Երեթշաբթի, 2 Հունիսի 2015 18:08

«ԱՐՄՍՎԻՍԲԱՆԿ» ՓԲԸ-ի ու Վերակառուցման և Զարգացման Եվրոպական Բանկի միջև «Կովկասի էներգաարդյունավետության ծրագրի» շրջանակներում կնքվել է պայմանագիր: Ինչպես ԱրմԻնֆո գործակալությանը տեղեկացրել են բանկում, «ԱՐՄՍՎԻՍԲԱՆԿ»-ը համագործակցում է Վերակառուցման և Զարգացման Եվրոպական Բանկի հետ դեռևս 2010թ.-ից, և երկարատև սերտ համագործակցության արդյունքում 02.06.2015թ. «ԱՐՄՍՎԻՍԲԱՆԿ»-ի և ՎԶԵԲ-ի միջև «Կովկասի էներգաարդյունավետության ծրագրի» շրջանակներում նախատեսվում է կնքել նոր՝ 2 մլն ԱՄՆ դոլարի չափով պայմանագիր: 

Աղբյուրի համաձայն, վերոնշյալ վարկավորման ծրագրի պայմաններին բավարարող ընկերություններին նախատեսվում է տրամադրել ԱՄՆ դոլարով, մինչև 5 տարի մարման ժամկետով, 10-11% տարեկան տոկոսադրույքով վարկեր: Պայմանագրի շրջանակներում վարկերը տրամադրվում են սննդի վերամշակման, գյուղատնտեսության, արտադրության, շինարարության և վերականգնվող էներգիայի ոլորտներում գործունեություն ծավալող ընկերություններին:

 

Տվյալ ծրագրի շրջանկներում տրամադրվող վարկերը ուղղված են այն ընկերություններին, որոնք միջոցառումներ են ձեռնարկում էներգախնայող տեխնալոգիաներ ներդնելու համար: Հատկանշական է, որ այս ծրագրի շրջանակներում էներգաարդյունավետությանն ուղղված վարկեր ստացող հաճախորդները հնարավորություն կունենան ստանալ անվճար տեխնիկական աջակցություն և որոշակի պահանջների բավարարման դեպքում նաև ետ ստանալ վարկի գումարի մինչև 15%-ը՝ ՎԶԵԲ-ի կողմից տրամադրվող գրանտային միջոցների շնորհիվ: 
 

Հարկ է նշել, որ սույն պայմանագիրը «ԱՐՄՍՎԻՍԲԱՆԿ»-ի և ՎԶԵԲ-ի միջև համագործակցության շրջանակներում կնքված թվով չորրորդ պայմանագիրն է, ընդ որում, համագործակցության սկզբից առ այսօր Բանկի և ՎԶԵԲ-ի միջև կնքված պայմանագրերի ծավալը կազմում է ավելի քան 20 մլն. ԱՄՆ դոլար: Դեռևս 2010թ.-ին «ՓՄՁ վարկավորման» ծրագրի շրջանակներում Բանկի և ՎԶԵԲ-ի միջև կնքվել էր առաջին պայմանագիրը՝ 5 մլն ԱՄՆ դոլար գումարի չափով: 2010թ.-ին ՎԶԵԲ-ի կողմից Բանկի համար «Առևտրի ֆինանսավորման ծրագրի» շրջանակներում հաստատվել էր նաև 3 մլն ԱՄՆ դոլար սահմանաչափ, որը համագործակցության ընթացքում եռապատկվել է և այժմ կազմում է 9 մլն ԱՄՆ դոլար: 2014թ.-ին Բանկի և ՎԶԵԲ-ի միջև «ՓՄՁ վարկավորման» ծրագրի շրջանակներում լրացուցիչ վարկային ռեսուրսների ներգրավման նպատակով ստորագրվեց ևս մեկ պայմանագիր՝ 5 մլն ԱՄՆ դոլարին համարժեք ՀՀ դրամ գումարի չափով:

Որպես ՎԶԵԲ-ի հետ համագործակցության զարգացման հավաստիացում՝ 2014թ.-ի հուլիսին ՎԶԵԲ-ի կողմից «ԱՐՄՍՎԻՍԲԱՆԿ» ՓԲԸ-ին շնորհվեց «Հաստատող բանկ»-ի կարգավիճակ:

Նշենք, որ կարևորելով միջազգային կառույցների հետ աշխատանքը Բանկը շարունակում է համագործակցությունը FCI միջազգային ֆակտորինգային ընկերության հետ՝ միջազգային ֆակտորինգի, «Ասիական Զարգացման Բանկ»-ի հետ՝ առևտրի ֆինանսավորման ծրագրի, «Գերմանահայկական հիմնադրամ» ԾԿԳ Հիմնարկի հետ՝ ՓՄՁ վարկավորման և Վերականգնվող էներգիայի զարգացման աջակցությանն ուղղված ծրագրերի, իսկ «Ազգային Հիփոթեքային Ընկերություն» և «Բնակարան երիտասարդներին» ՎՎԿ  ՓԲԸ-ների հետ՝ հիփոթեքային վարկային ծրագրերի շրջանակներում:

Նշենք նաև, որ ԱՐՄՍՎԻՍԲԱՆԿ-ը հիմնադրվել է որպես փակ բաժնետիրական ընկերություն` 2004 թվականի հոկտեմբերի 7-ին և ՀՀ ԿԲ-ից ստացել է բանկային գործունեության թիվ 84 արտոնագիրը` 2005 թվականի փետրվարի 25-ին: Բանկի բաժնետոմսերի 80%-ի սեփականատերն է հանդիսանում Վարտան Սիրմակեսը, ով շվեյցարական ժամացույցների« «Ֆրանկ Մյուլլեր Ուոչլանդ» ընկերության հիմնադիրն է, իսկ 20%-ը պատկանում է Վարտան Սիրմակեսի կողմից կառավարվող  «ԲԵԼԵԳԻՆԳՍՄԱՉԵՓԻՋ ՋՈՆԳՈ» ՍՊԸ–ին: Բանկը գործունեություն է ծավալում կորպորատիվ և ներդրումային ուղղություններով՝ կիրառելով  փրայվիթ բենքինգի տեխնոլոգիաներ: Արմսվիսբանկի ակտիվները 2015 թվականի հունվարի 1-ին կազմել են 84.5 մլրդ դրամ, տարեկան աճը` 21%: Դրանց կառուցվածքում ավելի քան 45% են կազմել վարկային ներդրումները, որոնց ծավալները կազմել են 38.1 մլրդ դրամ, տարեկան աճը` 32.4%: Բանկի ընդհանուր կապիտալը նույն ամսաթվով կազմել է 17,9 մլրդ.դրամ, պարտավորությունները`66,6 մլրդ.դրամ, տարեկան աճը` 36,9%, իսկ ժամկետային ավանդները`29.3 մլրդ դրամ (գերակշռում են իրավաբանական անձանց միջոցները), տարեկան աճը` 35,1%: 2014 թվականը բանկը եզրափակլ է 2.3 մլրդ.դրամ զուտ շահույթով (տարեկան աճը` 32.4%), ամրապնդելով իր դիրքերը լավագույն տասնյակում:

Հիշեցնենք, որ ՎԶԵԲ-ն իր գործունեությունը Հայաստանում սկսել է 1992 թվականից: Այդ պահից մինչ օրս ՎԶԵԲ-ը երկրում ներդրել է ավելի քան 900 մլն եվրո, իրականացնելով ավելի քան 135 ծրագրեր` էներգետիկայի և ենթակառուցվածքների ոլորտներում, ինչպես նաեւ ֆինանսների ոլորտում, ընդ որում, նշված ներդրումների 87% -ն ուղղվել է մասնավոր հատվածին: 2014 թվականի արդյունքներով Հայաստանում Բանկի ընդհանուր պորտֆելը կազմել է 350 մլն.դոլար, իսկ միայն 2014 թ-ին բանկը ներդրել է երկրի տնտեսությունում` 114 մլն.դոլար: Հայաստանի էներգատարողունակությունը շուրջ 2.6 անգամ գերազանցում է ԵՄ միջին մակարդակը: Հայաստանում սպառվող ընդհանուր էներգիայի մոտ 50%-ն ապահովվում է երկիր ներկրվող բնական գազի հաշվին: Վերջերս Համաշխարհային բանկի ուսումնասիրությունը պարզել է, որ էներգաարդյունավետությանն ուղղված ներդրումները թույլ կտան Հայաստանին տնտեսել էներգիա, որը կարող է կազմել ՀՆԱ-ի 5%-ը: Գերակա ոլորտներն են` ջրամատակարարման, ջրահեռացման, ինչպես նաև կոշտ կենցաղային թափոնների հավաքման և հեռացման ոլորտները: