Արմինֆո. «Անելիք Բանկ» ՓԲԸ կանոնադրական կապիտալը համալրվել է 1.88 մլրդ ՀՀ դրամով: Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, կապիտալի ուղղակի համալրումն ապահովել է «Անելիք Բանկ» ՓԲԸ բաժնետեր` լիբանանյան «Կրեդիտ Բանկ Ս.Ա.Լ.-ը:
Ըստ աղբյուրի, նշված միջոցներն ուղղվելու են Բանկի ռազմավարական ծրագրի իրականացմանը, զարգացման տեմպերի պահպանմանը, ինչպես նաև` մատուցվող ծառայությունների փաթեթի ավելացմանը: «Ինչպես կանոնադրական կապիտալի անցած տարվա 1 մլրդ ՀՀ դրամով ավելացումը, այնպես էլ այս համալրումը հնարավորություն կտան Անելիք Բանկին ընդլայնել մատուցվող ծառայությունների տեսականին, իրականացնել առավել լայնածավալ ու դիվերսիֆիկացված վարկավորում, ներգրավել նոր հաճախորդներ, ինչպես նաև` ընդլայնել մասնաճյուղերի ցանցը: Ունենալով Լիբանանի խոշորագույն բանկերից մեկի` Կրեդիտ Բանկի, աջակցությունը, վստահ եմ, որ Անելիք Բանկը կարող է լուծել նաև իր առջև ծառացած այլ հավակնոտ և հեռանկարային ծրագրեր»,- ասել է «Անելիք Բանկ» ՓԲԸ Հասարակության հետ կապերի պատասխանատու Աստղիկ Մարտիրոսյանը, հիշեցնելով, որ անցյալ տարի նույնպես սեփականատերն ուղղակի ներդրման միջոցով բանկի կանոնադրական կապիտալը համալրեց 1 մլրդ.դրամով: Ըստ «Անելիք Բանկ» ՓԲԸ ֆինանսական հաշվետվության, բանկի ընդհանուր կապիտալը 2015 թվականի հոկտեմբերի 1-ին կազմել է 13.4 մլրդ դրամ (տարեկան անկումը` 1.1%), կանոնադրական կապիտալը`15.3 մլրդ.դրամ (առանց տարեկան փոփոխության): Ընդհանուր կապիտալի կառուցվածքում կուտակված վնասը նույն օրվա դրությամբ կազմել է 2,2 մլրդ դրամ, տարեկան աճը` 11.4%: Տարվա առաջին 9 ամիսներին բանկի զուտ վնասը կազմել է 1.2 մլրդ դրամ, տարեկան լտրվածքով խորանալով 2.5 անգամ:
Նշենք, որ 2009 թվականի փետրվարից «Անելիք Բանկի» բաժնետեր է դարձել լիբանանյան CreditBank S.A.L.` կապիտալում 51% բաժնեմասով: 2013 թվականի 4-րդ եռամսյակում CreditBank S.A.L. դարձել է «Անելիք Բանկի» միանձնյա սեփականատեր` իր բաժնեմասն ավելացնելով 89,95%-ից մինչև 100%: Մոսկովյան «ԱնելիքՌու» ԴԲ-ը 2012 թվականի դեկտեմբերին օտարվել էր «Անելիք Բանկից»` հետագայում սեփականության իրավունքը փոխանցելով լիբանանյան Credit Bank S.A.L.-ին:
Հիշեցնենք, որ 2017 թվականի հունվարի 1-ից Հայաստանի բանկերի ընդհանուր կապիտալի նվազագույն չափը սահմանվել է 30 մլրդ.դրամ, ներկայիս 5 մլրդ.դրամի փոխարեն: Ներկայումս ակնկալվող նորմատիվին պատրաստ են միայն 7 բանկեր` ԱԿԲԱ-Կրեդիտ Ագրիկոլ Բանկը, HSBC Բանկ Հայաստանը, Արդշինբանկը, Ամերիաբանկը, ՎՏԲ-Հայաստան Բանկը, Ինեկոբանկը և Առէկսիմբանկ-Գազպրոմբանկի խումբը: Դրանցից միայն վերջին կպիտալն է համապատասխանում նորմատիվային նվազագույն պահանջին, իսկ մնացած 6-ի մոտ` գերազանցում է: Ներկայումս Հայաստանում գործում է 19 բանկ, հաշվի առնելով ԲՏԱ Բանկի և ՊրոԿրեդիտ Բանկի դուրս գալը շուկայից: