Երեթշաբթի, 23 Փետրվարի 2016 15:34

Արմինֆո. Ամերիաբանկը և «Յուքոմ» ընկերությունը հայտարարում են Հայաստանում բոլորովին նոր` Ամերիա TV Բանկինգ ծառայության մեկնարկի մասին: Այս եզակի ծառայությունը նոր խոսք է օնլայն գործարքների իրականացման բնագավառում: Այն  հնարավորություն է տալիս առավելագույնս հարմար, պարզ և արագ դարձնել կոմունալ վճարների կատարումը: Այդ առիթով փետրվարի 23-ին տեղի է ունեցել մամուլի ասուլիս:

Ամերիա TV Բանկինգ ծառայությունը հնարավորություն է տալիս նաև դիտել կոմունալ վճարումների պարտքը, ստեղծել և կատարել խմբային կոմունալ վճարումներ, դիտել վճարումների պատմությունը, Ամերիաբանկի տվյալ օրվա արտարժույթի փոխարժեքները, ինչպես նաև դիտել Ամերիաբանկի մասնաճյուղերի և բանկոմատների հասցեները` ցանկով և քարտեզով: Բոլոր ծառայություններն անվճար են:

Բոլոր այն անձինք, ովքեր միաժամանակ հանդիսանում են U!TV-ի ցանկացած փաթեթի բաժանորդ և Ամերիաբանկի հաշվետեր, հեռուստացույցի միջոցով կարող են տեսնել իրենց կոմունալ ծառայության վճարման ենթակա գումարը և ընդամենը հեռուստացույցի հեռակառավարման վահանակի միջոցով կատարել վճարում: Ծառայության անխափան գործարկումն ապահովելու նպատակով իրականացվել են համակարգի թեստավորման և ինտեգրման աշխատանքներ, որոնց բարեհաջող ավարտից հետո միայն ծառայությունը փուլերով ներդրվում է: Բոլոր այն բաժանորդները, որոնք ցանկություն կունենան այս պահին ծառայությունից օգտվել, կարող են դիմել «Յուքոմ» ընկերությանը, իսկ այն հաճախորդները, որոնք «Յուքոմ» հեռուստատեսության ծառայություններից այսուհետ են օգտվելու, այս ծառայությանը կմիանան ավտոմատ կերպով:

«Մենք «Յուքոմ» ընկերության հետ մշակել ենք Ամերիա TV բանկինգ ծառայությունը «Ձեր բանկն այնտեղ է, որտեղ Ձեզ հարմար է» կարգախոսի ներքո` ստեղծելով կոմունալ վճարների իրականացման առավել հարմար տարբերակ: «Յուքոմի» հետ մենք արդեն ունեցել ենք աշխատանքային փորձ` արտոնյալ պայմաններով համատեղ վարկային քարտ, և սա արդեն երկրորդ նախագիծն է: Կարծում եմ, որ շարունակ նորարության ձգտող մեր երկու ընկերությունների այս համատեղ նախագիծը լայն արձագանք կստանա հանրության շրջանում»,- նշել է Ամերիաբանկի Մանրածախ գործառնությունների գծով տնօրեն Արման Բարսեղյանը: 

«Ամերիաբանկի հետ մեր համատեղ նախաձեռնության նպատակներից մեկն է առավելագույնս թեթևացնել մեր բաժանորդների առօրյան՝ ստեղծելով ևս մեկ այլընտրանքային ծառայություն,  որը հնարավորություն կտա շատ արագ և հեշտ կատարել բոլոր վճարումները:  Սա Հայաստանում նախադեպը չունեցող ծառայություն է, և կարծում եմ շատ շուտով TV Բանկինգ ծառայությունը մեր բաժանորդների շրջանում կլինի ամենապահանջվածներից մեկը»,- նշել է «Յուքոմ» ընկերության Մարքեթինգի և հաղորդակցության գծով տնօրեն Տիգրան Սաֆարյանը:

Հիշեցնենք, որ Ամերիաբանկը Հայաստանի բանկային շուկայում առաջատար դիրքեր է պահպանում ակտիվների, վարկերի, պարտավորությունների, ինչպես նաև ժամկետային ավանդների և ցպահանջ ավանդների մեծությամբ: Բանկի կապիտալին ՎԶԵԲ-ի մասնակցությունից և ընթացիկ ծանրակշիռ ներարկումների շնորհիվ Ամերիաբանկն առաջատար դարձավ նաև ընդհանուր և կանոնադրական կապիտալների չափերթվ: Բանկի բաժնետերերը են Ameria Group CY Ltd - 80% և ՎԶԵԲ-ը - 20%: Սկզբում, լրացուցիչ էմիսիայի շրջանակներում, ՎԶԵԲ-ն բանկի կապիտալում ներդրեց 30 մլն դոլար (15 մլրդ դրամ և կապիտալի 20% մասնաբաժին), իսկ ևս 10 մլն.դոլար կուղղվի բանկի կապիտալի համալրմանն ապագայում: Ամերիաբանկն ամբողջական լուծումներ է տրամադրում կորպորատիվ, մանրածախ և ներդրումային բանկինգի ոլորտներում, ինչպես նաև շարունակում է ներդրումներ կատարել առաջատար տեխնոլոգիաներում և հաճախորդների սպասարկման համակարգում: Ամերիաբանկը հատուկ մրցանակներն են` Euromoney-ից (2014 թ., 2012 թ., 2011 թ.), Global Finance-ից (2015 թ., 2013 թ., 2012 թ.), The Banker/FT-ից (2015 թ., 2013 թ., 2010):

Նշենք, որ «Յուքոմ» ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից:  Համագործակցելով համաշխարհային գերհզոր ընկերությունների հետ` «Յուքոմը» կարողացել է իր հաստատուն դիրքը գրավել Հայաստանի հեռահաղորդակցման շուկայում: