Ուրբաթ, 20 Դեկտեմբերի 2013 19:28
IFC-ը և BSTDB-ը Յունիբանկին ՓՄՁ վարկավորումն ընդլայնելու հնարավորություն կընձեռեն
ԱրմԻնֆո. Համաշխարհային բանկի խմբի անդամ Միջազգային ֆինանսական կորպորացիան (IFC) և Առևտրի և զարգացման սևծովյան բանկը (BSTDB) կաջակցեն «Յունիբանկ» ՓԲԸ-ին ընդլայնելու Հայաստանում ՓՄՁ-ների վարկավորման հնարավորությունը`վերջիններիս օգնելով վերաճել ավելի մեծ ձեռնարկությունների և ստեղծել հավելյալ աշխատատեղեր: Համագործակցության պայմանագրի շրջանակներում, IFC-ն և BSTDB-ն Յունիբանկին կհատկացնեն յուրաքանչյուրը 5 մլն ԱՄՆ դոլար, որը կուղղվի փոքր և միջին ձեռնարկատիրության երկարաժամկետ վարկավորմանը: ՓՄՁ-ների վարկավորման և ռիսկերի կառավարման գործընթացի բարելավման նպատակով IFC-ն Յունիբանկին կմատուցի նաև խորհրդատվական ծառայություններ: Եվրոպայում և Կենտրոնական Ասիայում իրականացվող IFC-ի բանկային խորհրդատվական ծրագիրը ֆինանսավորվում է Ավստրիայի զարգացման բանկի կողմից:
Ինչպես ԱրմԻնֆո գործակալությանը հաղորդեցին բանկի մամուլի ծառայությունից, IFC-ի և BSTDB-ի նման միջազգային կազմակերպությունների ֆինանսավորման ծրագրերը համահունչ են բանկի ռազմավարությանը` դառնալու առավել շահավետ գործընկեր ՓՄՁ վարկառուների համար: «Միջազգային կառույցների հետ համագործակցության շնորհիվ, բանկը հնարավորություն կստանա ընդլայնելու բիզնես վարկավորման ծրագիրը` բարձրացնելով վարկային միջոցների հասանելիության մակարդակն ավելի մեծ թվով ձեռնարկատերերի համար: Վարկային միջոցները կուղղվեն ՓՄՁ-ների հետագա առաջխաղացմանը, ինչը կնպաստի Հայաստանում նոր աշխատատեղերի ստեղծմանն ու տնտեսության զարգացմանը», - ասել է Յունիբանկի վարչության նախագահ Վարդան Աթայանը: «Աջակցությունը ՓՄՁ ոլորտին երկրի տնտեսության զարգացման գլխավոր նախադրյալն է: Այդ վարկը համագործակցության արդյունք է և օրինակ այն բանի, որ միջազգային ֆինանսական կազմակերպությունները պետք է հնարավորինս ավելի շատ միջոցներ ներդնեն, մասնավորապես, նոր աշխատատեղերի ստեղծման և երկրի տնտեսական զարգացման համար` ընդհանուր առմամբ», - նշել է BSTDB նախագահ Անդրեյ Կոնդակովը: «Ֆինանսական միջոցների սահմանափակ հասանելիությունը դիտվում է որպես հիմնական խոչընդոտ մասնավոր հատվածի զարգացման համար, որն էլ, իր հերթին, առանցքային է աշխատատեղերի ստեղծման և Հայաստանի տնտեսության առաջխաղացման համար: Մեր համագործակցությունը Յունիբանկի հետ հնարավորություն կտա ընդլայնել ֆինանսավորումը տնտեսության աճը խթանող տարբեր ոլորտներում», - ասել է IFC-ի Հարավային Կովկասի տարածաշրջանի ղեկավար Թոմաս Լյուբեքը:
Համաշխարհային բանկի խմբի անդամ IFC-ն համաշխարհային զարգացման ամենախոշոր հաստատությունն է, որի ուշադրությունն ուղղված է մասնավոր հատվածին: Աշխատելով անհատ ձեռներեցների հետ ավելի քան 100 երկրներում, IFC-ն օգտագործում է իր կապիտալն ու ազդեցությունը ծայրահեղ աղքատությունը վերացնելու և կենսամակարդակը բարձրացնելու համար: Համաշխարհային տնտեսության համար անկայուն ժամանակներում IFC-ի ներդրումները 2013թ.-ի ֆինանսական տարում հասել են ամենաբարձր ցուցանիշին` 25 միլիարդ ԱՄՆ դոլարի: Սևծովյան առևտրի և զարգացման բանկը միջազգային ֆինանսական հաստատություն է, որը հիմնադրվել է Ալբանիայի, Հայաստանի, Ադրբեջանի, Բուլղարիայի, Վրաստանի, Հունաստանի, Մոլդովայի, Ռումինիայի, ՌԴ-ի, Թուրքիայի և Ուկրաինայի կողմից: ՍԱԶԲ-ի կենտրոնական գրասենյակը գտնվում է Հունաստանի Սալոնիկի քաղաքում: ՍԱԶԲ-ն աջակցում է տնտեսական զարգացմանը և տարածաշրջանային համա•ործակցությանը, տրամադրելով վարկեր, վարկային gծեր և երաշխիքներ անդամ երկրների հանրային և մասնավոր ոլորտներում առևտրի ֆինանսավորման և այլ նախագծերի համար: Բանկի կանոնադրական կապիտալը կազմում է 3.45 մլրդ Եվրո: ՍԱԶԲ-ին շնորհվել է Standard and Poor’s-ի կողմից երկարաժամկետ “A-” վարկանիշը և Moody’s-ի կողմից A3 վարկանիշը:
ԱրմԻնֆո գործակալության նախապատրաստած Հայաստանի բանկերի ֆինանսական վարկանիշի տվյալներով, Յունիբանկի ընդհանուր վարկային պորտֆելը 2013 թվականի հոկտեմբերի 1-ի դրությամբ կազմում է 106.9 մլրդ դրամ, ՓՄՁ պորտֆելը` 36.2 մլրդ դրամ կամ բանկի ընդհանուր վարկային ներդրումների 33,9%-ը: ՓՄՁ պորտֆելի աճն 9 ամիսներին կազմել է 30,4%, իսկ տարեկան կտրվածքով` 31,2%: Բանկի ակտիվները նշված ժամկետում կազմել են 162.3 մլրդ դրամ, իսկ ընդհանուր կապիտալը` 19.4 մլրդ դրամ: «Յունիբանկ» ՓԲԸ հիմնադրվել է 2001 թվականին: ՓՄՁ հատվածի խթանումն ու մանրածախ զարգացումը գերակայուն ուղղություններ են բանկի համար: Բանկի մասնաճյուղային ցանցն ունի 45 ստորաբաժանում: Որպես բանկի բաժնետեր հանդես են գալիս Ripatonso Holdings Limited` կապիտալում 75,44% մասնաբաժնով, Գագիկ Զաքարյանն ու Գեորգի Պիսկովը` 12,28-ական %.
Telcell-ը դուրս է գալիս ինստիտուցիոնալ զարգացման ուղի
Պետությունը պետք է ներդրողի հետ փոխհարաբերությունների կոշտ կանոններ սահմանի, այլ ոչ թե անկանոն կապերի մեջ մտնի նրա հետ. Արթուր Աշուղյան
Կառավարությունը հաստատել է Հայաստանի 2024-2040թթ. ժողովրդագրական ռազմավարությունը
«Հայաէրոնավիգացիա» ՓԲԸ-ն նոր գլխավոր տնօրեն ունի
Փորձագետ. Առաջիկա 2-3 տարում Հայաստանում անշարժ գույքի գները կբարձրանան
ՊԵԿ նախկին ղեկավար. Հայաստանում տնտեսությունն ու երկիրը փաստացի մրցում են, թե դրանցից որն ավելի արագ կփլուզվի