Հինգշաբթի, 4 Մարտի 2010 14:51

HSBC Բանկ Հայաստան. Որակյալ բիզնես վարկեր հին ու նոր հաճախորդների համար

ԱրմԻնֆո. HSBC Բանկ Հայաստանի նորանշանակ գլխավոր գործադիր տնօրեն Աստրիդ Քլիֆֆորդի հարցազրույցը ԱրմԻնֆո գործակալությանը

HSBC Բանկ Հայաստանը ճգնաժամային 2009 թվականին ապահովեց բոլոր ցուցանիշների աճ: Պաշտոնական կանխատեսումներով 2010 թվականը կլինի ավելի հաջողված: Ինչպիսի՞ կանխատեսումներ ունեք այս տարվա համար, մասնավորապես, ՀՆԱ-ի, ֆինանսական շուկայի զարգացման, բանկային համակարգի և HSBC Բանկ Հայաստանի վարկային պորտֆելի դինամիկայի, վերաբերյալ: Ինչ եք կարծում, կարելի՞ է արդյոք 2010 թվականին ակնկալել ժամկետանց վարկերի նվազեցում:

Շուկայի կայունացման որոշակի միտումներ մենք նկատում ենք, և հուսով ենք, որ 2010 թվականը կարձանագրի տնտեսական աճ: Մենք, ինչպես նաև շատ ուրիշ փորձագետներ, այս տարի ակնկալում ենք ՀՆԱ 1-1.25% աճ: Վարկերի նկատմամբ պահանջարկը դեռևս ցածր է, չնայած որ հունվար-փետրվար ամիսներին դիտվեց որոշակի ակտիվություն: Ընդհանուր առմամբ, ընթացիկ տարում Հայաստանի վարկային շուկայում մենք ակնկալում ենք տեսնել աճի դրական դինամիկա և մրցակցության ուժեղացում:

Ճգնաժամի հետևանքները դեռևս նկատելի են, դատելով փոխառուների պարտքերի սպասարկումից, իսկ այդ ամենը կարող է ազդել նաև բանկային համակարգի միագումար վարկային պորտֆելի վրա: Այնուամենայնիվ, մեր ակտիվները որակյալ են և մշտական հսկողության դեպքում մինչև տարեվերջ դրանց վատթարացում չի սպասվում: Հայտնի պատճառներով, անցյալ տարի վարկային շուկայում մենք զգույշ էինք, սակայն 2010 թվականին ավելի ակտիվ կլինենք և ուզում ենք որակյալ բիզնես-վարկերով ապահովել ինչպես մեր մշտական, այնպես էլ նոր հաճախորդներին:

Հայաստանի հիփոթեքային շուկան այսօր ապրում է իր ՙոչ-լավագույն օրերը՚: Շուկայական պահանջարկի տեսանկյունից արդարացվա՞ծ եք համարում արդյոք HSBC Բանկ Հայաստանի կողմից հիփոթեքային վարկավորման վերսկսումը: Ինչպիսի՞ն է այսօր բանկի հիփոթեքային պորտֆելը: Ի՞նչ պայմաններով է բանկը տրամադրում հիփոթեքային վարկերը:

Իրականում մենք երբեք էլ չէինք դադարեցրել հիփոթեքային վարկերի տրամադրումը: Անցյալ տարի տեղի ունեցած դրամի արժեզրկումը բերեց դրամային իրացվելիության պակասի, հետևաբար, մենք ստիպված էինք ժամանակավորապես կանգնեցնել դրամային հիփոթեքային վարկերի տրամադրումը: Սակայն դոլարով տրամադրվող հիփոթեքային վարկերը եղել և մնում են մատչելի դոլարային եկամուտներ ունեցող թե ֆիզիկական, և թե իրավաբանական անձանց համար: Ներկայումս մեր հիփոթեքային պորտֆելը կազմում է մոտ 21 մլրդ.դրամ, գույքով ապահովված մանրածախ վարկերի հետ միասին: ՀՀ դրամով հիփոթեքային վարկեր մենք տրամադրում ենք Ազգային հիփոթեքային ընկերության կողմից իրականացվող վերաֆինանսավորման ծրագրի շրջանակներում: Մենք նախատեսում ենք նաև ՙԵրիտասարդ ընտանիքների համար մատչելի բնակարաններ՚ նոր ծրագրի շրջանակներում վերաֆինանսավորում ստանալու հնարավորությունները:

HSBC Բանկ Հայաստանն իր գործունեության ամբողջ ընթացքում աչքի է ընկել միջազգային, մասնավորապես արտահանման-ներմուծման վարկավորման ծառայություններ մատուցելով: Աշխարհում ստեղծված նոր իրավիճակն արդյո՞ք չի փոխել բանկի այդ դիրքորոշումն ի օգուտ ներքին շուկայի: Կարելի՞ է իմանալ, թե ներկայումս ինչպիսին է խոշոր բիզնեսի սուբյեկտներին, ինչպես նաև փոքր և միջին բիզնեսին տրամադրվող վարկերի պորտֆելը:

Գլոբալ տնտեսական անկման ընթացքում HSBC Բանկ Հայաստանը շարունակում էր հավատարիմ մնալ առաջատարի իր ռազմավարությանը, ֆինանսական լուծումներ առաջադրելով միջազգային առևտրով զբաղվող ընկերություններին: Մեր համաշխարհային ներկայությունը մեզ համար ունիկալ հնարավորություններ է ստեղծում ընկերությունների դիրքորոշման և առևտրի ֆինանսավորման, այդ թվում նաև արտահանում-ներմուծում իրականացնող ընկերությունների համար: Չնայած 2009 թվականին Հայաստանում տեղի ունեցած տնտեսական 14.4% և արտաքին առևտրի շրջանառության 27% անկմանը (արտահանումը կրճատվեց 34%, իսկ ներմուծումը` 25%), մեզ հաջողվեց ավելացնել առևտրի ֆինանսավորման ծավալները, ուժեղացնելով միջազգային կողմնորոշում ունեցող ընկերություններին տրամադրվող օգնությունը, ինչը 2010 թվականին բանկի համար կմնա գերակայություն ունեցող ուղղություն: Հունվարի վերջի դրությամբ մեր բիզնես-վարկերի պորտֆելը կազմել է 108 մլն.դոլար, որի 30 մլն.դոլարը կազմում են փոքր և միջին բիզնեսին տրամադրված վարկերը: Այս պայմաններով մենք դեռևս շարունակում ենք մնալ մրցունակ, քանի որ մեր ռազմավարությունը նախատեսում է ՓՄՁ տրամադրվող ծառայությունների ակտիվություն:

Ըստ ռազմավարական զարգացման ձեր ծրագրի ինչպիսի՞ն են բանկի կանխատեսումները 2010 թվականի վերաբերյալ: Շուկայի որ հատվածները 2010 թվականին բանկի համար կդառնան գերակայելի:

Մենք նախատեսում ենք աճ ապահովել մեր բիզնեսի բոլոր ուղղություններով, քանի որ մեր նպատակը ծառայությունների ամբողջական փաթեթի տրամադրումն է` ինչպես ֆիզիկական, այնպես էլ իրավաբանական անձանց (այդ թվում փոքր, միջին և խոշոր բիզնեսին): Ինչպես արդեն նշեցի, հաշվի առնելով մեր միջազգային փորձը և աշխատանքի հմտությունը, մենք մեր ուշադրությունը կկենտրոնացնենք այլ երկրների հետ աշխատող հաճախորդների վրա: Այսպես, մենք կուզենայինք մեր ներկայությունն ընդլայնել հայկական Սփյուռքի հաճախորդների շրջանում: Ընդհանուր առմամբ, մենք կքննարկենք երկարաժամկետ խնայողությունները խթանող ծառայությունները, ինչպես նաև կշարունակենք ինտերնետ- և հեռա-բանկինգի ոլորտներում ուղղակի ներդրումները:

Ինչպե՞ս եք գնահատում խոշոր բիզնեսի համաֆինանսավորման ուղղությամբ Վերակառուցման և Զարգացման Եվրոպական բանկի (EBRD) ծրագիրը:

Ներկայումս կան մի շարք խոշոր նախագծեր, որոնք EBRD համապատասխան պայմանագրի շրջանակներում նախատեսում են համաֆինանսավորում: Մենք գտնում ենք, որ այդ սխեման լավ հնարավորություններ է ստեղծում մեծ մասշտաբի ֆինանսավորում ապահովելու և փոխառու միջոցներով հաճախորդների պահանջները բավարարելու համար:

HSBC Բանկ Հայաստանը 2009 թվականին լուրջ ներդրումներ ուղղեց այնպիսի ծառայություններին, ինչպիսիք են հեռախոսային- և ինտերնետ բանկինգը: Արդարացվա՞ծ են արդյոք այդ ներդրումները: Նշված ծառայություններով քանի” նոր հաճախորդների հաջողվեց ներգրավել: Ինչքանո”վ է երկրի բնակչությունը պատրաստ բանկային նոր տեխնոլոգիաների կիրառմանը: Նախատեսո՞ւմ եք արդյոք 2010 թվականին բանկի մասնաճյուղերի ցանցի ընդլայնում:

Հեռախոսային- և ինտերնետ-բանկինգի նախագծին անցյալ տարի ուղղվեց 2.5 մլն.դոլար: Հեռախոսային բանկինգը սկսեց գործարկվել մարտ ամսից, իսկ ինտերնետ-բանկինգը` հուլիսից: Նշված ծառայություններով մենք 2009 թվականի ավարտին արդեն ունեինք համապատասխանաբար` 12000 և 2000 հաճախորդ: Նշված կարճ ժամանակահատվածի ընթացքում ռեսուրսների օգտագործման նման բարձր մակարդակը խոսում է բանկային ինովացիոն տեխնոլոգիաների կիրառմանը բնակչության պատրաստ լինելու մասին: Իհարկե, on-line ծառայության գլխավոր առավելությունը կայանում է նրանում, որ այն հաճախորդներին հնարավորություն է տալիս գործարքներն իրականացնել ուղղակի տանից կամ աշխատավայրից, հարմար ժամանակում: Չէ որ մեր նպատակը մեր հաճախորդներին իրենց պահանջներին համապատասխան սպասարկելն է, կլինի դա ավանդական դարձած մասնաճյուղերի, թե on-line ռեժիմի, այդ թվում բանկոմատների ցանցի միջոցով, որոնց քանակով մենք առաջատար դիրքեր ենք զբաղեցնում Երևանում: Դա մեր ուշադրության կենտրոնում կմնա նաև ապագայում:

Ինչպիսի՞ն են բանկի պլանները կապված քարտային բիզնեսի հետ: Նշեք, խնդրեմ, բանկի կողմից թողարկված ակտիվ քարտերի, ինչպես նաև բանկոմատների ու POS-թերմինալների քանակը: Ինչքանո՞վ եք մտադիր դրանց թիվն ավելացնել մինչև 2010 թվականի ավարտը:

Ներկայումս մենք ունենք մոտ 15000 թողարկված վարկային քարտեր (ArCa և Mastercard) և մտադիր ենք մինչև 2010 թվականի ավարտը դրանց թիվն ավելացնել մոտ 30%-ով: Մեր բանկային ցանցում գործում են 50 բանկոմատներ: Բանկն ունի մոտ 100 POS-թերմինալ, հիմնականում Երևանում, առևտրի կարևորագույն կենտրոններում, և նախատեսում ենք էապես ավելացնել դրանց քանակը: Դրանց բացի, շուտով մենք մտադիր ենք ներդնել ArCa Link-ը, իսկ մինչև տարեվերջ հուսով ենք թողարկել չիպերով դեբետային քարտեր: Մմտադիր ենք տեղադրել նաև բազմաֆունկցիոնալ բանկոմատներ, որոնց օգնությամբ հաճախորդները կարող են իրենց բանկային հաշվին մուտքագրել գումարներ: Մեր ընթացիկ ռազմավարության մի մասն ուղղված է on-line ծառայությունների ընդլայնմանը:

Հարցազրույցը վարեց Լիլիթ Ասլանյանը

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.17	-0.01
USD	387.32	-0.13
EUR	432.44	0.24
GBP	518.62	0.21
CAD	287.39	-0.33
JPY	27.04	0.20
CNY	55.24	-0.02
CHF	459.07	2.01

Նորություններ

HSBC Բանկ Հայաստան. Որակյալ բիզնես վարկեր հին ու նոր հաճախորդների համար