Ուրբաթ, 11 Մարտի 2016 18:58

Արմինֆո. Վարչապետ Հովիկ Աբրահամյանն այսօր ընդունել է հոլանդահայ գործարարներ Արամ Հայկազին և Երվանդ Հայկազին:

Ինչպես ԱրմԻնֆո գործակալությանը տեղեկացվել է ՀՀ կառավարության մամուլի ծառայությունից, հայազգի գործարարները նշել են, որ հետաքրքրված են Հայաստանում երկարաժամկետ ներդրումային ծրագրեր իրականացնելու և, մասնավորապես, կաշվեգործության ոլորտում ներդրումներ կատարելու հարցում:

Վարչապետը ողջունել է հոլանդահայ գործարարների՝ հայրենիքում ներդրումներ կատարելու պատրաստակամությունը և  նշել, որ կառավարությունը պատրաստ է աջակցել փոխշահավետ ներդրումային ծրագրերի իրականացմանը, որոնք կնպաստեն տնտեսական ակտիվության աճին և նոր աշխատատեղերի ստեղծմանը:

Հանդիպմանը քննարկվել են կաշվեգործության ոլորտում ներդրումային ծրագրի իրագործմանը վերաբերող մի շարք հարցեր:

Ըստ ՀՀ Ազգային վիճակագրական ծառայության տվյալների, Հոլանդիան հանդիսանում է Հայաստանի հետ առևտրի խոշորագույն գործընկերներից մեկը, զբաղեցնելով 5-րդ տեղը: Այսպես, Հայստանի և Հոլանդիայի միջև առևտրի շրջանառությունը 2015 թվականին կազմել է $ 76.6 մլն., տարեկան անկումը`37.8%: Մասնավորապես, արտահանումը նվազել է 36,4%, մինչև $ 47,3 մլն, իսկ ներմուծումը նվազել են 40%, մինչև $ 29,3 մլն.: