Երեթշաբթի, 19 Հունվարի 2016 17:52

Արմինֆո. Անելիք Բանկը համալրել է իր միջազգային դրամական փոխանցումների համակարգերի ցանկը ևս մեկով` Ria Money Transfer արագ դրամական փոխանցումների համակարգով, ինչը հնարավորություն կընձեռի Բանկի հաճախորդներին ընտրել դրամական փոխանցումների իրականացման տարբերակներից այդ պահին իրենց համար առավել հարմարավետը:

 

Ինչպես ԱրմԻնֆո գործակալությանը տեղեկացվել է Անելիք Բանկի մամուլի ծառայությունից, այս համակարգով առանց Բանկում հաշիվ բացելու հնարավոր է ուղարկել և ստանալ գումար աշխարհի ավելի քան 147 երկրներից: Անհրաժեշտ է ներկայացնել միայն անձը հաստատող փաստաթուղթ, նշել ստացողի անուն ազգանունը, երկիրը, քաղաքը եւ բանկը: Ria Money Transfer համակարգով գումար ստացողը միջնորդավճար չի վճարում և ստանում է մաքուր գումարը, իսկ ուղարկելիս միջնորդավճարի չափը կախված է փոխանցման ուղղությունից: Դեպի Ռուսաստանի Դաշնություն, Ուկրաինա, Վրաստան իրականացվող փոխանցումների համար միջնորդավճարը կազմում է փոխանցվող գումարի 2%-ը (նվազագույնը` 4 Եվրո), ԱՊՀ այլ երկրներ` 2,5%-ը, (նվազագույնը 5 Եվրո), իսկ դեպի այլ երկրներ`3%-ը (նվազագույնը` 6 Եվրո):

 

«Անելիք Բանկը, կարևորելով իր կողմից տրամադրվող ծառայությունների բազմազանությունը, հաճախորդներին հնարավորություն է տալիս առաջարկվող բանկային պրոդուկտների տարբերակներից ընտրել տվյալ գործարքի համար առավել հարմարավետը: Այս սկզբունքը վերաբերվում է նաև դրամական փոխանցումների համակարգերին: Մեր Բանկի կողմից առաջարկվող նոր՝ Ria Money Transfer համակարգով դրամական փոխանցումներ կարելի է իրականացնել ԱՄՆ դոլարով և Եվրոյով»,- ասել է «Անելիք Բանկ» ՓԲԸ Հասարակության հետ կապերի պատասխանատու Աստղիկ Մարտիրոսյանը, տեղեկացնելով, որ մեկ փոխանցման համար թույլատրելի առավելագույն գումարը կազմում է 5 000 ԱՄՆ դոլար կամ Եվրո:

 

Նշենք, որ «Անելիք Բանկ» ՓԲԸ-ում հնարավոր է դրամական փոխանցումներ իրականացնել նաև ANELIK, MONEYGRAM, INTELEXPRESS, CONVERSE TRANSFER, SIGUE MONEY TRANSFER և UNISTREAM դրամական փոխանցումների համակարգերով։

 

Նշենք, որ Անելիք Բանկի միանձնյա սեփականատերն է լիբանանյան Credit Bank S.A.L.-ը, որն իր մասնաբաժինը բանկի կապիտալում 2013 թվականի 4-րդ եռամսյակում 89.95%-ից ավելացրեց մինչև 100%:-