ՎԶԵԲ-ն Ամերիաբանկի կապիտալում կներդնի 40 մլն.դոլար, ապագայում IPO դուրս գալու նպատակով

Արմինֆո.  Վերակառուցման և զարգացման եվրոպական բանկը (ՎԶԵԲ) Ամերիաբանկի կապիտալում կներդնի 40 մլն.դոլար (մոտ 20 մլրդ.դրամ), հետագայում IPO դուրս գալու հեռանկարով: Ինչպես ԱրմԻնֆո գործակալությանը տեղեկացվել է ՎԶԵԲ-ից, գործարքը կընթանա երկու փուլով: Սկզբում, լրացուցիչ թողարկման շրջանակներում, ՎԶԵԲ-ը բանկի կապիտալում կներդնի 30 մլն. դոլար (մոտ 15 մլրդ.դրամ), ստանալով Ամերիաբանկի բաժնետոմսերի 20.6% փաթեթը, իսկ մնացած 10 մլն.դոլարը նախատեսում է ներդնել ապագայում: Այսպիսով, ընդհանուր կապիտալի նախագծի իրականացման առաջին փուլում Ամերիաբանկի ընդհանուր կապիտալը կկազմի 62 մլրդ.դրամ:

Նախագծի նպատակն աջակցությունն է Ամերիաբանկի կապիտալին, նպաստելով նաև աճի ռազմավարական նպատակներին` IPO դուրս գալու վերջնական նպատակով: Դրանով բանկը զգալիորորեն կմեծացնի փոքր և միջին բիզնեսի, խոշոր ձեռնարկությունների, ինչպես նաև մասնավոր ձեռներեցների ֆինանսավորման հնարավորությունները: Դա, ինչպես նշվում է ՎԶԵԲ հաղորդագրության մեջ, որակյալ ծառայությունների, ժամանակակից պրոդուկտների և լուծումների հետ մեկտեղ կբերի երկրում ֆինանսական միջնորդության մեծացմանը և ֆինանսական ռեսուրսների նկատմամբ մատչելիությանը: Նախագիծը կծառայի նաև երկրի մասնատված բանկային հատվածի միավորման գործին` միաձուլումների և միավորումների (M & A) միջոցով: ՎԶԵԲ միանալը բանկի կապիտալին կարող է նպաստել կորպորատիվ կառավարման բարելավմանը, Ամերիաբանկի Խորհրդի կազմում իր ներկայացուցչի նշանակման միջոցով, ինչպես նաև IPO դուրս գալու գործընթացների կառավարման ոլորտի պլանի կատարմանը:

Ըստ աղբյուրի, ծրագրի ընդհանուր արժեքը կարող է կազմել 55 մլն.դոլար, որից 15 մլն. դոլար կազմում են պոտենցիալ ներդրումները, որոնք կարող են բանկի կապիտալին ներգրավվել մասնավոր ներդրողներից:

Ամերիաբանկը ՎԶԵԲ-ի հետ համագործակցում է 2010 թվականից: Այդ օրից Ամերիաբանկը  ՎԶԵԲ-ից միջոցներ է ստացել առևտրի, ՓՄՁ և էներգախնայողության նախագծերի  ֆինանսավորման նպատակով` TFP հիմնադրամի միջոցով: Միջազգային հեղինակավոր կազմակերպությունների հետ համագործակցության շրջանակներում Ամերիաբանկն ընդհանուր հաշվով ներգրավել է 345 մլն.դոլարի ֆինանսական միջոցներ:

Ըստ ԱրմԻնֆո գործակալության` Հայաստանի բանկերի ֆինանսական վարկանիշի, 2015 թվականի հոկտեմբերի 1-ի դրությամբ Ամերիաբանկը շուկայի առաջատարն է ինչպես ընդհանուր վարկային ներդրումներով (290.2 մլրդ. դրամ, տարեկան աճը` 40.1%), այնպես էլ Հայաստանի տնտեսության վարկավորման գծով (250.7 մլրդ դրամ, տարեկան աճը` 45,4%): Վարկային ռեսուրսների արդյունավետ տեղաբաշխումը բանկին թույլ տվեց զուտ շահույթը տարեկան կտրվածքով ավելացնել 11.2%, 2015 թվականի առաջին 9 ամիսների արդյունքում դուրս գալով 5,1 մլրդ դրամ մակարդակին: Արդյունավետության գործակիցներով բանկը գտնվում է առաջատար հնգյակում, մասնավորապես, ROA - 2,07% (4 տեղ) և ROE - 17,24% (2 տեղ): Հատկանշական է, որ բանկն առաջատար է նաև պարտավորությունների գծով, ինչպես ընդհանուր, այնպես էլ ժամկետային ներդրումների և ցպահանջ ավանդների գծով: «Ամերիաբանկ» ՓԲԸ-ն ունիվերսալ բանկ է, որը ներդրումային, կորպորատիվ և մանրածախ բանկային ծառայություններ է մատուցում բանկային լուծումների համապարփակ փաթեթի տեսքով: Հոկտեմբերի 1-ի դրությամբ բանկի բաժնետերն է Ameria Group CY Ltd.-ն, կապիտալում 100% մասնաբաժնով: