Արմինֆո. Հայաստանի վարչապետ Կարեն Կարապետյանը Ռուսաստանի Դաշնության կառավարության ղեկավար Դմիտրի Մեդվեդևի հրավերով հունվարի 24-ին երկօրյա պաշտոնական այցով կմեկնի Ռուսաստանի Դաշնություն:
Ինչպես ԱրմԻնֆո-ին հաղորդեցին ՀՀ կառավարության տեղեկատվության և հասարակայնության հետ կապերի վարչությունից, այցի շրջանակում Կարեն Կարապետյանը Մոսկվայում հանդիպում կունենա ՌԴ վարչապետ Դմիտրի Մեդվեդևի հետ: Նախատեսվում է քննարկել հայ-ռուսական համագործակցության օրակարգը:
ՀՀ և ՌԴ վարչապետերը կանդրադառնան նաև Եվրասիական տնտեսական միության շրջանակում երկու երկրների ինտեգրացիոն համագործակցությանը, ինչը կնպաստի տարբեր ուղղություններով հայ-ռուսական փոխգործակցության ամրապնդմանն ու խորացմանը
ՌԴ կառավարության կայքում զետեղված հաղորդման համաձայն, հանդիպման օրակարգում ներառված են ռուս-հայկական համագործակցության արդիական հարցերն առևտրատնտեսական, էներգետիկ, տրանսպորտային, հումանիտար, ինչպես նաև համատեղ ներդրումային նախագծերի իրագրծման ոլորտներում: Զրույցի ընթացքում հատուկ ուշադրություն կդարձվի Ռուսաստանի և Հայաստանի ինտեգրացիոն փոխգործակցությանը ԵԱՏՄ շրջանակում: Բանակցությունների արդյունքում նախատեսվում է միջգերատեսչական փաստաթղթերի ստորագրում, որոնք նպատակաուղղված են ռուս-հայկական հարաբերությունների հետագա ամրապանդմանը տարբեր բնագավառներում:
