Միջազգային ֆինանսական կորպորացիայի (ՄՖԿ) կողմից Ինեկոբանկը ճանաչվել է «2015թ. լավագույն գործընկեր բանկ առևտրի ֆինանսավորման ոլորտում»

Արմինֆո. 2016թ. փետրվարին Միլանում տեղի ունեցավ ՄՖԿ-ի կողմից կազմակերպված «Global Trade Partners Meeting» 7-րդ տարեկան համաժողովը, որտեղ Ինեկոբանկը արժանացավ «Լավագույն գործընկեր բանկ առևտրի ֆինանսավորման ոլորտում» մրցանակին: Այս մասին ԱրմԻնֆո գործակալությանը տեղեկացվել է Բանկի մամուլի ծառայությունից,

«Մենք բարձր ենք գնահատում Ինեկոբանկի և ՄՖԿ-ի երկարամյա համագործակցությունը: ՄՖԿ-ի` «Global Trade Finance» ծրագրի շրջանակներում տրամադրած միջոցներով իրականացվել են մի շարք նախագծեր: Մասնավորապես, Ինեկոբանկը իր հաճախորդներին տրամադրել է շահավետ պայմաններով վարկային միջոցներ` միջազգային առևտրի ֆինանսավորման նպատակով, որն իր դրական ազդեցությունն է ունեցել Հայաստանի տնտեսության զարգացման վրա», - նշել է Ինեկոբանկի գործադիր տնօրեն պրն. Տ. Գանջալյանը:

Ըստ աղբյուրի, ՄՖԿ-ն Ինեկոբանկի հետ համագործակցում է շուրջ 10 տարի: Համագործակցության շրջանակներում Ինեկոբանկն իր հաճախորդներին է առաջարկում վարկեր, հաստատումով ակրեդիտիվներ և բանկային երաշխիքներ «IFC GTFP» և «IFC WCSS» ծրագրերի շրջանակներում, որոնք ուղղված են ՓՄՁ հաճախորդների առևտրային գործարքների ֆինանսավորմանը: Ակրեդիտիվներն ու երաշխիքները հանդիսանում են միջազգային առևտրի ֆինանսավորման մատչելի և հարմարավետ միջոց և տրամադրվում են ապրանքների ներմուծման կամ արտահանման, կանխավճարի ապահովման և պայմանագրի կատարման համար: 

Ինեկոբանկը առևտրի ֆինանսավորման ոլորտում ունի ծառայությունների մատուցման արդյունավետ և ամբողջական գործիքակազմ և ակտիվ համագործակցում է Միջազգային Ֆինանսական Կորպորացիայի (IFC), Վերակառուցման և Զարգացման Եվրոպական Բանկի (EBRD) և այլ ֆինանսական կառույցների հետ:

Ըստ ԱրմԻնֆո գործակալության` Հայաստանի Բանկերի ֆինանսական վարկանիշի, 2015 թվականի դեկտեմբերի 31-ի դրությամբ Ինեկոբանկը շուկայի առաջատարների եռյակում է ՓՄՁ ոլորտի վարկավորման ծավալներով - 75.8 մլրդ դրամ, տարեկան աճը`2 անգամ: Ընդ որում, զգալի աճ է արձանագրվել նաև այն հանգամանքի շնորհիվ, որ 2015 թվականի վերջին Ինեկոբանկը միավորվեց ՊրոԿրեդիտԲանկի հետ, որը մասնագիտանում էր ՓՄՁ ոլորտի վարկավորմամբ և 2008 թվականից մինչև 2015 թվականի դեկտեմբերն արդեն ձևավորել էր այդ ոլորտի լուրջ պորտֆել: Արդյունքում, Ինեկոբանկի վարկային պորտֆելում ՓՄՁ ոլորտի մասնաբաժինը 2016 թվականին հունվարի 1-ին հասավ 48% -ի, 2014 թվականի 33%-ի փոխարեն: Բանկի վարկային ընդհանուր ներդրումներն ավելացել են 42%, մինչև 159,6 մլրդ դրամ: Տտեսության վարկավորման ծավալները 2015 թվականին բանկն ավելացրել է 57%, մինչև 114.1 մլրդ դրամ, որտեղ գերիշխող մասը կազմում են`առևտուրը (34,6%), արդյունաբերությունը (16.4%) և ՓՄՁ-ները:

Նշենք, որ «Ինեկոբանկ» ՓԲԸ-ն հիմնադրվել է 1996 թվականին, հանդիսանում է Հայաստանի ֆինանսական շուկայի դինամիկ զարգացող բանկերից մեկը: 2015 թվականի վերջին ՓՄՁ ոլորտի վարկավորման ոլորտում մասնագիտացող Ինեկոբանկը միավորվեց ՊրոԿրեդիտ Բանկի հետ, որը 2008 թվականից մինչև 2015 թվականի դեկտեմբերն արդեն ձևավորել էր այդ ոլորտի լուրջ պորտֆել, ինչի արդյունաքում վերջինիս ձևավորած ՓՄՁ պորտֆելը փոխանցվեց Ինեկոբանկին: