Ուրբաթ, 12 Դեկտեմբերի 2014 17:51

HSBC Բանկ Հայաստանը Հայաստանում Իտալիայի դեսպանության հետ համատեղ անց է կացրել «Առևտրի ֆինանսավորման ակադեմիայի» թվով 13-րդ սեմինարը

ԱրմԻնֆո. HSBC Բանկ Հայաստանը սույն թվականի դեկտեմբերի 12-ին անց է կացրել «Առևտրի ֆինանսավորման ակադեմիայի» թվով 13-րդ սեմինարը: Ինչպես միջոցառման ընթացքում հայտնել է HSBC Բանկ Հայաստանի գլխավոր գործադիր տնօրեն Թիես Կլեմենցը (Thies Clemenz), այս անգամ Ակադեմիան սեմինարը կազմակերպել էր Հայաստանում Իտալիայի դեսպանության հետ համատեղ: «Ես վստահ եմ, որ այս սեմինարը կնպաստի երկու երկրների առևտրատնտեսական հարաբերությունների զարգացմանը»,-ասել է նա: Նրա խոսքով, Հայաստանի գործարարներն արտասահմանյան շուկաներ դուրս գալիս բախվում են նույն պրոբլեմներին, ինչ աշխարհի բոլոր գործարարները, դա անծանոթ գործարար մթնոլորտն է, գործարար օրենսդրության և առևտրի փաստաթղթերի տարբերությունները, օտարերկրյա շուկաներում փորձի պակասը, փոխարժեքների տատանումները, և ամենակարևորը, ներդրված գումարները վերադարձնելու ուղղությամբ կասկածները: «Հայկական, ինչպես նաև բոլոր ընկերությունները, մշտապես կանգնած եմ ներքին շուկայում բիզնեսն ընդլայնելու երկմտանքի առջև, որտեղ իրավիճակը ծանոթ է ու հասկանալի, ինչպես նաև արտաքին շուկա դուրս գալու երկմտանքի առջև, որտեղ իրավաբանական, կազմակերպչական պրոբլեմների, ինչպես նաև առևտրի ոլորտում մշակույթի տարբերությունների հետ բախումներն անխուսափելի են»,-նշել է Թ.Կլեմանսը: Այս կապակցությամբ նա հավելել է, որ 2014 թվականին HSBC Բանկ Հայաստանն առաջատար դիրքեր է զբաղեցրել Global Trade Review միջազգային հեղինակավոր ամսագրի` «Առևտրի ֆինանսավորման առաջատարները» անվանակարգում, արժանանալով «Առևտրի գլոբալ ֆինանսավորման լավագույն բանկ» մրցանակին: Դա տեղի ունեցավ, ըստ Թ.Կլեմենցի, քանի որ հաճախորդների մեծ մասը քվեարկեց HSBC օգտին:

Հայաստանում Իտալիայի փոխդեսպան Մաուրիցո Կրոչատելլին էլ իր հերթն է ընդգծել նման նախաձեռնությունների կարևորոթյունը, նշելով, որ Իտալիայի և Հայաստանի միջև առևտրի ծավալները գնալով աճում են: «Այժմ վերջին տարիների տրենդները հայ գործարարներին ներկայացնելու ամենահարմար պահն է: Իտալիան իր գործարարներին տրամադրում է գործիքներ, որոնք թույլ են տալիս զարգացնել այլ երկրների, այդ թվում նաև Հայաստանի հետ հարաբերությունները, քանի որ վերջինս չի դիտարկվում որպես ռիսկային երկիր»,-նշել է նա: Առևտրի ծավալներով Իտալիան հանդիսանում է Հայաստանի 7-րդ խոշոր գործընկերը: Ըստ վիճակագրական տվյալների, Հայաստանի արտաքին առևտրի շրջանառության կառուցվածքում Իտալիայի մասնաբաժինը 2014 թվականի 10 ամիսներին կազմել է 3.8%: Հունվար-հոկտեմբերին երկու երկրների միջև առևտրի շրջանառությունը կազմել է 183.4 մլն.դոլար, տարեկան կտրվածքով աճելով 19.7%:

HSBC Բանկ Հայաստանի Առևտրի ֆինանսավորման դեպարտամենտի ղեկավար Կամո Մարգարյանը նշել է, որ բանկի կողմից 2014 թվականին սարքավորումների ներմուծման ֆինանսավորման նպատակով թողարկված փաստաթղթային ակրեդիտիվների 37%-ն ընկնում է Իտալիային, որի ծավալը կազմել է 8 մլն.դոլար: Իտալիայից Հայաստան են ներմուծվում, հիմնականում, արդյունաբերական սարքավորումներ, հոսքագծեր և հագուստ: HSBC Բանկ Հայաստանի առևտրի ֆինանսավորման ծավալները 2013 թվականին, 2012-ի համեմատ, աճել են 14%, մինչև 18 մլրդ.դրամ: Առևտրի ֆինանսավորումից եկամուտն այդ ժամանակահատվածում աճել է 11%: HSBC Բանկ Հայաստանը 2013 թվականի արդյունքներով զբաղեցրել է Հայաստանի առևտրի ֆինանսավորման շուկայի 37%-ը: Բանկի այդ պորտֆելի կառուցվածքում ներմուծման մասնաբաժինը կազմել է մոտ 90%, իսկ արտահանմանը` 10%: 2014 թվականի 6 ամիսներին, նախորդ տարվա նույն ժամանակահատվածի համեմատ այս ցուցանիշն աճել է ավելի քան 2 անգամ, իսկ փաստաթղթային ակրեդիտիվներով` 4 անգամ:

Նշենք, որ HSBC Բանկ Հայաստանի առևտրի ֆինանսավորման ակադմիան գործում է 2010 թվականից, Հայաստանի ՓՄՁ ոլորտի զարգացման Ազգային կենտրոնի հետ համատեղ նախաձեռնությամբ: Ընդհանուր առմամբ, Բանկի ակադեմիաներին մասնակցել է մոտ 300 արտահանումային և ներմուծման կողմնորոշում ունեցող ձեռնարկություն: HSBC խումբն առևտրի ֆինանսավորմամբ է զբաղվում արդեն մեկուկես դար (1865 թվականից), և ձգտում է դառնալ առևտրի ֆինանսավորման միջազգային առաջատարը, այսօր ծածկելով այդ շուկայի 10%-ը: Բանկը բազմաթիվ երկրներում իր ներկայության շնորհիվ հնարավորություն ունի ներգրավել առևտրի ֆինանսավորման շուկայի 87% - ը: Բանկի հաճախորդները նկան գործարքներ կարող են կնքել ավելի քան 60 երկրներում: Խումբը 6200 գրասենյակներ ունի 5 մայրցամաքներում, ինչը հանդիսանում է նրա մրցակցային հիմնական առավելությունը: Խումբը ողջ աշխարհով մեկ րոպեում կատարում է առևտրի ֆինանսավորման 1 մլն.դոլարի գործարք:

Ըստ ԱրմԻնֆո գործակալության` Հայաստանի Բանկերի ֆինանսական Վարկանիշի, HSBC Բանկ Հայաստանի ակտիվները 2014 թվականի հոկտեմբերի 1-ին, կազմել են 641.2 մլն դոլար (5 դիրքը շուկայում), տարեկան կտրվածքով աճելով 14,7%, իսկ միայն երրորդ եռամսյակում` 6,4%: Վարկային ներդրումները կազմել են 476,1 մլն.դոլար (4-րդ տեղ), տարեկան աճը` 37.1%, իսկ միայն երրորդ եռամսյակում` 7.9%: Բանկի վարկային պորտֆելի կառուցվածքում տնտեսության վարկավորման մասնաբաժինը կազմում է ավելի քան 76%, կազմելով 362,8 մլն դոլար (2 դիրքը շուկայում), տարեկան աճը`33,2%, իսկ միայն երրորդ եռամսյակում`5,1%: Ոլորտային կտրվածքով, վարկային պորտֆելը կենտրոնացված է հիմնականում արդյունաբերության ոլորտում` 27,5% և առևտրի ոլորտում` 24.2%, որոնց վարկավորման ծավալներով բանկն զբաղեցրել է երկրորդ տեղը շուկայում: ՓՄՁ ոլորտում բանկը տեղաբաշխել է 257 մլն դոլար: (վարկային պորտֆելի 64.4% -ը): Այս ցուցանիշով բանկը զբաղեցնում է առաջին տեղը շուկայում: Բանկի ընդհանուր կապիտալը կազմել է 115 մլն.դոլար (3 տեղը շուկայում): 2014-ի առաջին 9 ամիսներին բանկի զուտ շահույթը կազմել է 13.7 մլն դոլար, այդ ցուցանիշով զբաղեցնելով առաջին տեղը շուկայում: Բանկի բաժնետերերն են` HSBC Europe B.V.-ն` 70% և Wings Establishment ընկերությունը` 30%:

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ

RUB	4.22	0.06
USD	387.63	-0.37
EUR	414.92	-1.29
GBP	485.04	-1.51
CAD	282.47	-1.03
JPY	25.00	0.27
CNY	53.53	-0.05
CHF	425.22	-0.50

Աշխարհում

Աֆիլիանտներ

Նորություններ

HSBC Բանկ Հայաստանը Հայաստանում Իտալիայի դեսպանության հետ համատեղ անց է կացրել «Առևտրի ֆինանսավորման ակադեմիայի» թվով 13-րդ սեմինարը