IFC- ի զեկույցը կոչված է աջակցել Հայաստանից ձկնամթերքի արտահանման խթանմանը և այդ ոլորտում ներդրումների ներգրավմանը

Արմինֆո. Միջազգային ֆինանսական կորպորացիան (IFC), որը հանդիսանում է Համաշխարհային բանկի խմբի անդամ, սեպտեմբերի 29-ին հրապարակել է իր զեկույցը, որում ասվում է Հայաստանից ձկնամթերքի արտահանման խթանման և այդ ոլորտում ներդրումների ներգրավման մասին:

Ինչպես ԱրմԻնֆո գործակալությանը տեղեկացվել է ՀԲ մամուլի ծառայությունից, ՀՀ էկոնոմիկայի նախարարության հայտով IFC-ն «Հայաստանի ներդրումային ոլորտի բարեփոխումները» ծրագրի շրջանակներում հետազոտել է երկրի ձկնաբուծության հատվածը, նշելով հիմնական պրոբլեմները, միաժամանակ ներկայացնելով դրանց հաղթահարման ուղիները:

Էկոնոմիկայի փոխնախարար Սերգեյ Ավետիսյանը հայտարարել է, որ IFC հետազոտությունը լավ գործիք կլինի ինչպես ձկնարտադրության ոլորտի քաղաքականության համար պատասխանատուների, այնպես էլ այդ ոլորտում գործող տնտեսվարողների համար: «Այն կարող է օգնել երկրում զարգացնելու ձկնաարտադրությունը և խթանելու արտահանումը»,-ասել է նա:

Հետազոտոթյունը ցույց է տալիս, որ արտադրողականության, արտադրանքի որակի և սննդի անվտանգության չափանիշների զարգացումը՝ զուգորդված շուկայի և արտադրանքի դիվերսիֆիկացման ընդլայնման հետ, կարող է բարձրացնել հայկական ձկնամթերքի մրցունակությունը և հանգեցնել դրա ավելի լայն հասանելիությանն արտահանման շուկաներում, ինչպես նաև խթանել տնտեսական աճը:

Նշենք, որ IFC–ի «Հայաստանում ներդրումային միջավայրի բարեփոխումներ» ծրագիրն իրականացվում է Համաշխարհային բանկի խմբի Առևտրի և մրցունակություն դեպարտամենտի կողմից, և ֆինանսավորվում է Ավստրիայի դաշնային ֆինանսների նախարարության և Հունգարական գործընկերության ֆինանսավորման շրջանակներում (Հունգարիայի EXIM Բանկի համագործակցությամբ):

Հիշեցնենք, որ Համաշխարհային Բանկի Խմբի անդամ հանդիսացող IFC–ին ամենամեծ գլոբալ զարգացման հաստատությունն է, որը զբաղվում է բացառապես մասնավոր հատվածով։ Աշխատելով մոտ 2000 մասնավոր ձեռնարկությունների հետ՝ մենք օգտագործում ենք մեր կապիտալը, փորձագիտությունն ու ազդեցությունը՝ օգնելու վերացնել ծայրահեղ աղքատությունը և խթանել համընդհանուր բարգավաճումը։ 2015 ֆինանսական տարում մենք տրամադրել ենք ավելի քան 18 միլիարդ դոլարի ֆինանսավորում՝ բարելավելու կյանքը զարգացող երկրներում և դիմակայելու զարգացման ամենահրատապ մարտահրավերներին։

Հայաստանն անդամակցել է IFC–ին 1995թ.։ Այդ ընթացքում IFC–ի երկարաժամկետ ներդրումային պարտավորությունները կազմել են 233 միլիոն ԱՄՆ դոլար՝ ներառյալ 22.8 միլիոն ԱՄՆ դոլար մոբիլիզացված այլ վարկատուներից՝ ֆինանսավորելով 52 ծրագիր մի շարք ոլորտներում՝ ներառյալ ֆինանսական շուկաները, արտադրությունը, գյուղատնտեսությունը, ծառայությունները և հանքարդյունաբերությունը։ Ւր առևտրի ֆինանսավորման ծրագրի միջոցով IFC–ին աջակցել է նաև 122 միլիոն դոլարից ավել արժեքով առևտրային գործարքների։ IFC–ին իրականացրել է նաև մասնավոր հատվածի զարգացմանն ուղղված խորհրդատվական ծրագրեր։