ՀՀ ԿԲ և KfW միջև ստորագրվել է «Հայաստանի բնակարանային ֆինանսավորման կայուն շուկայի զարգացում 4-րդ փուլ» 20 մլն.եվրոյի վարկային պայմանագիրը

Արմինֆո. Մարտի 31-ին  ՀՀ կենտրոնական բանկի և Գերմանիայի Դաշնության KfW զարգացման բանկի միջև ստորագրվել է «Հայաստանի բնակարանային ֆինանսավորման կայուն շուկայի զարգացում 4-րդ փուլ» վարկային պայմանագիր՝ ընդհանուր 20 մլն եվրո արժողությամբ: Ինչպես ԱրմԻնֆո գործակալությանը տեղեկացվել է ՀՀ ԿԲ մամուլի ծառայությունից, վարկային միջոցների տեղաբաշխումն իրականացվելու է առևտրային բանկերի և վարկային կազմակերպությունների միջոցով, որոնք կրելու են միջոցների տեղաբաշխման վարկային ռիսկը:

Ըստ աղբյուրի, վարկային միջոցներն ուղղվելու են մարզերում և Երևանում հիփոթեքային վարկավորմանը և էներգախնայողական հիփոթեքային վարկավորմանը: Վարկային պայմանագրի նպատակն է ապահովել կայուն և արդյունավետ հիփոթեքային վարկավորման շարունակական զարգացում:

Գործակցության շրջանակում նախատեսվում է նաև տեխնիկական աջակցության միջոցառումներ, որոնց ներքո ծրագրի շահառուներին կտրամադրվի համապատասխան խորհրդատվություն:

Ըստ ԱրմԻնֆո գործակալության` Հայաստանի բանկերի և վարկային կազմակերպությունների Ռենկինգի, բանկերի և վարկային կազմակերպությունների կողմից իրականացված հիփոթեքային վարկավորման ընդհանուր ծավալը 2016 թվականի հունվարի 1-ին կազմել է ավելի քան 288 մլրդ. դրամ (մոտ $ 596 մլն.), աճի տարեկան դանդաղումը` 28% - ից մինչև 14%, ընդ որում, միայն բանկային հիփոթեքային վարկավորման հատվածում աճը դանդաղել է ավելի կտրուկ`22.2% -ից մինչև 8%: Հիփոթեքային վարկավորման գծով առաջատար 3 բանկրն են` Կոնվերս Բանկը, Արդշինբանկը և Ամերիաբանկը, իսկ վարկային ընկերություններից առաջին երկու տեղերն զբաղեցնում են` «Մատչելի բնակարան երիտասարդներին» և «Ազգային Հիփոթեքային Ընկերություն» Ունիվերսալ վարկային ընկերությունները: Հիփոթեքային շուկայում աշխատում են հայկական բանկերն առանց բացառության, իսկ վարկային կազմակերպություններից` «Առաջին հիփոթեքային ընկերությունը» «Ֆիդեսը», «Ազգային Հիփոթեքային Ընկերությունը» և «Մատչելի բնակարան երիտասարդներին» ընկերությունները, ի դեպ, վերջինս երկուը կոչված են հիփոթեքային վարկերը վերաֆինանսավորելու համար:

Հիշեցնենք, որ KfW-ն Հայաստանի խոշոր դոնորներից մեկն է: Վերջին 20 տարում 14 ծրագրերի գծով KfW ներդրումները կազմել են շուրջ 500 մլն եվրո, այդ թվում` ՓՄՁ, ագրոհատվածի, էներգահամալիրի, բնապահպանության և ֆինանսավարկային ոլորտներում: Բանկի հանդեպ Հայաստանի պարտքը 2016-ի հունվարի 1-ին կազմել է 189.9 մլն.դոլար (ՀՀ արտաքին ընդհանուր պարտքի 4.4%-ը), տարեկան անկումը` 10.4%: Ըստ ՀՀ Ազգային վիճակագրական ծառայության տվյալների, Գերմանիայի ներդրումները Հայաստանի տնտեսության իրական հատվածում 2015 թվականի առաջին 9 ամիսներին հասել է գրեթե $ 62 միլիոնի, տարեկան աճը` մոտ 2 անգամ: Հայաստանի տնտեսության իրական հատվածում իրականացրած ներդրումների ծավալներով Գերմանիան զբաղեցնում է երկրորդ տեղը: