Շաբաթ, 4 Ապրիլի 2015 14:23
«ՆԱՍԴԱՔ ՕԷՄԵՔՍ ԱՐՄԵՆԻԱ» բորսայի արտարժութային հարթակում ապրիլի սկզբին կտրուկ նվազել է ակտիվությունը
ԱրմԻնֆո. Մարտի 30-ից ապրիլի 3-ը բորսայում արտարժութային գործարքների ծավալը կրճատվել է 73% (մարտի 23-27-ի 5 անգամ աճի փոխարեն), իսկ արտարժույթի միջբանկային շուկայում արձանագրվել են նվազագույն ծավալներ: Բորսայում տեղի ունեցած ակտիվության անկումը դոլարի նկատմամբ ՀՀ դրամի փոխարժեքը նվազեցրին 0.3 տոկոսային կետով:
Ինչպես ԱրմԻնֆո գործակալությանը տեղեկացվել է ՀՀ Կենտրոնական բանկի մամուլի ծառայությունից, հաշվետու շաբաթվա ընթացքում «ՆԱՍԴԱՔ ՕԷՄԵՔՍ ԱՐՄԵՆԻԱ» բորսայում արտարժույթով գործարքների ծավալը կազմել է 6.4 մլն.դոլար, 471.82 դրամ/դոլար միջին փոխարժեքով: Գործարքների առավելագույն ծավալներ են արձանագրվել մարտի 31-ին` 2.3 մլն.դոլար: Նույն ժամանակահատվածում միջբանկային արտարժութային շուկայում իրականացված գործարքների ծավալը կազմել է 750 հազ. դոլար, 472.63 դրամ/դոլար միջին փոխարժեքով:
Աղբյուրի համաձայն, մարտի 30-ից ապրիլի 3-ն ընկած ժամանակահատվածում արտարժույթի ներբանկային շուկայում (գործարքները հաճախորդների հետ) բանկերի կողմից գնվել է 86.7 մլն.ԱՄՆ դոլար (շաբաթվա անկումը` 3%) 470.75 դրամ մեկ ԱՄՆ մեկ դոլարի դիմաց միջին փոխարժեքով և վաճառվել է 102.2 մլն ԱՄՆ դոլար (շաբաթվա աճը`10%), 472.41 դրամ ԱՄՆ մեկ դոլարի դիմաց միջին փոխարժեքով: Նույն ժամանակահատվածում արտարժույթի ներբանկային շուկայում բանկերի կողմից գնվել է 5.3 մլն.եվրո, 506.97 դրամ մեկ եվրոյի դիմաց միջին փոխարժեքով (շաբաթվա անկումը` 8.2%), և վաճառվել է 7.7 մլն. եվրո (շաբաթվա աճը` 1.3%) 512.32 դրամ մեկ եվրոյի դիմաց միջին փոխարժեքով: Ներբանկային շուկայում նույն ժամանակահատվածում բանկերի կողմից գնվել է 694.1 մլն. ռուբլի (շաբաթվա աճը` 12.2%), 8.10 դրամ/ռուբլի միջին փոխարժեքով և վաճառվել է 229.3 մլն.ռուբլի (շաբաթվա անկումը` 8.5%) 8.27 դրամ/ռուբլի միջին փոխարժեքով:
2014 թվականի մարտի 23-29-ը Հայաստանի բանկերի կողմից ՀՀ դրամով տրամադրված վարկերի ծավալը կազմել է 30.5 մլրդ դրամ, իսկ ԱՄՆ դոլարով տրամադրված վարկերի ծավալը կազմել է 43.6 մլն ԱՄՆ դոլար: Նախորդ շաբաթվա համեմատ ՀՀ դրամով վարկերի ծավալը կրճատվել է 18.2%, իսկ ԱՄՆ դոլարով տրամադրված վարկերի ծավալը`1.6%:
Հիշեցնենք, որ 2014 թվականի վերջին ամիսներին Հայաստանի արժույթի շուկայում դիտվեց փոխարժեքի կտրուկ աճ, հատելով 570 դրամ/դոլարի սահմանագիծը: Հայաստանի արտարժույթի մանրածախ շուկայում դրամը դոլարի նկատմամբ հոկտեմբերից մինչև դեկտեմբերի 17-ը ներառյալ արժեզրկվեց 45%, այնուհետև, դեկտեմբերի 18-20-ն արժեվորվեց 25%, իսկ դեկտեմբերի 22-ին կրկին սկսեց արժեզրկվել: Դեկտեմբերի 27-ին դրամի փոխարժեքը դոլարի նկատմամբ կազմեց 470 դրամ/դոլար, եվրոն` 574 դրամ / եվրո, ռուսական ռուբլին` 8.7 դրամ /ռուբլի: Բորսայում մեկ տարում իրականացվել է 744.5 մլն. դոլարի արտարժութային գործարք, ընդ որում, ամսական ծավալներով աչքի է ընկել նոյեմբերը (117 մլն.դոլար): Տարվա ընթացքում բորսայում արտարժույթի փոխարժեքը 407.14 դրամ/դոլարից ցատկեց մինչև 560 դրամ/դոլար, դեկտեմբերի 27-ին իջնելով մինչև 470 դրամ/դոլար: 2014 թվականին ՀՀ դրամը ԱՄՆ դոլարի նկատմամբ ընդհանուր հաշվով արժեզրկվեց 40%, հաշվի առնելով դեկտեմբերի 17-ի` 570 դրամ առավելագույն և հուլիսի` 406 դրամ նվազագույն սահմանաչափերը: 2015 թվականի մարտի 2-31-ը Հայաստանի արտարժույթի մանրածախ շուկայում դրամի փոխարժեքը դոլարի նկատմամբ 478 դրամից իջել է մինչև 471.5 դրամ/դոլար, եվրոյի նկատմամբ` 534 դրամից նվազել է մինչև 508 դրամ/եվրո, իսկ ռուբլու նկատմամբ` 7.8 դրամից աճել է մինչև 8.3 դրամ/ռուբլի: Ապրիլից ՀՀ դրամը կրկին սկսեց արժեզրկվել, ապրիլի 3-ին դոլարի նկատմամբ արձանագրելով 474 դրամ-փոլար փոխարժեք, եվրոյի նկատմամբ` 516 դրամ/եվրո, իսկ ռուբլու նկատմամբ` 8.6 դրամ/ռուբլի: