Հինգշաբթի, 12 Դեկտեմբերի 2013 19:04
Կոնվերս Բանկն ամենաակտիվ քարտապանին կտրամադրի Իտալիայի ուղեգիր
ԱրմԻնֆո. Կոնվերս Բանկն իր Visa քարտերի ամենաակտիվ քարտապանին կտրամադրիԻտալիայի ուղեգիր: Ինչպես այսօր կայացած մամուլի ասուլիսում հայտարարել է Կոնվերս Բանկի գլխավոր տնօրեն Տիգրան Դավթյանը, սույն թվականի դեկտմբերի 1-ից մինչև 2014 թվականի ապրիլի 30-ը բանկի այն քարտապանը, որը Visa քարտով կկատարի 500 հազ.դրամ և ավելի գումարի անկանխիկ գործարքներ, կդառնա «Մեկնիր Վենետիկ» բոնուսային ակցիայի մասնակից:
Տ.Դավթյանի խոսքերով, ակցիայի շրջանակներում յուրաքանչյուր գործարքի դիմաց քարտապանը կստանա 2 բոնուսային միավոր և լրացուցիչ մեկ միավոր` յուրաքանչյուր 100 դրամ անկանխիկ գործարքի դիմաց: Ըստ առաջարկվող պայմանների՝ ակցիայի 5 ամիսների ընթացքում VISA քարտով 500,000 ՀՀ դրամը գերազանցող անկանխիկ շրջանառություն ապահոված և գումարային ու քանակական գործարքների արդյունքում ամենաշատ միավորներ հավաքած քարտապանը կճանաչվի ակցիայի հաղթող: Միավորների հավասարության դեպքում հաղթող է ճանաչվում քանակային թվով առավել շատ գործարքներ իրականացրած քարտապանը: 2-րդ և 3-րդ տեղերը զբաղեցրած քարտապանները կշահեն «SMART» հեռուստացույցներ, իսկ 4-րդ և 5-րդ տեղերը՝ Ipad-mini:
«Անցյալ տարի իրականացված նմանատիպ «Կոնվերս Գոլ» ակցիայի արդյունքում Visa քարտերով տրանսակցիաների ծավալն աճեց 40%, ինչը վկայում է ոչ միայն Հայաստանում անկանխիկ գործարքների մշակույթի բարձրացման, այլ նաև նման միջոցառումների նկատմամբ հասարակոթյան հետաքրքրության մասին: Ներկայումս Կոնվերս Բանկն ունի 130 հազ.ակտիվ քարտ, որոնց 45%-ը կազմում են Visa քարտերը, իսկ 35 %-ը`MasterCard քարտերը: Սեփական պրոցեսինգային կենտրոնի ստեղծման ուղղությամբ մենք կմտածենք, երբ բանկի ակտիվ քարտերի թիվը գերազանցի 200 հազարը: Կոնվերս Բանկի քարտերով ամսական շրջանառությունը կազմում է 8 մլրդ.դրամ, որոնց 17%-ը կամ 1.3 մլրդ. դրամը տեղի է ունենում անկանխիկ գործարքներով: Սա լավ ցուցանիշ է Հայաստանի համար, բայց միջազգային չափանիշներով`ցածր մակարդակ է»,-հաղորդել է Տ.Դավթյանը, պատասխանելով ԱրմԻնֆո գործակալության թղթակցի հարցին, միաժամանակ հավելելով, որ նոյեմբերի վերջից, քարտային պրոդուկտների անվտանգությունը բարձրացնելու նպատակով, բանկը ձեռնամուխ է եղել իր քարտերը չիպային տեխնալոգիաներով քարտերի վերածելու գործընթացին: Նրա կարծիքով, Հայաստանի քարտային շուկայի ներուժը գնահատվում է 4 մլն.քարտ, ներկայիս 1.4 մլն.քարտի փոխարեն:
Նշենք, որ «Կոնվերս բանկ» ՓԲԸ - ն հիմնադրվել է 1993 թվականին: Բանկի բաժնետերերն են «Advanced Global Investments» ընկերությունը (95%) և Հայ Առաքելական եկեղեցին (5%): Բանկի մասնաճյուղային ցանցը բաղկացած է 34 բաժանմունքներից, որոնց մեծ մասը գտնվում է մարզերում: Այսօր բանկն ունի 80 բանկոմատ (50-ը մայրաքաղաքում և 30-ը` մարզերում), ինչպես նաև սեփական 365 POS-թերմինալ: Տեղական ArCa քարտերի թողարկումից ու սպասարկումից բացի բանկը թողարկում և սպասարկում է միջազգային Visa և MasterCard համակարգերի քարտեր: