Արմինֆո.HSBC Բանկ Հայաստանը, հավատարիմ մնալով կորպորատիվ-սոցիալական պատասխանատվության սկզբունքներին, վերջերս անցկացրել է բաց դռների օր՝ քաղաքացիների ֆինանսական գրագիտության բարձրացման և բանկային ծառայությունների և պրոդուկտների վերաբերյալ իրազեկվածության խթանման նպատակով: Միջոցառման ընթացքում բանկի ղեկավարությունն այցելուներին պարզաբանել է այնպիսի թեմաներ, ինչպես՝ ֆինանսների և խնայողությունների արդյունավետ կառավարումը, սպառողների իրավունքների պաշտպանությունը, բանկային պրոդուկտների հետ կապված ռիսկերի կառավարումն ու գնահատումը, ծախսերի օպտիմալացումը և այլն:
HSBC Բանկ Հայաստանը կարևորում է ֆինանսական գրագիտությունը՝ որպես ժամանակակից աշխարհում հաջողության հասնելու կարևոր գրավականներից մեկը: HSBC Բանկ Հայաստանի գործունեության և զարգացման ծրագրերի մասին ԱրմԻնֆո-ի թղթակցին հարցազրույցում պատմել է գլխավոր գործադիր տնօրենի տեղակալ, ռիսկերի կառավարման գծով տնօրեն Արամ Փինաջյանը:
HSBC Բանկ Հայաստանի վարկային ռիսկի վերաբերյալ 2018 թվականի արդյունքներով հրապարակված հաշվետվությունը վկայում է ռիսկային վարկերի ծավալների կրճատման մասին: Ընդ որում, դատելով շահույթի կտրուկ աճից (վնասից պլյուսային մակարդակի դուրս գալով)՝ կարելի է եզրակացնել, որ բանկին հաջողվել է խնդրահարույց վարկերի խնդիրը լուծել դրանց վերադարձման, այլ ոչ թե՝ դուրսգրման ճանապարհով: Եվ քանի որ բանկը չի հրապարակում վարկային ռիսկն ըստ տնտեսության ճյուղերի, իսկ վարկերի գերակշռող մասը առկա է արդյունաբերության, առևտրի, հանրային սննդի և ծառայությունների ոլորտներում, հետաքրքիր էր իմանալ, թե ինչպիսին է այդ ոլորտներին տրամադրված վարկերի որակի հետ կապված իրավիճակը:
Ինչպես նշում եք, 2018 թվականի ընթացքում «Էյչ Էս Բի Սի Բանկ Հայաստան» ՓԲԸ-ի (HSBC Հայաստան) ընդհանուր պորտֆելի մեջ զգալիորեն նվազել է չաշխատող վարկերի տեսակարար կշիռը, ինչը պայմանավորված է նախորդ տարվա ընթացքում գրանցված զգալի հետբերումներով/հավաքագրումներով, որին մասնակիորեն նպաստել է նաև տնտեսության ակտիվացումը: Հարկ է նշել, որ ակտիվ համագործակցություն է իրականացվել բոլոր խնդրահարույց հաճախորդների հետ, փորձել ենք գտնել ամենաարդյունավետ և փոխշահավետ տարբերակները ոչ միայն բանկի, այլ նաև հաճախորդների տեսանկյունից: Ինչ վերաբերում է տնտեսության առանձին ճյուղերին, դրանց գծով առանձնահատուկ ռիսկեր չեն արձանագրվել, և խնդրահարույց պորտֆելի նվազում է գրանցվել գրեթե համամասնորեն բոլոր ճյուղերում:
Հիմնականում ո՞ր հաճախորդների վրա է մտադիր կենտրոնանալ HSBC Բանկ Հայաստանը 2019 թվականին ՝ ֆիզիկական, թե՞ իրավաբանական անձանց: Եվ ինչո՞վ է թելադրված այդ մարտավարությունը։
Ինչպես նախորդ տասնամյակում, այնպես էլ 2019 թվականին HSBC Հայաստանը աշխատելու է շուկայում իր մասնաբաժինը ավելացնել երեք հիմնական ուղղություններով` բանկային մանրածախ ծառայություններ, առևտրավարկային (կորպորատիվ) բանկային ծառայություններ և ֆինանսական շուկայական գործառնություններ: Աճ է ակնկալվում թե´ ֆիզիկական և թե´ իրավաբանական անձանց հետ համագործակցության բնագավառներում: Բանկը շարունակելու է ակտիվ մասնակցություն ունենալ առևտրի միջազգային ֆինանսավորման ծառայությունների տրամադրման ոլորտում՝ հավատարիմ մնալով իր կողմից որդեգրած երկարաժամկետ քաղաքականությանը:
Ինչո՞ ւ է HSBC Հայաստան Բանկը կրճատել է ներդրումները տնտեսության այնպիսի առանցքային ոլորտներում, ինչպիսիք են՝ արդյունաբերությունը և ագրոհատվածը՝ միաժամանակ ակտիվացնելով առևտրի և ծառայությունների ոլորտի ֆինանսավորումը: Եվ եթե այդ միտումը շարունակություն ունենա 2019 թվականին, ապա ինչո՞վ դա կպայմանավորեք։
Հարկ է նշել, որ 2018 թվականի վերջի դրությամբ արդյունաբերության ոլորտում տեղաբաշխված վարկերի տեսակարար կշիռը ընդհանուրի մեջ հանդիսանում է երկրորդ ամենամեծը՝ կազմելով շուրջ 20 տոկոս: Հանդիսանալով միջազգային խմբի անդամ, HSBC Հայաստանը որդեգրել է Խմբի կողմից մշակված ներդրումային քաղաքականությունը, ինչը ենթադրում է առավել մեծ ներգրավվածություն որոշ ոլորտներում և ավելի սահմանափակ՝ այլ ոլորտներում։ Դա արվում է հաշվի առնելով ներքին շուկայի առանձնահատկությունները և զարգացման նախադրյալները: Ընդհանուր առմամբ, բանկի քաղաքականության մեջ է մտնում վարկային պորտֆելի դիվերսիֆիկացումը և տնտեսության տարբեր ոլորտներում ներկայացված լինելը:
2019 թվականի համար աճի հիմնական ուղղություններ են ընտրված մեծածախ և մանրածախ առևտուրը (արտահանման և ներմուծման վրա հիմնված), ծառայությունների ոլորտը (այդ տվում տրանսպորտի և կապի ոլորտները), արդյունաբերությունը և էներգետիկան, ինչպես նաև բնակելի անշարժ գույքի ձեռքբերման ֆինանսավորումը:
Ի՞նչ հիմնական խնդիրներ (առաջնահերթություններ) են դրված HSBC Բանկի Հայաստանի 2019 թ. ռազմավարական զարգացման ծրագրում:
HSBC Հայաստանը շարունակելու է հետամուտ լինել իր առաքելությանը, այն է՝ լինել առաջատար միջազգային բանկը Հայաստանում: Բանկի նպատակն է լինել այնտեղ, որտեղ կա զարգացում՝ աջակցելով գործարարության զարգացմանն ու տնտեսության բարգավաճմանը, ինչպես նաև հաճախորդների և գործարարների առջև բացել նոր հնարավորություններ և ստեղծել տնտեսական զարգացման համար անհրաժեշտ նախապայմաններ: Հանդիսանալով «Էյչ էս Բի Սի» Խմբի անդամ՝ բանկը շարունակելու է սերտորեն համագործակցել Խմբի այլ բանկերի և ֆինանսական հաստատությունների հետ` նպատակ ունենալով մեր հաճախորդներին մատուցել բարձրորակ և բազմաբնույթ բանկային ծառայություններ:
Բանկը շարունակելու է խիստ որակական և քանակական չափորոշիչներ կիրառել օրենսդրական համապատասխանության և ֆինանսական հանցագործությունների կանխարգելման (փողերի լվացում, սանկցիաներ, կոռուպցիա) համատեքստում, ինչպես նաև ապահովել գործառնական և վարկային ռիսկերի արդյունավետ կառավարումը և վերահսկումը:
Ակտիվների, վարկային ներդրումների, շահույթի ինչպիսի՞ աճ եք նախատեսում է ապահովել 2019 թվականին:
Մեր նպատակն է լինել շահութաբեր և ունենալ շուկայի մասնաբաժին մեր կողմից նախանշված ոլորտներում։ Ինչպես արդեն նշեցինք, բանկը ձգտում է աջակցել գործարարության զարգացմանն ու գործարարների առջև բացել նոր հնարավորություններ՝ միաժամանակ ստեղծելով տնտեսական զարգացման համար անհրաժեշտ ուժեղ նախապայմաններ:
Շոշափելի՞ է արդյոք Հայաստանում հաճախորդների կողմնորոշումը դեպի ծառայությունների այլընտրանքային հեռահար կապուղիներ: Որքանո՞վ է բանկը նախապատվություն տալիս հենց այդ կապուղիներին, և ինչ ծառայություններ են արդեն տեղափոխվել հեռահար դաշտ: Արդյո՞ք դա է պատճառը, որ է HSBC Բանկ Հայաստանը չի ցանկանում ընդլայնել մասնաճյուղային ցանցը:
Պետք է նշել, որ վերջին տարիների ընթացքում գրանցվել է հեռահար/թվային բանկային ծառայությունների ծավալի զգալի աճ: «Էյչ-էս-Բի-Սի» Բանկի զարգացման առանցքային ուղղություններից մեկը թվային տեխնոլոգիանների ներդրումն է: Բանկի թվային ծառայությունների ցանկում ընդգրկված են առավել մեծ պահանջարկ վայելող անկանխիկ ֆինանսական գործառնությունները, ինչպիսիք են օրինակ փոխանցումները, ժամկետային ավանդների բացումը և Բանկի հետ անվտանգ հեռահաղորդակցությունը: Համաձայն վերջին վիճակագրական տվյալների HSBC Հայաստանի ֆիզիկական անձ հաճախորդների ավելի քան 57 տոկոսը և իրավաբանական անձ հաճախորդների ավելի քան 80 տոկոսը ակտիվորեն օգտագործում են թվային բանկային ծառայությունները: Այս հանգամանքով է նաև պայմանավորված մասնաճյուղային ցանցի ընդլայնման խիստ անհրաժեշտության բացակայությունը: