Նախատեսվում է ստեղծել Ճանապարհային հիմնադրամ, որը կֆինանսավորի ավտոմոբիլային ճանապարհների վերանորոգման աշխատանքները

Արմինֆո. Հայաստանում նախատեսվում է ստեղծել Ճանապարհային հիմնադրամ, որը կֆինանսավորի ավտոմոբիլային ճանապարհների վերանորոգման աշխատանքները, մայիսի 5-ին մամուլի ասուլիսի ժամանակ հայտարարել է տրանսպորտի, կապի և  տեղեկատվական տեխնոլոգիաների նախարար Վահան Մարտիրոսյանը:  

Նրա խոսքով, հիշյալ ծրագրի բյուջետային ֆինանսավորման ծավալները բավարար չեն: Այդ նպատակով տարեկան հատկացվում է շուրջ 7,5 մլրդ դրամ, մինչդեռ առնվազն 90 մլրդ դրամ է անհրաժեշտ: Բյուջետային միջոցները ձմռան շրջանում ուղղվում են տրանսպորտային միջոցների անցանելիության ապահովմանը, ձնահավաքմանը, իսկ ամռան շրջանում՝ միջպետական և հանրապետական նշանակության ճանապարհների վերանորոգմանը: Ընթացիկ տարում ամռան ժամանակաշրջանի համար նախատեսվում է ուղղել 5 մլրդ դրամ, որի մեծ մասը կօգտագործվի Երևան-Սևան ավտոճանապարհի վերանորոգման նպատակով:

Ճանապարհների վերականգնման խնդիրների լուծմանն էլ կաջակցի ստեղծվելիք Ճանապարհային հիմնադրամը՝ պետության և մասնավոր հատվածի մասնակցությամբ: Բացառված չէ, որ Հիմնադրամը համալրվի նաև տրանսպորտային միջոցների գույքահարկից պետբյուջե ստացված միջոցներով:

Պատասխանելով միջպետական և հանրապետական նշանակության ավտոմոբիլային ճանապարհները հավատարմագրային կառավարման հանձնելու հնարավորության վերաբերյալ ԱրմԻնֆո-ի հարցին, ինչը թույլ կտա մեկընդմիշտ լուծել խնդիրը՝ Վահան Մարտիրոսյանն ընդգծել է, որ տվյալ դեպքում խոսքը վերաբերում է վճարովի ավտոճանապարհների համակարգի ներդրմանը: «Տվյալ փուլում մենք քննարկում ենք հարավային ուղղությամբ՝ դեպի Իրան, վճարովի համակարգի ներդրման հնարավորությունը»,- ասել է նախարարը: