Փորձագետ. Ռուսաստանի կողմից Հայաստան ավելի մատչելի գներով գազի մատակարարումների ժամկետի երկարացումը բխում է երկու պետությունների շահերից

Արմինֆո. Ռուսաստանի կողմից Հայաստան ավելի մատչելի սակագներով գազի մատակարարումներով շահագրգռված են երկու պետություններն էլ, այսօր մամուլի ասուլիսի ժամանակ այդպիսի կարծիք է հայտնել տնտեսագետ Վարդան Բոստանջյանը:

Նրա խոսքով, ՌԴ-ից 1 հազար խմ դիմաց նախկին $189-ի փոխարեն ընդամենը $165-ով գազ ներմուծելու Հայաստանի հնարավորությունը թույլ կտա ռուսական կողմին պահպանել ՀՀ նկատմամբ ներգործության որոշակի մակարդակը, հակառակ դեպքում Ռուսաստան կորցնում է այդ հնարավորությունը, ինչը կարող է որոշակի քաղաքական հակասությունների հանգեցնել:

ՙԿարծում եմ, որ Ռուսաստանի հետ այսօրվա բանակցություններն ընթանում են երկուստեք համաձայնությամբ, քանի որ Հայաստանը, լինելով փոքր պետություն, չէր կարող նման միջպետական երկխոսության միակ նախաձեռնողը լինել՚,- ասել է տնտեսագետը՝ նշելով, որ ներմուծվող հումքի մատակարարման գների առնչությամբ միջկառավարական համաձայնագրի համատեքստում Հայաստանին հարկավոր է իր գործողություններն ուղղել նախանշված սահմաններում գազի գնի պահպանմանը:

Պատասխանելով ԱրմԻնֆո-ի թղթակցի հարցին՝ Բոստանջյանն ավելացրել է, որ տվյալ համաձայնությունն անպայման երկարաժամկետ բնույթ կկրի, և այժմ մնում է կարգավորել միայն հումքի մատկարարումներին առնչվող որոշակի մանրամասներ:

Հիշեցնենք, որ 2015 թ. Ռուսաստանը հաստատել էր սահմանին Հայաստանի համար գազի արտոնյալ գինը` 165 դոլար 1000 խմ դիմաց /գործող $189 փոխարեն/: Համապատասխան հայ-ռուսական արձանագրության նախագիծը հավանության էր արժանացել ՀՀ կառավարության օգոստոսի 18-ի նիստի ժամանակ: Սակայն, սպառողների վրա այդ էժանացումը չի անդրադարձել. նրանք շարունակում են վճարել հին սակագնով՝ 156 հազար դրամ կամ $318 ընթացիկ փոխարժեքով, իսկ խոշոր սպառողները (10 հազ. խմ և ավելի սպառողները/ վճարում են $277 1000 խմ դիմաց: Այդ ժամանակ էլ հաղորդվել էր, որ համաձայնագիրը կգործի մինչև 2015 թ. դեկտեմբերի 31-ը, ինչից հետո անհրաժեշտության դեպքում կստորագրվի նորը: