Արմինֆո.Հայաստանում հողմային խոշոր կայանների կառուցմամբ հետաքրքրված էմիրաթական «Աքսես Ինֆրա Սենթրալ Էյժա Լիմիթեդ» ընկերությունը, քամու ռեսուրսի չափման նպատակով, Գեղարքունիքի մարզում աշտարակ է տեղադրել, ինչպիսին մինչ այժմ Հայաստանում չի եղել։ Աշտարակի բարձրությունը հասնում է 80 մետրի։ Այն կգործարկվի մոտ օրերս։ Ինչպես ԱրմԻնֆո-ին հաղորդեցին Էներգետիկ ենթակառուցվածքների և բնական պաշարների նախարարության տեղեկատվության և հասարակայնության հետ կապերի բաժնից,
ապրիլին նախատեսվում է տեղադրել ևս մեկ աշտարակ՝ այլ վայրում։
ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանի տեղեկացմամբ, դեռևս անցած տարվա մարտին Կառավարությունն որոշում ընդունեց աջակցել «Աքսես Ինֆրա Սենթրալ Էյժա Լիմիթեդ» ընկերությանը մինչև 150 մեգավատանոց գումարային հզորությամբ քամու կայաններ կառուցելու գործում.
«Եթե սպասելիքներն արդարանան, ապա առաջիկա երկու-երեք տարում կարող ենք ունենալ աշխարհում նմանը չունեցող հողմակայան։ Այն լինելու է լեռնային և ամենաբարձր կայանը, որտեղ նախատեսվում է կիրառել նորարարական բազմաթիվ լուծումներ՚, - ասել է Հայկ Հարությունյանը։
Հայաստանում հողմային էլեկտրակայանի կառուցմամբ հետաքրքրված է նաև իսպանական «Աքսիոնա Էներգիա Գլոբալ Էս. Էլ.» ընկերությունը։ Անցած տարվա մարտին ընկերությունը ՀՀ էներգետիկ ենթակառուցվածքների և բնական պաշարների նախարարության հետ ստորագրել է փոխըմբռնման հուշագիր` 100-150 ՄՎտ հզորությամբ հողմաէլեկտրակայանների կառուցման վերաբերյալ: «Ընկերությունը սկսել է քամու ներուժի գնահատման աշխատանքների իրականացնումը: Տեղադրվել է 80 մետր բարձրությամբ երկու մոնիթորինգային կայան և մեկ «Sodar» համակարգ: Յուրաքանչյուր կայան համալրված է 8 հողմաչափով, 3 հողմացույցով, 2 ջերմա-խոնավաչափով և 1 մթնոլորտային ճնշաչափով՚, - տեղեկացրել է Հայկ Հարությունյանը:
Նշենք, որ դեռ 2003 թ.-ին ԱՄՆ վերականգնվող էներգետիկայի ազգային լաբորատորիան (NREL) կազմել էր Հայաստանի հողմա-էներգետիկ ներուժի քարտեզը, որի համաձայն, հանրապետության տնտեսապես հիմնավորված հողմաէներգետիկ ներուժը գնահատվում է 450 ՄՎտ, տարեկան 1,26 մլրդ կՎտ/ժամ էլեկտրաէներգիայի արտադրությամբ: Հեռանկարային հիմնական վայրերն են` Զոդի լեռնանցքը Բազումի լեռները: Պուշկինի և Քարախաչի լեռնանցքները, Ջաջուռի լեռնանցքը, Գեղամա լեռնազանգվածը, Սըանի լեռնանցքը, Ապարանի շրջանը, Սիսիանի և Գորիսի միջև բարձր լեռնազանգվածը և Մեղրիի շրջանը: «Zod Wind» ընկերությունն ավարտել է հողմաէներգետիկ ծրագրի դիտարկումները Սոտքի լեռնանցքում, իսկ այժմ բանակցում է տարբեր ընկերությունների հետ, «Զոդ» հողմաէլեկտրակայանի շինարարությանը ներդրումներ ներգրավելու նպատակով, որի ընդհանուր հզորությունը կկազմի 20 ՄՎտ: Հայ-իտալական «Ar Energy» ընկերության հողմաէներգետիկ ծրագրի շրջանակներում ավարտվել են դիտարկումները Շիրակի մարզի Քարախաչի լեռնանցքում: Ընկերությունն արդեն ստացել է Հանրային ծառայությունները կարգավորող հանձնաժողովի լիցենզիան, «Քարախաչ-1» հողմաէլեկտրակայանի շինարարության համար, որի ընդհանուր հզորությունը սահմանվել է 20 ՄՎտ: Իսկ հետագայում նախատեսվում է մեծացնել հզորոթյունը մինչև 140 ՄՎտ: