Հինգշաբթի, 29 Հոկտեմբերի 2015 19:09

Արմինֆո. Հայաստանում կբարձրանան ալկոհոլի, ծխախոտի, բենզինի և սեղմված գազի ակցիզային հարկի դրույքաչափերը: ՙԱկցիզային հարկի մասին՚ օրենքում համապատասխան փոփոխություններ ընդունվել են ՀՀ Ազգային ժողովի հոկտեմբերի 29-ի նիստում:

Ինչպես իր ելույթում նշել է ՀՀ ֆինանսների նախարարի տեղակալ Վախթանգ Միրումյանը, ակցիզային հարկի դրույքաչափերը փոփոխվում են`Եվրասիական տնտեսական միության հետ ակցիզային հարկի դրույքաչափերի ներդաշնակեցման գործընթացի սկսման պատճառով: Նրա խոսքով, ակցիզային հարկի դրույքաչափերը Հայաստանում չորս անգամ ավելի ցածր են, քան ԵՏՄ երկրներում:

Փաստաթղթի համաձայն, սպիրտային խմիչքների ակցիզը /բացի կոնյակից և գինուց/ նվազագույն 500 դրամից կբարձրանան մինչև 550 դրամ մեկ լիտրի դիմաց, իսկ տոկոսադրույքը 50 տոկոսից կդառնա 55 տոկոս։ Հազար հատ սիգարի դրույքաչափն առաջարկվում է բարձրացնել 550 հազարից մինչև 605 հազար դրամ, իսկ հազար հատ ծխախոտի դրույքաչափը՝ 5 հազարից 5.5 հազար դրամ։ Առանց ֆիլտրի ծխախոտի ակցիզը 1400-ից կդառնա 1540 դրամ։ Դիզվառելիքի համար նվազագույն ակցիզը առաջարկվում է 32.5 հազարից դարձնել 35 հազար դրամ մեկ տոննայի համար, իսկ տոկոսադրույքը թողնել նույնը՝ 10 տոկոս։ Առաջարկվում է նաև ավտոմոբիլային տրանսպորտի համար սեղմված գազի ակցիզային հարկ սահմանել 8 330 դրամ 1000 խմ դիմաց։ Օրինագիծն ուժի մեջ կմտնի 2016 թ. մայիսի 1-ից: