Ուրբաթ, 1 Ապրիլի 2016 18:09

Արմինֆո. ՀՀ էկոնոմիկայի նախարար Արծվիկ Մինասյանը տեղեկացված չէ, թե որքանով կնվազի Հայաստան մատակարարվող ռուսական գազի գինը: Այս մասին ապրիլի 1-ին լրագրողներին հայտարարել է նախարարը՝ մեկնաբանելով տեղեկությունն այն մասին, որ գազի գինը լավագույն դեպքում կնվազի 10 դրամով:

Նախարարի խոսքով, ինքը ՌԴ վարչապետ Դիմիտրի Մեդվեդևի Հայաստան առաջիկա այցի հիմնական թեմայի առնչությամբ տեղեկատվության չի տիրապետում: Ինչպես հայտարարել է Մինասյանը, նա չի կարող մանրամասն տեղեկություններ ներկայացնել, քանի որ բանակցություները դեռ չեն կայացել:

Միաժամանակ նախարարը չի բացառում գազի գնի նվազման հնարավորությունները: ՙՆման հնարավորություն միշտ կա, սակայն անհրաժեշտ է հասկանալ, թե որքանով է դա իրատեսական: Ահա հիմնական հարցը, որի պատասխանը պետք է գտնել՚,- նշել է նա: Համենայն դեպս, ինչպես հայտարարել է Մինասյանը, կառավարությունը փորձում է հնարավոր ամեն բան անել՝ գոնե հիմնական արտադրատեսակների սակագների նվազումն ապահովելու նպատակով:

Հիշեցնենք, որ մարտի 25-ին Հայաստանի վարչապետ Հովիկ Աբրահամյանը լրագրողներին հայտարարել էր. ՙԱյն, որ գազի գինը կնվազի, փաստ է, իսկ թե որքանով՝ բանակցությունները ցույց կտան՚: Կառավարության ղեկավարի խոսքով, հավանականություն կա, որ գազի գինը կնվազի նաև սպառողների համար: ՙՀայաստանի նախագահի Մոսկվա այցի ընթացքում այդ հարցը քննարկվել է ՌԴ նախագահի հետ, և գերատեսչություններին հանձնարարվել է քննարկել սակագնի նվազեցման հնարավորությունը՚,- ասել էր Աբրահամյանը: 

Նշենք, որ մարտի 10-ին Կրեմլում Հայաստանի և Ռուսաստանի բանակցությունների ժամանակ, ի թիվս այլ հարցերի, քննարկվել է նաև էներգետիկ համագործակցությունը, մասնավորապես, Հայաստան մատակարարվող ռուսական գազի գնագոյացման հարցեր: Միևնույն ժամանակ, մարտի 10-ի նիստում Հայաստանի կառավարությունը հավանություն է տվել «ՀՀ և ՌԴ կառավարությունների միջև Հայաստանի Հանրապետություն բնական գազի առաքման ժամանակ գների ձևավորման կարգի վերաբերյալ 2013թ. դեկտեմբերի 2-ի համաձայնագրում փոփոխություններ կատարելու մասին՚ արձանագրության կնքման առաջարկությանը: Փաստաթղթում Հայաստանի համար գազի գինն ընթացիկ տարվա հունվարի 1-ից մինչև մարտի 31-ը ներառյալ սահմանվում է նախորդ տարվա մակարդակում` 165 ԱՄՆ դոլար 1000 խմ դիմաց: Դրանից հետո գազի գինը Հայաստանի համար պետք է  վերադառնա ելման մակարդակին` 189 դոլար:

Հիշեցնենք, որ 2015 թ. Ռուսաստանը հաստատել էր սահմանին Հայաստանի համար գազի արտոնյալ գինը` 165 դոլար 1000 խմ դիմաց /գործող $189 փոխարեն/: Համապատասխան հայ-ռուսական արձանագրության նախագիծը հավանության էր արժանացել ՀՀ կառավարության օգոստոսի 18-ի նիստի ժամանակ: Սակայն, սպառողների վրա այդ էժանացումը չի անդրադարձել. նրանք շարունակում են վճարել հին սակագնով՝ 156 հազար դրամ կամ $318 ընթացիկ փոխարժեքով, իսկ խոշոր սպառողները (10 հազ. խմ և ավելի սպառողները/ վճարում են $277 1000 խմ դիմաց: Այդ ժամանակ էլ հաղորդվել էր, որ համաձայնագիրը կգործի մինչև 2015 թ. դեկտեմբերի 31-ը, ինչից հետո անհրաժեշտության դեպքում կստորագրվի նորը: