Հայացք Մոսկվայից. Ժամանակն է Հայաստանը դիտարկել՝ որպես դարպաս դեպի նոր գլոբալ աշխարհ

Արմինֆո.  Իրանի նկատմամբ բազմամյա պատժամիջոցների չեղարկումը Կովկասում և Միջին Արևելքում Մեծ խաղի նոր էջ է բացում: Հասկանալի է, որ նման մասշտաբային տեղաշարժերը կփոխեն նաև խաղում ներգրավված խաղացողներից յուրաքանչյուրի դերը: Թե ինչպիսին այն կլինի, ժամանակը ցույց կտա: Բայց արդեն այսօր կարելի է խոսել նոր հնարավորությունների մասին, այդ թվում՝ Հայաստանի համար: ԱրմԻնֆո-ին այդպիսի կարծիք է հայտնել Ռազմավարական գնահատականների և կանխատեսումների կենտրոնի գլխավոր տնօրեն Սերգեյ Գրինյաևը:

ՙԵս, այնուամենայնիվ, չէի գերագնահատի իրավիճակը և մեծ հույսեր չէի կապի Հայաստանի տարանցիկ կարգավիճակի հետ. ժամանակակից աշխարհի տնտեսական կարևոր տարածաշրջանները միավորող գլոբալ ուղիների նախագծերը մի քիչ այլ կողմում են գտնվում:

ՙԱյլ բան է, որ նոր պայմաններում միայն մեծանում է հայկական Սփյուռքի դերն ու նշանակությունը, որն ամուր արմատներ ունի երկրների մեծ մասում, որոնց տարածքով կանցնեն այդ նույն տրանսպորտային ճանապարհները: Ահա այստեղ մտածելու բան կան: Դեռ մի քանի տարի առաջ՝ եվրասիական ինետգրացիոն գործընթացների սկզբում, մեր հարցազրույցներում Հայաստանին՝ որպես դարպաս դեպի նոր գլոբալ աշխարհ, դիտարկելու վերաբերյալ կարծիք էինք հայտնում: Այդ ժամանանակ մեր առաջարկները քչերը լրջորեն ընկալեցին ինչպես Հայաստանում, այնպես էլ Ռուսաստանում, բայց կյանքն այնպես դասավորվեց, որ այսօր այդ նույն մեր առաջարկները կրկին, ավելի քան երբևէ, ակտուալ են: Հայկական Սփյուռքի նոր դերն ու նշանակությունն էլ կարող է առանցքային լինել  Հայաստանի համար՝ աշխարհաքաղաքական մեծ խաղի պայմաններում:

Գրինյաևի կարծիքով, պետք է հաշվի առնել, որ 2016 թվականը ֆինանսատնտեսական նոր համաշխարհային համակարգի հիմք դնող կարևոր տրանսֆորմացիաների տարի է: Ավարտվում է տնտեսական երկու հզոր կենտրոնների՝ Խաղաղօվկիանոսյան և Անդրատլանտյան տնտեսական գործընկերությունների՝ ձևավորումը, թափ են առնում եվրասիական ինտեգրման գործընթացները, իրատեսական են դառնում Նոր մետաքսի ճանապարհի շրջանակներում նախագծերը:

ՙԲոլոր այդ գործընթացները կվերափոխեն առաջիկա տասնամյակների տնտեսության պատկերը, և կարևոր է, որ Հայաստանը ևս մասնակցի դրանց՝ ոչ միայն որպես ԵՏՄ անդամ, այլ նաև որպես ինքնիշխան պետություն՝ իր ազգային նպատակներով ու շահերով: Այս առումով, գտնում եմ, որ ժամանակն է վերադառնալ Հայաստանի համար միջինժամկետ հեռանկարի մեր սցենարին և  դիտարկել այն՝ որպես դարպաս դեպի նոր գլոբալ աշխարհ՚,- ամփոփել է փորձագետը: