Արմինֆո.ՀՀ կառավարությունն առաջարկել է բարեխիղճ հարկատուների խրախուսման նոր մեխանիզմ: Ազգային ժողովի տնտեսական հարցերի հանձնաժողովն ապրիլի 3-ի նիստում դրական եզրակացություն է տվել Հարկային օրենսգրքում ՀՀ կառավարության ներկայացրած փոփոխություններին:
Ֆինանսների նախարարի տեղակալ Արման Պողոսյանի ասելով՝ առաջարկվում է, մասնավորապես, սահմանել ընկերությունների կանոնադրական կապիտալում վերաներդրված շահաբաժիններից ֆիզիկական անձանց վճարած եկամտահարկի փոխհատուցման մեխանիզմ: Փոխնախարարը նշել է, որ եթե, օրինակ, ֆիզիկական անձի համար հայտարարվել է 100 միավոր շահաբաժին վճարելու մասին, ապա այդ ծավալից 5 միավորն ուղղվում է պետական բյուջե, իսկ մնացած 95-ը փոխանցվում է բաժնետիրոջը: Այժմ վերջինիս առաջարկվում է 95 միավորից ընկերության կանոնադրական կապիտալում վերաներդրում իրականացնել, առնվազն, վճարված եկամտահարկի չափով, որի գումարը նրան կվերադարձվի պետության կողմից:
Առաջարկվող փոփոխությունները նպատակ ունեն խրախուսել բաժնետերերին իրականացնել վերաներդրումներ: Այնուամենայնիվ, նորարարությունը կտարածվի բացառապես այն բաժնետերերի վրա, որոնք բնութագրվում են հարկային կարգապահության բարձր մակարդակով: Օրինագծում ներկայացված են այն հիմնական կանոնները, որոնցով պետք է առաջնորդվեն ֆիզիկական անձինք: Խոսքը, մասնավորապես, հարկային հաշվարկներ և հայտարարագրեր հարկային մարմին չներկայացնելու, հաշվիչ-դրամարկղային մեքենաներ չկիրառելու, չգրանցված աշխատող գրանցելու և այլնի կրկնակի դեպքերի մասին է: Ըստ էության, վարչական ակտով ամրագրված Հարկային օրենսգրքի 408-րդ, 410-րդ, 412-րդ, 415-րդ և 416-րդ հոդվածների պահանջներից որևէ մեկի խախտումը կհանգեցնի հարկային արտոնությունների կիրառումից հրաժարվելու:
Օրինագիծն ուժի մեջ կմտնի այս տարվա հուլիսի 1-ից ։
RUB | 4.17 | -0.05 |
USD | 387.81 | -0.27 |
EUR | 415.62 | -0.67 |
GBP | 485.89 | 0.32 |
CAD | 284.05 | -0.11 |
JPY | 24.88 | 0.13 |
CNY | 53.56 | 0.01 |
CHF | 425.46 | 0.12 |