Արմինֆո. ՌՈՍԳՈՍՍՏՐԱԽ ԱՐՄԵՆԻԱ ապահովագրական ընկերության աշխատակիցները բարեգործական այց կատարեցին Գյումրի քաղաքի Ֆ.Նանսենի անվան երեխաների խնամքի և պաշտպանության հաստատություն: Ինչպես ԱրմԻնֆո գործակալությանը տեղեկացվել է Ընկերության մամուլի ծառայությունից, ուսումնական տարվա սկզբին գիշերօթիկ դպրոցի բոլոր սաները ապահովագրական ընկերությունից ստացան անվանական նվերներ:
Շնորհակալական խոսքում տնօրեն Անահիտ Կարապետյանն ասաց. «Աստվածահաճո գործը միշտ արժանի է գովեստի: Բարեգործությունը ոչ մի ժամանակներում չի դիտվել որպես պարտականություն: Այն բխում է երեխաների հանդեպ ունեցած մարդկային սիրուց և ջերմ վերաբերմունքից»:
ՌՈՍԳՈՍՍՏՐԱԽ ԱՐՄԵՆԻԱ ապահովագրական ընկերության «ԳՅՈՒՄՐԻ» մասնաճյուղի տնօրեն Դավիթ Ֆարզադյանն ընկերության բոլոր աշխատակիցների անունից շնորհավորեց երեխաներին նոր ուսումնական տարվա կապակցությամբ և հանձնեց նվերները: Նա նշեց, որ մանկական հաստատություններում ապրող երեխաներին իրոք լուրջ ուշադրություն է պետք: Ընկերությունը հնարավոր օգնություն է ցուցաբերում երեխաներին նրանց հոգսերը թեթևացնելու համար:
Ըստ ԱրմԻնֆո գործակալության` Հայաստանի ապահովագրական ընկերությունների Ռենկինգի, «ՌՈՍԳՈՍՍՏՐԱԽ ԱՐՄԵՆԻԱ» ապահովագրական ընկերությունը 2015 թվականի առաջին կիսամյակի արդյունքներով զբաղեցրել է առաջին տեղը շուկայում, մասնավորապես, ապահովագրական պրեմիաների ծավալով` 5.2 մլրդ դրամ, որի մասնաբաժինը շուկայում հասել է 32.2%-ի: Ընկերությունն առաջատարն է նաև իրականացված ապահովագրական հատուցումների ծավալով` 2.2 մլրդ.դրամ, կազմելով շուկայի 34.5%-ը: Ընկերությնա առաջին կիսամյակի զուտ շահույթը տարեկան կտրվածքով ավելացել է 50.7%, մինչև 658.8 մլն.դրամ, որը կազմում է ապահովագրական համակարգի ընդհանուր շահույթի 43.7%-ն այդ ժամանակահատվածի համար, զբաղեցնելով առաջատար դիրք:
ՆՄշենք, որ ՌՈՍԳՈՍՍՏՐԱԽ ԱՐՄԵՆԻԱ ապահովագրական փակ բաժնետիրական ընկերությունը հիմնադրվել է 2008 թ. մայիսին և գործում է Հայաստանի Հանրապետության կողմից 2008 թվականի մայիսի 20-ին տրված «ոչ կյանքի ապահովագրություն» իրականացնելու ԱՊՈ թիվ 0009 լիցենզիայի հիման վրա: Ընկերությունը մտնում է ՌՈՍԳՈՍՍՏՐԱԽ Ընկերությունների Խմբի (Ռուսաստան) մեջ: Ընկերության կանոնադրական կապիտալը կազմում է 4,5 միլիարդ դրամ: ՌՈՍԳՈՍՍՏՐԱԽ ԱՐՄԵՆԻԱ ընկերությունն ունի ամենալայն գրասենյակային ցանցը և ներկայացված է Հայաստանի Հանրապետության գրեթե բոլոր քաղաքներում, ունի հաճախորդների սպասարկման 47 գրասենյակներ, այդ թվում 18 մասնաճյուղ, 13 գրասենյակ Երևանում, և 34՝ Հայաստանի մարզկենտրոններում և խոշոր քաղաքաներում: ՌՈՍԳՈՍՍՏՐԱԽ ԱՐՄԵՆԻԱ ապահովագրական ընկերությունն առաջինը Հայաստանում 2011 թվականի դեկտեմբերին ստացավ ISO 9001:2008 ստանդարտին համապատասխանության սերտիֆիկատ աշխարհահռչակ Moody International կազմակերպությունից:
