Երկուշաբթի, 23 Հունվարի 2012 19:28
Հայաստանի բնակարանների շուկայում ակտիվությունն աճում է, գտնում է Estate.am մասնագիտացված պորտալի վերլուծաբանները
ԱրմԻնֆո. Սեզոնային ավանդական պասիվությունից հետո Հայաստանի բնակելի անշարժ գույքի շուկայում ակտիվությունն սկսում է աճել: ԱրմԻնֆո գործակալության թղթակցին նման կարծիք է հայտնել անշարժ գույքի Estate.am մասնագիտացված պորտալը մշակող` ՙԲոնսայ՚ ընկերության տնօրեն Նելլի Սուրովան, հիմնվելով պորտալի վիճակագրության վրա: Ըստ ինտերնետ-պորտալի վերլուծաբանների կանխատեսումների, գարնանն սպասվում է շուկայի ակտիվացում:
Հենվելով Estate.am պորտալի վիճակագնության վրա, կարելի է հետևել մայրաքաղաքի այս կամ այն շրջանների ակտիվության միտումներին, իսկ պորտալի և առաջատար կառուցապատողների համագործակցության շրջանակներում կարելի է հետևել նաև առաջնային շուկայի առաջարկների ծավալներին:
Այսպես, ներկայումս բնակարանների վաճառքի պահանջարկի ամենամեծ քանակը գրանցվել է Արաբկիր համայնքում, որտեղ 1 ք.մ. միջին գինը սահմանվել է 1086 հազ.դրամ: Բավականին ակտիվ է նաև Փոքր Կենտրոնը, որտեղ այս ցուցանիշը կազմում է 1564 հազ. դրամ: Առաջարկների քանակով հաջորդ տեղում են Մեծ Կենտրոնը և Աջափնյակ համայնքը, որտեղ գները համապատասխանաբար կազմում են 1193 հազ.դրամ և 744 հազ.դրամ, իսկ Ավանում այս ցուցանիշը կազմում է 746 հազ.դրամ:
Արաբկիր համայնքն ակտիվ է նաև մասնավոր տների վաճառքի վերաբերյալ առաջարկների քանակով, որտեղ 1 ք.մ.-ի գինն առաջարկվում է 1563 հազ.դրամով: Այնուհետև հաջորդում է Նորք-Մարաշ համայնքը, որտեղ այս ցուցանիշը կազմում է 1251 հազ.դրամ:
Estate.am կայքում ներկայացված են նաև բնակարանների վարձակալության հայտարարություններ: Ըստ պորտալի վիճակագրության, բնակարանների վարձակալությունն ավելի շատ մասսայականություն է վայելում Փոքր Կենտրոնում, որտեղ մեկ սենյականոց բնակարանի վարձակալության դիմաց պահանջվում է 160-180 հազ. դրամ: Արաբկիրում այս ցուցանիշը կազմում է մոտ 100 հազ.դրամ, իսկ, օրինակ, Մեծ Կենտրոնում`110-120 հազ.դրամ:
Նշենք, որ Estate.am ինտերնետ-պորտալը գործարկվել է անցյալ տարվա մարտ ամսին: Այսօր այն պարունակում է առաջնային և երկրորդային բնակարանների, առևտրային տարածքների և հողատարածքների վաճառքի/վարձակալության ավելի քան 8 հազար հայտարարություն: Վերջերս պորտալը գործարկել է նաև Հայաստանում միակ` հայտարարությունների iPhone հավելվածը: Պորտալն օրական այցելում է ավելի քան 2000 մարդ:
Վերջերս պորտալը գործարկել է նոր` Bnakaran.am նախագիծը, որտեղ հաշված վայրկյանների ընթացքում կարելի է տեղադրել հայտարարություն:
ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ