ՀԾԿՀ. Առաջիկայում "Հայաստանի էլեկտրական ցանցեր" ՓԲԸ-ն կներկայացնի ընկերության ներդրումային ծրագրի ուսումնասիրության նպատակով անցկացված աուդիտի արդյունքները

Արմինֆո.Մոտ ժամանակներս "Հայաստանի էլեկտրական ցանցեր" ՓԲԸ-ն կներկայացնի ընկերության ներդրումային ծրագրի ուսումնասիրության նպատակով անցկացված աուդիտի արդյունքները եւ սակագնային բաղադրիչի վրա դրա հնարավոր ազդեցությունը: Այդ մասին դեկտեմբերի 25-ին ամփոփիչ մամուլի ասուլիսի ժամանակ ասել է ՀԾԿՀ նախագահ Գարեգին Բաղրամյանը։

Նրա խոսքով,  աուդիտորը՝ ի դեմս Grant Thornton ընկերության, ընտրվել է մրցութային հիմունքներով։ Հետազոտություններն իրականացվել են առաջարկվող տեխնիկական առաջադրանքների հիման վրա։   Աուդիտի նպատակն էր ուսումնասիրել "ՀԷՑ " ՓԲԸ ներդրումային ծրագրի հնարավոր ազդեցությունը սպառողների համար վերջնական սակագնի վրա: Բացի այդ, հետազոտություններն անհրաժեշտ էին նաեւ նախագծի վերաբերյալ հավաստի տվյալներ ստանալու եւ ընկերության ներդրումային ծրագրի գնահատման ավելի արդյունավետ մեթոդների կիրառման համար:

Նման աշխատանքները կդառնան պարտադիր եւ կանցկացվեն տարին մեկ անգամ, ինչը թույլ կտա ապահովել ներդրումների հավաստիությունն ու դրանց ազդեցությունը սակագների վրա: Այս պրակտիկան կտարածվի նաև այլ ընկերությունների վրա, իսկ աուդիտորների համար, ովքեր ուսումնասիրություններ կկատարեն, արդեն հաջորդ տարի կառաջարկվեն նոր տեխնիկական առաջադրանքներ։