Նախարար. Առաջիկայում ՀՀ կառավարոթյունը հավանություն կտա ԵԱԶԲ հետ 300 մլն. դոլարի վարկային համաձայնագրին

Արմինֆո. Առաջիկայում ՀՀ կառավարոթյունը հավանություն կտա Եվրասիական զարգացման բանկի կայունացման հիմնադրամի հետ 300 մլն. դոլարի վարկային համաձայնագրին, որից հետո համաձայնագիրը կուղարկվի ՀՀ խորհրդարանի վավերացմանը: Այս մասին, պատասխանելով ԱրմԻնֆո գործակալության հարցին, հայտարարել է ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը:

Նրա խոսքով, միջոցները կուղղվեն բարեփոխումների  եռամյա ծրագրի իրականացմանը, որոնք ուղղված են երկրում տնտեսական կայունության ապահովմանը: Ինչպես նշել է փոխվարչապետը, միջոցները կտրամադրվեն առանձին տրանշերով, որից առաջինը կտրամադրվի 2016 թվականին: Բարեփոխումների արդյունքում, նշել է նախարարը, երկրի բյուջեում առաջացել է ճեղքվածք, կապված ԱԱՀ կիրառման հետ: Մասնավորապես, եթե նախկինում տնտեսվարող սուբյեկտը ԱԱՀ-ն վճարում էր սահմանի վրա, ապա հիմա նրան կտրամադրվի 50-օրյա երկարաձգում, ինչը հնարավորոթյուն է ստեղծում բիզնեսի զարգացմանը, քանի որ հայտնվում են ազատ միջոցներ: Նա նշել է, որ կարող է կիրառվել նաև վճարների հետաձգման մեխանիզմ: Արդյունքում, բյուջեն ժամանակին չի ստանա այդ միջոցները, բայց դրանք չեն կորչի, այլ կվճարվեն ավելի ուշ, նշել է փոխվարչապետը:

Հիշեցնենք, որ նոյեմբերի 5-ին ՀՀ կառավարություն իր հավանությունն է  տվել «Հայաստանի Հանրապետության և Եվրասիական զարգացման բանկի միջև Եվրասիական տնտեսական ընկերակցության հակաճգնաժամային հիմնադրամի միջոցներից ֆինանսական վարկի տրամադրման մասին» համաձայնագրին, որով նախատեսվում է Հայաստանին տրամադրել 300 մլն ԱՄՆ դոլարի չափով բյուջետային աջակցության վարկ: Այն կտրամադրվի երեք մասնաբաժիններով՝ յուրաքանչյուրը 100 մլն ԱՄՆ դոլար գումարով: Վարկի տարեկան տոկոսադրույքը կազմում է 2,1%, տրամադրվում է 20 տարի մարման ժամկետով, որից 10 տարին արտոնյալ ժամանակահատվածն է: Յուրաքանչյուր մասնաբաժնի տրամադրման համար նախապայման է հանդիսանում ՀՀ կառավարության և ՀՀ  կենտրոնական բանկի կողմից բարեփոխումների ծրագրի  իրականացումը:  Ծրագրի գլխավոր ուղղություններն են՝ էներգետիկ հատվածի ֆինանսական կայունության և պետական ֆինանսների կառավարման արդյունավետության բարձրացում, բիզնեսի վարման պայմանների բարելավում:

ԵԱԶԲ հանդիսանումէ միջազգային ֆինանսական կազմակերպություն, որը հիմնադրվել է Ռուսաստանի և Ղազախստանի կողմից 2006 թվականի հունվարին, մասնակից երկրների տնտեսություններին աջակցելու նպատակով: Հայաստանը ԵԱԶԲ անդամ է դարձել 2009 թվականին: Բանկի մյուս մասնակիցներն են` Բելառուսը, Ղազախստանը, Ղրղզստանը, Ռուսաստանը և Տաջիկստանը: 2012 թվականի հուլիսի 1-ի դրությամբ Բանկի ներդրումային պորտֆելը կազմել է 3.3 մլրդ.դոլար: Այն ներառում է 60 նախագհծեր, անդամ 5 երկրներում: