Հինգշաբթի, 24 Մարտի 2016 19:32

Արմինֆո. Մարտի 24-ին «Էրեբունի Պլազա» բիզնես կենտրոնում տեղի ունեցավ ՀՀ էկոնոմիկայի նախարարության աջակցությամբ և «Հայաստանի արտահանման ապահովագրական գործակալություն» ԱՓԲԸ ու «Արմսվիսբանկ» ՓԲԸ կողմից կազմակերպված  արտահանման ֆինանսական աջակցմանը նվիրված համաժողով:

«Հայաստանի արտահանման ապահովագրական գործակալություն» ԱՓԲԸ և «Արմսվիսբանկ» ՓԲԸ միջև ստորագրվել է համագործակցության հուշագիր, որով կազմակերպությունները կմիավորեն ջանքերը՝ ուղղված ՀՀ ռեզիդենտ տնտեսվարող սուբյեկտների կողմից արտադրության ավելացմանը, արտահանման խթանմանը և նոր շուկաներ մուտք գործելուն նպաստող համատեղ ֆինանսական ծառայությունների ներդրմանը։

Միջոցառման ընթացքում գործարարներին են ներկայացվել արտադրության ծավալների ավելացմանը և արտահանման խթանմանն ուղղված ֆինանսական գործիքները, արտահանման պետական աջակցության մեխանիզմները։ ՀԱԱԳ գործադիր տնօրեն Վազգեն Աբգարյանի խոսքով, գործակալության ապահովագրությամբ ծածկվում են օտարերկրյա գնորդի չվճարման ռիսկերը՝ պայմանավորված առևտրային (սնանկություն, անվճարունակություն կամ առանց իրավական հիմքի վճարումից հրաժարում) և քաղաքական (բնական աղետներ, վարչական որոշումներ, առևտրի սահմանափակումներ և այլն) ռիսկերով։ Գործակալության կողմից ներդրված նախաարտահանման ֆինանսավորման ապահովագրության ծառայությամբ ՀՀ առևտրային բանկերը հնարավորություն են ստանում առանց գրավային ապահովածության իրականացնել արտահանողի վարկավորում՝ ուղղված արտադրության համար անհրաժեշտ շրջանառու միջոցների ձեռքբերմանը։ «Հայաստանի ֆինանսական շուկայում այս նոր պրոդուկտի կայացման համար, ինչպես ցույց տվեցին մեր ուսումնասիրությունները, պահանջվում է 3-5 տարի: Հետևաբար, առաջիկա ամիսներին մենք մտադիր ենք ակտիվացնել համագործակցությունը նաև Հայստանի մյուս առևտրային բանկերի հետ»,-նշել է Սբգարյանը: Նա ընդգծել է, որ Արմսվիսբանկի հետ համագործակցության շրջանակներում Գործակալության կողմից ցուցաբերվել է 450 մլն.դրամի արտահանումային գործարքների աջակցություն:

Իր հերթին, Արմսվիսբանկի գործադիր տնօրեն Գևորգ Մաչանյանը նշել է, որ Գործակալության հետ համագործակցությունը պայմանավորված է արտահանման կողմնորոշում ունեցող ձեռնարկությունների նկատմամբ երկրի կառավարության հետաքրքրությամբ: «Գործակալության հետ համագործակցության մեկ տարում մենք տրամադրել ենք 31 վարկ, 1.2 մլն.դոլար ընդհանուր գումարով, տարեկան 8% և 14% տոկոսադրույքներով, կախված ֆինանսավորման աղբյուրներից»,-ասել է նա: Բանկիրը նշել է, որ Գործակալության հետ համագործակցության շրջանակներում արտահանողներին կատարվող աջակցությունը չի սահմանափակվում տնտեսության ոլորտներով և մատչելի է բոլոր այն ձեռնարկությւոններին, որոնք արատասահմանում իրացնելու համար ունեն արտադրված որակյալ ապրանքների բավականաչափ ծավալ:

ԱրմԻնֆո գործակալության թղթակցի հետ զրույցում Վազգեն Աբգարյանը նշել է հայկական ձեռնարկությունների արտահանումային մեծ ներուժը, բայց արտահանման կայուն աճի ապահովման համար անհրաժեշտ է միավորել ջանքերը և շուկային առաջարկել հնարավորինս նոր լուծումներ: Նախաարտահանման ֆինանսավորման ապահովագրական նոր պրոդուկտն ուղղված է արտադրողի գլխավոր պրոբլեմներից մեկի լուծմանը, երբ արտահանումային գործունեության ընդլայնման համար զգացվում է շրջանառու միջոցների սակավություն:

«Հայաստանի արտահանման ապահովագրական գործակալություն» ԱՓԲԸ-ն հիմնադրվել է Հայաստանի Հանրապետության կառավարության որոշմամբ 2013 թվականի հոկտեմբերի 23-ին արտահանմանն ուղղված արդյունաբերական քաղաքականության շրջանակներում:

Ընկերությունը տրամադրում է ապահովագրություն ՀՀ ռեզիդենտ արտահանող Ընկերությունների կողմից  մատակարարված ապրանքի դիմաց օտարերկրյա գնորդի կողմից կամ պայմանագրով նրա անունից վճարման պարտավորություն ունեցող բանկի կողմից չվճարման հետևանքով կրած ֆինանսական վնասներից: Մատուցվող ապահովագրական ծառայությունները հանդիսանում են  արդյունավետ լուծում հաճախորդների արտահանման ռիսկերի կառավարման համար: Ընկերության միակ բաժնետերը Հայաստանի Հանրապետությունն է: 

Նշենք, որ «Արմսվիսբանկե ՓԲԸ հիմնադրվել է 2004 թվականի հոկտեմբերի 7-ին` աշխարհում հայտնի "Franck Muller Watchland" ժամացույցի գործարանի հիմնադիր, համասեփականատեր և գործադիր տնօրեն Վարդան Սիրմաքեսի կողմից: Բանկի բաժնետերերն են հանդիսանում Վարտան Սիրմակեսի կողմից կառավարվող Լյուքսեմբուրգում գրանցված «ԷՅՉ ՎԻ ԷՍ Հոլդինգ» ՍՊԸ-ն և Հոլանդիայում գրանցված «ԲԵԼԵԳԻՆԳՍՄԱՉԵՓԻՋ ՋՈՆԳՈ» ՍՊԸ-ն՝ համապատասխանաբար 80% և 20% մասնաբաժիններով: Արմսվիսբանկը Հայաստանի առաջատար բանկն է արժեթղթերի թողարկման, մարկետմեյքերի և դեպոզիտարական ծառայությունների տրամադրման գծով: Բանկը 2006 թվականից հանդիսանում է կառավարության գործակալը՝ պարտատոմսերի առաջնային շուկայում: 2014 թվականին բանկն առաջնային շուկայում կազմակերպեց թողարկումների 63%-ը: 2013 թվականից բանկը հանդիսանում է հաշվի օպերատոր և կարգավորվող շուկայի հաշվարկային համակարգի անդամ: