2015 թվականի ապրիլին Հայաստանի ֆինանսական շուկայում գրանցվել է ավանդների, ինչպես նաև վարկերի տոկոսադրույքների անկում: Երկու դեպքում էլ տոկոսադրույքների անկումը պայմանավորված է դրամային ներգրավումների ու տեղաբաշխումների էժանացումով:
Ըստ ՀՀ ԿԲ տվյալների, Հայաստանի ֆինանսական շուկայում ավանդների տոկոսադրույքները 2015-ի ապրիլին միջին հաշվով կազմել են 10.1%, մարտի համեմատ նվազելով 0.2 տոկոսային կետով (տարվա աճը` 1,3 տոկոսային կետով): Վարկերի տոկոսադրույքները մարտին նվազել են 0,3% (2014-ի ապրիլի համեմատ աճելով 0,4 տոկոսային կետով), կազմելով 14.3%: Ավանդների և վարկերի տոկոսադրույքների նվազեցումը մեկ ամսում բերեցին մարժայի մեծացմանը` միջին հաշվով 0,2 տոկոսային կետով (տարեկան անկումը` 0.8 տոկոսային կետով), մինչև 4,2%:
Ապրիլին ավանդների էժանացումը մեծապես պայմանավորված էր դրամով ավանդների տոկոսադրույքների նվազումով - 1.1 տոկոսային կետով (տարվա աճը` 2.3 տոկոսային կետով): Միևնույն ժամանակ, դոլարով ավանդները մեկ ամսում թանկացան 0.6 տոկոսային կետով (մեկ տարում աճը` 0,2 տոկոսային կետով): Դրամային և դոլարային ավանդների միջին շուկայական տոկոսադրույքները համապատասխանաբար կազմել են 13.3% և 6,9%:
Մինչդեռ, ապրիլին վարկերի էժանացումը հիմնականում պայմանավորված էր դրամային վարկերի տոկոսադրույքների 0.5 տոկոսային կետով իջեցումով (տարեկան աճը` 0.2 տոկոսային կետով), մինչև 15.7%, իսկ ավելի փոքր չափով` դոլարային վարկերի տոկոսադրույքների 0,2 տոկոսային կետով նվազումով (տարեկան կտրվածքով աճը` 0,6 տոկոսային կետով), մինչև 12.8%:
Ըստ աղբյուրի, ինչպես կարճաժամկետ, այնպես էլ երկարաժամկետ ավանդների տոկոսադրույքներն ապրիլին կազմել է 9.6%: Երկու դեպքում էլ արձանագրվել ամսական 0.5% անկում: Իսկ տարեկան կտրվածքով կարճաժամկետ ավանդները թանկացել են 1,4 տոկոսային կետով և երկարաժամկետ ավանդները`0.2 տոկոսային կետով:
Միևնույն ժամանակ, կարճաժամկետ վարկերն ապրիլին կազմել են 14.7%, մեկ ամսում նվազելով 0.5 տոկոսային կետով (տարեկան կտրվածքով աճը`0.2 տոկոսային կետով): Երկարաժամկետ վարկերի տոկոսադրույքները, այդ թվում` հիփոթեքի, կազմել են 14%, ապրիլին նվազելով 0.1 տոկոսային կետով (տարվա աճը` 1 տոկոսային կետով): Հիփոթեքային տոկոսադրույքները ապրիլին միջին հաշվով կազմել են 13.1% , մեկ ամսում աճելով 0.5 տոկոսային կետով (տարեկան կտրվածքով աճը`1.1 տոկոսային կետով):
Ընդհանուր առմամբ, իրավաբանական անձանց ավանդների տոկոսադրույքներն ընթացիկ տարվա ապրիլին նվազել են 0.6 տոկոսային կետով (տարեկան կտրվածքով աճը`0.9 տոկոսային կետով), կազմելով 9.2%: Ֆիզիկական անձանց ավանդների տոկոսադրույքները կազմել են 11%, մարտի համեմատ աճելով 0.1 տոկոսային կետով (տարեկան կտրվածքով աճը` 1.6 տոկոսային կետով): Մինչդեռ, կորպորատիվ վարկերի տոկոսադրույքներն ապրիլին միջին հաշվով հասել են 11,6%-ի, մեկ ամսում նվազելով 0.6 տոկոսային կետով (տարեկան աճը`0,2 տոկոսային կետով): Միևնույն ժամանակ, ֆիզիկական անձանց վարկերի տոկոսադրույքները (այդ թվում, հիփոթեքը) նվազել են 0.1 տոկոսային կետով (տարվա աճը` 0.6 տոկոսային կետով), ապրիլին կազմելով մոտ 16,1%:
Նշենք, որ մանրածախ արժութային շուկայում ապրիլին ՀՀ դրամը դոլարի նկատմամբ արժեզրկվեց` 472 դրամ / դոլարից մինչև 477 դրամ / դոլար, իսկ մայիսին այդ միտումը շարունակվեց մինչև 479.5 դրամ / դոլար: