Հինգշաբթի, 27 Հոկտեմբերի 2011 16:04
Commerzbank-ը հաստատել է ՓՄՁ ֆինանսավորման նպատակով Ամերիաբանկին տրամադրվող վարկը
ԱրմԻնֆո. Ամերիաբանկը շարունակում է ակտիվ համագործակցությունը օտարերկրյա կառույցների հետ` ֆինանսական միջոցների ներգրավման ուղղությամբ:
Առաջին անգամ հեղինակավոր Commerzbank-ը հայաստանյան բանկի համար` ի դեմս Ամերիաբանկի, հաստատեց խոշոր գումարի վարկ, առանց որևէ ապահովվածության /bilateral loan/:
Ինչպես ԱրմԻնֆո գործակալությանը տեղեկացվել է Ամերիաբանկի մամուլի ծառայությունից, Commerzbank-ը կնքեց նման գործարք, հիմք ընդունելով Ամերիաբանկի` որպես հուսալի գործընկերոջ հեղինակությունը, ֆինանսական կայուն վիճակը, միջազգային ասպարեզում մեծ վստահություն ներշնչող գործունեությունը:
Ամերիաբանկի կողմից ներգրավվող վարկը հիմնականում կուղղվի փոքր և միջին բիզնեսի վարկավորմանը`ապահովելով հաճախորդների համար վարկավորման մրցունակ պայմաններ:
Ի դեպ, առաջին անգամ է միջազգային բանկի կողմից վարկավորվում իր հետ փոխկապվածություն չունեցող հայաստանյան բանկ` առանց ապահովվածության, երաշխիքների և երաշխավորությունների:
Նշենք նաև, որ իր բնույթով աննախադեպ գործարք Commerzbank-ը Ամերիաբանկի հետ կնքում է երկրորդ անգամ: Ընթացիկ տարվա մայիս ամսին Commerzbank-ը Ամերիաբանկի համար հաստատել էր բանկային երաշխիք` ազգային արժույթով: