցում է նրա օրինական եկամուտները, նա պետք է ենթարկվի քրեական պատասխանատվության»,-հայտարարել է վարչապետը: Նա արդարադատության նախարարին հանձնարարել է երկշաբաթյա ժամկետում օրենքի նախագիծը ներկայացնել կառավարություն: «Խոսքը գնում է ապօրինի հարստացման քրեականացման մասին»,-ընդգծել է կառավարության ղեկավարը:

Նա նաև ընդգծել է, որ ապօրինի հարստացման նախագծի հետ անհրաժեշտ է ներկայացնել կանխիկ գործառնությունները սահմանափակող օրենքի նախագիծը: Խոսքը գնում է այսպես կոչված, «կեղծ փոխառությունների», «կեղծ նվիրատվությունների» մասին, որոնք հիմնականում կատարվում են կանխիկ եղանակով և գործընթացը դարձնում են սկզբունքորեն անվերահսկելի: Շատ դեպքերում պարզ չէ` արդյոք հայտարարագիր ներկայացրած անձն իրականում ստացել է հայտարարագրում նշված փոխառությունը, թե ոչ: Այս խնդիրների լուծման նպատակով նա հանձնարարել է ՀՀ արդարադատության նախարարին`Կենտրոնական բանկի հետ համատեղ երկշաբաթյա ժամկետում կառավարության քննարկման ներկայացնել կանխիկ գործառնությունների սահմանափակման օրենքի նախագիծը:

Բացի այդ, վարչապետը գտնում է, որ անհրաժեշտ է ընդլայնել Բարձրաստիճան պաշտոնատար անձանց էթիկայի հանձնաժողովի լիազորությունները` սահմանելով և´ կրթական, և´ կոռուպցիայի կանխարգելման գործառույթներ: Բացի դրանից, անհրաժեշտ է նաև կոռուպցիոն հանցագործությունների դեմ պայքարող իրավապահ մարմինների գործունեությունը դարձնել առավելագույնս հաշվետվողական: Այդ նպատակով պետք է օրենքով սահմանել պահանջ, որ այդ մարմինները կոռուպցիայի դեմ իրենց կատարած քայլերի մասին յուրաքանչյուր տարի պետք է հանրային հաշվետվություն ներկայացնեն: Նա ՀՀ արդարադատության նախարարին հանձնարարել է մեկամսյա ժամկետում ներկայացնել համապատասխան օրենսդրական նախագիծը:

Բացի այդ, վարչապետը նշել է, որ անհրաժեշտ է անդրադառնալ նաև հայտարարագիր ներկայացնող անձանց շրջանակի ընդլայնմանը: Իհարկե, ներկայումս արդեն պաշտոնատար անձանց մի ստվար զանգված, օրինակ` կառավարության անդամները, դատավորները և այլն, ներկայացնում են հայտարարագիր, բայց կան պաշտոնատար անձինք, ովքեր, այս ցանկում ընդգրկված չլինելով, ընդգրկված են, օրինակ, խոշոր պետական գնումների գործընթացում կամ տարբեր այլ, կոռուպցիոն տեսանկյունից «ռիսկային» գործունեության մեջ: «Այդ իսկ պատճառով ՀՀ արդարադատության նախարարին հանձնարարում եմ երեքշաբաթյա ժամկետում կառավարություն ներկայացնել առաջարկություն, հայտարարագիր ներկայացնող անձանց շրջանակի ընդլայնման վերաբերյալ՝ ելնելով ռիսկայնությունից»,-նշել է ՀՀ վարչապետը:

Վարչեպտի հաջորդ հանձնարարականը վերաբերում է, այսպես կոչված, ազդարարների համակարգին: Տարբեր երկրներում այս ոլորտում առկա փորձի ուսումնասիրությունը ցույց է տալիս, որ դասական մոտեցումները մեր երկրի համար այդքան էլ արդյունավետ չեն կարող լինել: Եթե այլ երկրներում ձևավորված մոտեցում է պաշտպանության նպատակով ազդարարներին մեկ բնակավայրից մյուսը տեղափոխելը, ապա նույնը Հայաստանում արդյունավետ լինել չի կարող, հետևաբար, ՀՀ արդարադատության նախարարին հանձնարարվում է երկամսյա ժամկետում մշակել արդյունավետ եղանակներ ազդարարների համակարգը ներդնելու ուղղությամբ:

Այնուհետև վարչապետը ՀՀ արդարադատության նախարարին հանձնարարել է կազմակերպել հանդիպումներ քաղաքացիական հասարակության ներկայացուցիչների, ընդդիմության և բոլոր շահագրգիռ կողմերի հետ և ըստ անհրաժեշտության ներկայացնել առաջարկ Կոռուպցիայի դեմ պայքարի խորհրդի կազմավորման սկզբունքների, ինչպես նաև կազմի վերանայման վերաբերյալ:

Նշենք, որ կոռուպցիայի հարցը վերջին ժամանակներս բազմաթիվ անգամ բարձրացվել է երկրի հանրության կողմից: Մասնավորապես, մինչ օրս հանելուկ է մնում նախկին վարչապետ Հովիկ Աբրահամյանի եկամուտների աղբյուրը, ում անձնական, հայտարարագրված կապիտալը հասնում է 5 մլն.դոլարի, կամ ֆինանսների նախկին նախարար Գագիկ Խաչատրյանի եկամուտները, որոնք գնահատվում են առնվազն 6 մլն.դոլար, ինչպես նաև մյուս բարձրաստիճան պաշտոնյաների եկամուտները: