Հինգշաբթի, 5 Նոյեմբերի 2015 20:43

Արմինֆո.  Վերակառուցման և զարգացման եվրոպական բանկը (ՎԶԵԲ) կտրուկ բարելավել է Հայաստանի ՀՆԱ դինամիկայի կանխատեսումը: Ըստ Բանկի տվյալների, 2015 թվականին տնտեսական աճը Հայաստանում կազմեց 2.3%, 2016-ին Հայաստանի ՀՆԱ-ի աճը կլինի 2%: Իսկ ավելի վաղ Եվրոբանկը 2015-ի համար կանխատեսել էր 1.5% անկում, իսկ 2016-ի համար` 1% աճ:

Ինչպես նշված է ՎԶԵԲ «Տարածաշրջանային տնտեսական հեռանկարներ-2015» զեկույցում, 2015թ. առաջին կիսամյակում Հայաստանը գրանցեց ավելի զգալի աճ, քան ակնկալվում էր: 2014թ. վերջին զգալի արժեզրկումից հետո փոխարժեքի դրույքը կայունացավ 2015թ. դրամավարկային խիստ պայմանների, տարեսկզբին Կենտրոնական բանկի միջամտության և ընթացիկ հաշվի ճշգրտման ֆոնի վրա: Համախառն միջազգային պահուստները նվազել էին 2014թ. ընթացքում, ինչպես նաև 2015թ. հունվար և փետրվար ամիսներին՝ նախքան աճելը և շուրջ չորս ամիսների ներմուծման ծավալին հասնելը2015թ. սեպտեմբերին: Պետական Ֆինանսներն ընդհանուր առմամբ կայուն մնացին սահմանափակ ֆիսկալային տարածության պայմաններում: Տարածաշրջանային տնտեսական ճգնաժամը հանգեցրեց դրամական փոխանցումների նվազեցմանը, ներմուծման կրճատմանը և վարկավորման բացասական աճին 2015թ. առաջին ութ ամիսների ընթացքում:

ՎԶԵԲ-ն ակնկալում է, որ Կովկասի երկրները` Հայաստանը, Վրաստանը և Ադրբեջանը կպահպանեն տնտեսական աճն ընթացիկ և հաջորդ տարիներին, չնայած արտաքին մարտահրավերներին և անվտանգության պրոբլեմներին: Ըստ Եվրոբանկի տվյալների, Վրաստռանի տնտեսությունը 2015-ին կաճի 2.5%, 2016-ին` 2.6%, իսկ Ադրբեջանում, հակառակը, 2015-ին` 3%, իսկ 2016-ին` 2.5%: Տարածաշրջանի ընդհանուր ՀՆԱ-ն 2015-ին կկազմի 0.2%, 2014-ի 1.8%-ի փոխարեն, իսկ 2016-ին կկազմի 1.6%: Այս կանխատեսումները փոփոխության չեն ենթարկվել 2015 թվականի մայիս ամսից:

Ըստ զեկույցի, Արևելյան Եվրոպայում և Կովկասում տնտեսական իրավիճակի վատթարացումն ընթացիկ տարում կապված է ռեցեսիայի հետ Ռուսաստանում, Ուկրաինայում և Բելառուսում, ինչպես նաև նավթի և հումքի էժանացման հետ: ՎԶԵԲ-ն ակնկալում է, որ Ռուսաստանում արտադրության անկումը 2015-ին կկազմի 4,2%: 2016 թվականին, երբ երկրի տնտեսությունը կհարմարվի նավթի ցածր գներին, այդ ցուցանիշի անկումը կդանդաղի մինչև 1.2%: ԵԱՏՄ մյուս երկրներում, մասնավորապես, Բելառուսում, 2015-ին տնտեսությունը կկրճատվի 3,5%, իսկ 2016-ին` դանդաղելով մինչև 1%: Ղազախստանի ՀՆԱ-ի աճը 2015 թվականին կկազմի 1.2%, իսկ 2016-ին` 1, 5%, Ղրղզստանում, համապատասխանաբար` 5% և 3.9%:

Արևմտյան շրջանները համեմատաբար շահավետ վիճակում կլինեն, եվրոգոտու տնտեսական աճի և ԵԿԲ վարկային քաղաքականույան շնորհիվ:

ՀՆԱ-ի ամենաբարձր աճը ՎԶԵԲ-ը կանխատեսել է Թուրքմենստանի համար, որը 2015-ին կկազմի 8.5%, 2016-ին մնալով անփոփոխ, իսկ ամենամեծ անկումը` Ուկրաինայում` 11.5%, բայց 2016-ի համար` 2% աճ: ՎԶԵԲ-ի գլխավոր տնտեսագետ Հանս Պիտեր Լանքեսը այս կապակցությամբ ասել է. «Այժմ, հինգ տարիների շարունակական անկումից հետո, մենք կարող ենք վերելք ակնկալել 2016թ., սակայն բացասական ասպեկտների առումով կան էական ռիսկեր»: Զեկույցում թվարկվում են հետևյալ ռիսկերը. Չինաստանում տնտեսական աճի տեմպերի ավելի կտրուկ նվազում, քան ակնկալվում էր, ամերիկյան տոկոսադրույքների ավելի մեծ բարձրացում, քան սպասվում էր, քաղաքական անկայունություն և աշխարհաքաղաքական լարվածություն և Հունաստանում հակաճգնաժամային միջոցառումների փաթեթի տրամադրման ծրագրի անհավասարաչափ իրականացում:

 

Հիշեցնենք, որ ավելի վաղ, Արժույթի միջազգային հիմնադրամը կտրուկ փոխել էր Հայաստանի տնտեսության աճի կանխատեսումը` լճացումից մինչև 2.5% աճ, 2016-ին դանդաղելով մինչև 2.2%: Ըստ Համաշխարհային բանկի (ՀԲ) վերջին կանխատեսման, Հայաստանի տնտեսական աճը 2015 թ. կլինի 0.8%, նախկինում կանխատեսված 3.3%-ի փոխարեն: Վերակառուցման և Զարգացման Եվրոպական բանկը (EBRD) իր կանխատեսումը զրոյից իջեցրեց մինչև մինուս 1,5%, Ասիական զարգացման բանկի կողմից Հայաստանի 2015 թվականի ՀՆԱ-ի կանխատեսումը կազմել էր 1.6%, իսկ Եվրասիական զարգացման բանկը` 0,8%: Moody`s միջազգային վարկանիշային գործակալությունն իր վերջին զեկույցում Հայաստանի ՀՆԱ աճը կանխատեսել էր 2,3%, իսկ Fitch-ը վերանայեց իր կանխատեսումը, դեպի 1.5% աճի կողմը, նախկինում կանխատեսված դանդաղ ռեցեսիայի և ՀՆԱ-ի 0.5% անկման փոխարեն:

ՀՀ Կենտրոնական բանկի կանխատեսման, 2015 թ., տնտեսական աճը Հայաստանում կարագանա` 2.8-3.6%, նախորդ` 1,6-2.6% դանդաղման կանխատեսման փոխարեն: 2016 թ. տնտեսական աճը կմնա գրեթե նույն մակարդակի վրա` 2.5-3.4%, բայց 2017-ից կսկսի աստիճանաբար արագանալ` 3,5-4.5%:

«Հայաստանի Հանրապետության 2015 թվականի պետական ​​բյուջեի մասին» Օրենքով երկրի ՀՆԱ-ի աճը կանխատեսվում է 4.1%, իսկ գնաճը` 4% (± 1,5%), ՀՆԱ-ի անվանական մեծությունը` 4867,5 մլրդ.դրամ, իսկ ՀՆԱ-ի դեֆլյատորը` 3.3%: ՀՀ Ազգային վիճակագրական ծառայության տվյալներով, տնտեսական ակտիվությունը Հայաստանում 2015 թվականի հունվար-հուլիսին աճել է 4.2%, իսկ միայն հուլիսին` 9.2%: -կ-

Ըստ ՀՀ Վիճակագրական ծառայության տվյալների, 2015 թվականի հունվար-սեպտեմբերին տնտեսական ակտիվությունը Հայաստանում աճել է 3.7%, նախորդ տարվա 4.3% աճի փոխարեն: